Iburasirazuba: Guverineri Mufulukye yeretse urubyiruko ibibazo bitatu bibangamye, arusaba uruhare mu kubirwanya

Yanditswe na Hakizimana Jean Paul
Kuya 19 Werurwe 2019 saa 08:41
Yasuwe :
0 0

Guverineri w’Intara y’Iburasirazuba, Mufulukye Fred, yeretse urubyiruko ibibazo bitatu bakwiye kwiha umuhigo wo kurwanya kugira ngo intara yabo irusheho kuba nziza, birimo ibiyobyabwenge, inda zitateguwe n’abana bata ishuri.

Yabigarutseho kuri iki Cyumweru ubwo yatangizaga Inteko rusange y’Urugaga rw’Urubyiruko rushamikiye ku muryango wa FPR-Inkotanyi mu ntara y’Iburasirazuba. Iyi Nteko yabereye mu Karere ka Kayonza, ahahurijwe urubyiruko rurenga 300.

Ibyo bibazo biri mu bihangayikishije cyane dore ko nk’abana batwara inda, imibare ya Minisiteri y’Ubuzima igaragaza ko abana bafite hagati y’imyaka 15 na 19 bagera ku 3375 bo mu Ntara y’Iburasirazuba, babyaye mu mezi atandatu gusa ya mbere ya 2018.

Ikibazo cy’abana bata ishuri nacyo muri iyi ntara kiracyagaragara cyane nko mu Karere ka Rwamagana, aho abataye ishuri mu mwaka ushize bari 2749, hakozwe ubukangurambaga hagarurwa 1867 naho 353 ntibarigarukamo, abandi 509 ngo bagiye bimuka.

Guverineri Mufulukye yavuze ko ibi bibazo bitatu bibangamiye imibereho myiza y’abaturage, agasanga urubyiruko rubigize umuhigo rwabirwanya kandi bigashoboka.

Yagize ati “Iyo mbona umukobwa watewe inda akiri muto, nkabona abana bata amashuri, nkanabona n’urundi rubyiruko runywa ibiyobyabwenge, nsanga ari ikibazo gikomeye ariko nk’ibaza nti mwe mubana nabo mubafasha iki ngo bave muri biriya bibazo?”

“Muhagurutse mugashaka aho biriya bintu bikorerwa, abakobwa mukabagira inama bakareka gushukwa no kwiyandarika, abahungu mukabagira inama mukabigisha, ndizera ntashidikanya ko byakemuka kandi mu gihe gito.”

Mufulukye yasabye uru rubyiruko gusubiranayo ingamba zizatuma bamanuka hasi ku mudugudu bagahindura urundi rubyiruko, aho binaniranye bagatanga amakuru leta ikabafasha.

Batamuriza Lea waturutse mu Karere ka Gatsibo, yavuze ko nyuma y’iyi nteko bagiye kongera ubukangurambaga buruta ubwo bakoraga.

Ati “Iyo abantu bamaze kumva, bashyira mu bikorwa ibyo bumvishe. Tugiye kongera ubukangurambaga turushaho kurwanya biriya bintu bitatu kandi tunatanga amakuru y’ababyishoramo.”

Urubyiruko rwemereye guverineri ko rugiye guhindura imikorere, rukanoza ibitagenda, runiyemeza kongera imikorere n’imikoranire n’inzego z’ibanze.

Iyi nteko yitabiriwe n'urubyiruko rushamikiye ku muryango RPF-Inkotanyi
Guverineri Mufulukye yasabye urubyiruko kurwanya ibiyobyabwenge, inda ziterwa abangavu n'ikibazo cy'abana bata ishuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza