Iby’ingenzi mu biganiro bya Perezida Kagame na Minisitiri w’Intebe wa Ethiopia kuri COVID-19

Yanditswe na Rabbi Malo Umucunguzi
Kuya 26 Werurwe 2020 saa 10:00
Yasuwe :
0 0

Perezida Paul Kagame yagiranye ibiganiro na Minisitiri w’Intebe wa Ethiopie, Dr Abiy Ahmed Ali, wemeye gusakaza hirya no hino muri Afurika ibikoresho byo kwifashisha mu kurwanya COVID-19, byatanzwe na Jack Ma Foundation na Alibaba Group.

Ni ibiganiro Perezida Kagame yavuze ko byabaye mu minsi ine ishize kuri telefoni, mu gihe ibihugu bikomeje guhangana n’icyorezo cya Coronavirus, kimaze kwandurwa n’abarenga ibihumbi 470, kimaze guhitana abasaga ibihumbi 21.

Kuwa 16 Werurwe nibwo umuherwe Jack Ma wo mu Bushinwa, washinze ikigo gicuruza mu ikoranabuhanga cya Alibaba, yatangaje ko yahaye ibihugu bya Afurika inkunga yo kwifashishwa mu guhangana na Coronavirus.

Yakomeje ati "Mu guhangana n’uburyo ubukenerwe bw’ibikoresho by’ubuvuzi bukomeje kuzamuka muri Afurika, Jack Ma Foundation na Alibaba Foundation bazaha buri gihugu muri 54 bigize Afurika, ibikoresho 20 000 bipima, udupfukamunwa 100 000 n’ibikoresho 1000 birinda abaganga bikanapfuka isura."

"Muri rusange ibikoresho miliyoni 1.1 bipima, udupfukamunwa miliyoni esheshatu n’ibikoresho 60 000 birinda abaganga bizagezwa i Addis Ababa, Umurwa mukuru wa Ethiopia. Minisitiri w’Intebe Abiy Ahmed Ali yemeye gukurikirana ibijyanye no kubyakira no kubikwirakwiza mu bindi bihugu bya Afurika."

Ku wa Kabiri nibwo Dr Abiy Ahmed Ali, yatangaje ko indege ya Ethiopian Airlines, yahagurutse i Addis Ababa yerekeza mu Rwanda, itwaye ibikoresho byatanzwe na Jack Ma.

Kuri uyu wa Gatatu Perezida Paul Kagame yanditse kuri Twitter ko yagiranye ikiganiro na Minisitiri w’Intebe Dr Ahmed, anamushimira ubwitange yagaragaje.

Ati “Nagiranye ibiganiro by’ingirakamaro na Minisitiri w’Intebe Dr. @AbiyAhmedAli mu minsi ine ishize. Namushimiye uburyo yitanze n’ubushobozi bw’igihugu cye mu gukwirakwiza ibikoresho by’ingirakamaro byatanzwe na @JackMa, @foundation_ma na @AliBabaGroup Foundation mu kurwanya #COVID19.”

“Twanaganiriye ku gushaka uburyo buhuriweho bwa Afurika mu guhangana n’icyorezo cya Coronavirus n’ubukenerwe bw’uburyo bufatika buhuriweho n’Isi yose!”

Ubu buryo buhuriweho n’Isi yose ni ikintu Dr Abiy Ahmed akomeje gukangurira abakuru b’ibihugu cyane cyane ibikize.

Mu nyandiko yanyujije mu kinyamakuru Financial Times kuri uyu wa Gatatu, Dr Ahmed yagaragaje ko nk’ibihugu bikomeye birimo gufata imyanzuro yo gushora amafaranga menshi muri gahunda zidasanzwe zo gusigasira ubukungu bwabyo muri ibi bihe ibikorwa byinshi byahagaze.

Ni ibikorwa nyamara ngo bidashoboka ku bihugu byinshi bya Afurika kubera ko nta bushobozi bibifitiye nk’ubw’ibihugu bikize, nyamara ngo igihe Coronavirus yaba itaranduwe muri Afurika, izasubira inyuma inibasire bya bihugu bikize bitewe n’uburyo burimo gukoreshwa hirya no hino.

Yakomeje ati “Ubu buryo budahurirweho bw’ingamba za buri gihugu ukwacyo, nubwo zumvikana, ntabwo zirimo kureba kure, ntizirambye ndetse ntizakemura ikibazo burundu. Iyi virus itareba imipaka ntabwo yahashywa gutya.”

“Dushobora guhashya uyu mwanzi tutabonesha amaso ari uko hari uburyo buhuriweho bw’Isi yose. Igihe budahari, Afurika izahura n’ibibazo kurusha ahandi, ariko ntabwo ariyo bizarangiriraho. Ibi byose tubihuriyemo, bityo tugomba gufatanya kugeza ku iherezo.”

Yahise atanga urugero ku gihugu cye cya Ethiopia, uburyo cyateje imbere inzego z’ubuzima mu myaka ishize, ariko hatekerezwaga ko habaho icyorezo nka Covid-19.

Byongeye, uburyo bwo gukaraba intoki burimo kwifashishwa mu guhangana n’iki cyorezo hari abatatubasha kuko bataragezwaho amazi meza, n’uburyo bwo guhana intera hagati y’abantu buragoye kubera imibereho gakondo yabo nko gusangira.

Byongeye, Ethiopian Airlines yari ikigo kiruta ibindi muri Ethiopia cyaninjizaga amadovize menshi, kirimo gufunga ibikorwa kubera iki cyorezo. Ibyo ngo bizagira ingaruka ku bushobozi bwo gutumiza mu mahanga ibikoresho byo mu buvuzi, n’ubushobozi bwo kwishyura amadeni.

Yakomeje ati “Ibirimo kuba ntabwo ari umwihariko kuri Ethiopia. Bisangiwe n’ibihugu byinshi muri Afurika. Ariko nibidafata ingamba zikwiye mu guhangana n’iki cyorezo, nta gihugu na kimwe ku isi kizasigara gitekanye.”

“Igihugu gikize kibashije guhagarika iki cyorezo mu gihugu, ingendo zigakomeza gufungwa kimwe n’imipaka, umuntu yatekereza ko abigezeho. Nyamara ni iby’akanya gato. Umutsindo w’Isi yose niwo washyira iherezo ku cyorezo.”

Dr Abiy avuga ko Covid-19 yibutsa abatuye Isi ko basangiye iyi virus kandi itita ku ibara ry’uruhu, pasiporo umuntu akoresha cyangwa imana asenga, bityo n’ingamba zikoreshwa mu guhangana n’icyorezo haba mu buvuzi cyangwa mu bukungu zikwiye kuba zihuriweho.

Yasabye ko Ishami ry’Umuryango w’Abibumbye ryita ku Buzima, OMS, ariryo ritangirirwaho mu kongererwa ubushobozi mu mikoro, kugira ngo rirangaze imbere gushaka ibisubizo ku rwego rw’Isi, rinafashe guverinoma z’ibihugu bikiri mu nzira y’amajyambere.

Yakomeje ati “Nta gihe cyo guta: ubuzima bwa miliyoni z’abaturage buri mu kaga. Byubakiye ku byamaze gutangazwa n’inzego mpuzamahanga z’imari, ibihugu bigize G20 bigomba gutangiza ikigega cyo gukumira isenyuka ry’urwego rw’ubuzima muri Afurika. Izi nzego zikeneye gushyiraho uburyo bwunganira ibihugu bya Afurika.”

“Ikibazo cyo gukemura umuzigo w’amadeni kuri Afurika nacyo gikeneye kongera kuganirwaho mu buryo bwihutirwa. Icya nyuma, Abafatanyabikorwa ba Afurika mu iterambere barebe uko ingengo y’imari igenewe inkunga itakoreshwa mu byihutirwa mu bihugu byabo. Aha niho ubumuntu n’ubufatanye bigomba kugaragarira. Niba iyo nkunga yarigeze gukenerwa muri Afurika, iki ni cyo gihe.”

Kugeza ubu abantu bamaze kwandura Coronavirus mu Rwanda ni abantu 41, mu gihe muri Ethiopia ari 12.

Perezida Kagame ubwo yaganiraga na Minisitiri w'Intebe Dr Abiy Ahmed ubwo yari mu Rwanda muri Mata 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza