00:00:00 IGIHE NETWORK KN KINYARWANDA EN ENGLISH FR FRANCAIS

Iburasirazuba: Abahinzi bagizweho ingaruka n’amapfa barasaba ubufasha

Yanditswe na Uwase Divine
Kuya 29 January 2022 saa 02:58
Yasuwe :

Imiryango igera ku bihumbi 36 y’abahinzi bagizweho ingaruka n’izuba ry’igihe kirekire mu Ntara y’Iburasirazuba irasaba ubufasha ngo ibashe kwikura muri icyo kibazo mu gihe yitegura igihembwe cy’ihinga cya 2022 B.

Imyiteguro y’igihembwe cya kabiri cy’ihinga itangirana no gutegura imirima muri Mutarama na Gashyantare nk’uko ingengabihe y’ubuhinzi iteye.

Mu Ukuboza umwaka ushize, leta yatanze ibiribwa ku miryango byagaragaraga ko ibikeneye mu turere turindwi twagizweho n’ingaruka kurusha utundi mu Ntara y’Iburasirazuba nka Bugesera, Gatsibo, Kayonza, Kirehe, Ngoma, Nyagatare na Rwamagana.

Toni zirenga 1.790 z’ibiribwa birimo umuceri, ifu ya kawunga, ibishyimbo n’ibigori ni byo byatanzwe.

Bamwe mu bahinzi bagezweho n’ingaruka babwiye Newtimes ko bakiri guhura n’inguruka z’amapfa bakaba bakeneye inkunga y’imbuto z’igihembwe cy’ihinga cya 2022 B.

Nzamwita Alphonsine ukorera muri koperative yitwa COPROMAGI y’abahinzi ba soya n’ibigori yagize ati “Twahuye n’izuba ry’igihe kirekire ryangije 40% by’ibihingwa cyane ibishyimbo n’ibigori. Ubwo imvura yongeraga kugwa yangije ibyari byarokotse izuba.”

Uyu muhinzi yavuze ko nibura akeneye ibiro 50 by’imbuto za soya zo guhinga mu gihe kigiye kuza.

Yakomeje agira ati “Nka koperative twese tuzahinga soya ariko ntabwo turabona imbuto kubera ko zihenze, turifuza ko twabona umushoramari waduha imbuto ku nguzanyo tukazishyura nyuma.”

Yongeyeho kandi ko bari barimo kwitegura kugura ibikoresho byo kuhira ariko kubera ibihombo bagize mu gihembwe gishize bashobora gushaka ubundi buryo.

Umuhinzi mu Karere ka Kirehe, Jean Bosco Ndatimana, yavuze ko bakeneye imbuto n’ubufasha muri gahunda yo kuhira imyaka mu gihe imvura idahagije.

Umukozi ushinzwe itumanaho muri Minisiteri y’Ubuhinzi n’Ubworozi, Kwibuka Eugene, yatangaje ko hari gahunda yo kugoboka imiryango bigaraga ko igifite ibibazo yatewe n’ingaruka z’amapfa.

Ku bijyanye n’ikibazo cy’ifumbire, Umuyobozi Mukuru Wungirije w’Ikigo cy’Igihugu Gishinzwe Iterambere ry’Ubuhinzi n’Ubworozi (RAB) ufite mu nshingano ibijyanye n’ubushakashatsi n’ikoranabuhanga, Dr Bucagu Charles, yatangaje ko abahinzi bazikeneye bazafashwa kuzibona.

Yagize ati “Dufite gahunda yo gutanga ubufasha bw’imbuto cyane ku bigori, ibishyimbo na soya. Uturere tuzafasha mu gutanga urutonde rw’abazikeneye.”

Yavuzeko gutegura ubutaka buzahingwa muri iki gihembwe cya kabiri cy’ihinga bikomeje ibindi bikazatangazwa nyuma.

Dr Bucagu yavuze ko mu rwego rwo kugabanya ubukana bw’ikibazo cy’amapfa, leta yashoye miliyari 1,2 y’amafaranga y’u Rwanda agenewe gushaka ibikoresho byo kuhira mu Ntara y’Iburasirazuba.

Leta ifite irateganya ko ubuso bwuhirwa buzaba bugera kuri hegitari 102.284 mu 2024 buvuye kuri hegitari 63.000 bwuhirwa ubu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .