Ibyishimo mu mashuri yigenga nyuma y’uko Leta yumvise bimwe mu bibazo byashoboraga kuyasiga mu gihombo

Yanditswe na Twarabanye Venuste
Kuya 8 Ukuboza 2019 saa 02:36
Yasuwe :
0 0

Abafite amashuri yigenga barashima umwanzuro wa Minisiteri y’Uburezi wo gukomeza kwigisha mu ndimi z’amahanga n’ubufasha butandukanye bemerewe burimo n’ibitabo bya mwarimu n’iby’abanyeshuri, bavuga ko bizabarinda igihombo.

Kuwa 02 Ukuboza 2019 nibwo Minisitiri w’Uburezi, Dr Eugene Mutimura,yatangaje ko amashuri yigenga yemererewe gukomeza kwigisha mu ndimi z’amahanga yigishagamo ariko akarushaho no gushyira imbaraga mu rw’Ikinyarwanda.

Ibyo yabitangaje mu gihe hari hashize iminsi mike amashuri yigenga guhera mu mashuri y’incuke kugeza mu mwaka wa gatatu w’amashuri abanza asabwe gutanga amasomo mu rurimi rw’Ikinyarwanda.

Uretse gukomorerwa ku ndimi, amashuri yigenga yemerewe ubufasha burimo, ibitabo byo kwigishirizamo, ubufatanye mu kugaburira abana ku ishuri, kwandikisha amashuri, n’ibijyanye n’inyubako.

Rudasingwa Pierre uhagarariye mu mategeko ishuri ryitwa Saint Esprit rikorera mu Karere ka Kicukiro , avuga ko bitari byoroshye kwakira kwigisha umwana mu Kinyarwanda umutegurira kuzisanga mu bihugu u Rwanda rugenda rutsura umubano nabyo kandi bisaba kubitangirira hasi.

Ati “Ntabwo byari byoroshye kuko mu gihe tugezemo gutegeka umwana w’umunyarwanda kumubwira ngo yige mu rurimi rumwe ni nko kuvuga ngo bamuzirikiye aho, umunyarwanda ugiye kuba mu gihugu gusa kandi turi mu bihugu by’umuryango wa Afurika y’Iburasirazuba no mu bindi bihugu binyuranye aho tugomba kumenya indimi ahubwo byanashoboka twakongeramo n’izindi z’amahanga nk’Igiswahili.”

Rudasingwa avuga ko ikibazo cyari gikomereye amashuri yigenga kurusha ibindi ari igihombo bashoboraga guhura nacyo, iyo MINEDUC idafata uwo mwanzuro.

Hari umubyeyi wari uherutse kubwira IGIHE mbere y’uwo mwanzuro ko agiye gukura umwana we, mu ishuri ryigenga yamwishyuriraga, akamujyana ku ishuri riri hafi y’iwe akazamujyana mu ryigenga ageze mu mwaka wa Kane.

Nsengiyumva Eliphaz wari uhagaraiye ishuri rya Bright Happy Nation Academy riherereye mu Karere ka Nyanza, asanga icyemezo cyafashwe gishingiye ku kwita ku bana b’abanyarwanda kurusha kuvuga ngo iri ni ishuri rya leta ririya ni iryigenga.

Ati “Twabonye imyanzuro bafatiye amashuri ari myiza cyane cyane ayigenga kubona ko atihariye cyangwa adakora ibintu biri hanze ahubwo afatanyije na leta mu kubaka abaturage, mu kubaka ubumenyi, mu kubaka ubukungu, no kujijura rubanda kugira ngo ejo bazabe abaturage bafite akamaro atari hano mu Rwanda gusa ahubwo umunyarwanda aho yajya hose, abe afitiye u Rwanda umumaro.

Minisitiri Mutimura yumvikanishije ko u Rwanda rugiye kurushaho gufasha amashuri kuzuza ibyangombwa no gutanga uburezi bufite ireme, kurusha kurishakira mu mpinduka za hato na hato.

Yavuze ko bazakomeza kubahiriza Politiki ya leta yo kubegerea ibikorwa remezo isanzwe yibanda ku hantu hari amashuri n’amavuriro, ariko bakanabafasha kubona ibyangombwa kandi ntibabafungire amashuri.

Ati “Turabizeza rero ko tuzajya tubafasha mukabona ibyangombwa byo kwemererwa gukora [accreditation] kandi ikindi tubizeza, ntabwo tuzajya tubafungira amashuri, ngira go ubishinzwe arabyumva ariko namwe turabasaba ngo mwubahirize ibyo tubasaba mukore mu Rwanda nk’amashuri yose. Ntabwo byadushimisha kubona nawe ufite ishuri ridafite ireme, […] ni byiza yuko dufatanya kugera ku nshingano."

Ku myubakire yagize ati “Ku bindi bijyanye n’inyubako ishuri rifite bitewe n’inyubako uko ingana n’abanyeshuri bazahigira wabisaba nabyo tukagufasha kugira ngo ibyo leta igusonera ibigusonere.”

Amashuri yigenga yanasabye ko n’ibindi bikorwa bitandukanye birimo mudasobwa ku bana babihabwa ndetse na Internet bikabafasha kurushaho guteza imbere ikoranabuhanga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza