Ibitaro by’Umwami Faisal byahagaritse gusura abarwayi mu rwego rwo kwirinda Coronavirus

Yanditswe na Ndahayo Emmanuel
Kuya 20 Kanama 2020 saa 09:38
Yasuwe :
0 0

Ibitaro by’Umwami Faisal byatangaje ko mu rwego rwo kwirinda ikwirakwira rya Coronavirus, bisubitse isurwa ry’abarwayi bari mu bitaro kuva kuri uyu wa 20 Kanama kugera igihe kizatangazwa.

Ni ingamba zifashwe mu gihe icyorezo cya Coronavirus cyongeye kubura umutwe mu gihugu, ndetse kigaragara ahahurira abantu benshi nko mu masoko.

Mu itangaza Ibitaro by’Umwami Faisal byasohoye, rivuga ko gusura umurwayi bizajya bikorwa gusa n’abarwaza babiri na bo bakagomba kwerekana icyemezo cy’uko bipimishije Coronavirus kandi nta bwandu bafite.

Iri tangazo rigira riti “Mu rwego rwo kwirinda ikwirakwira rya Coronavirus, tuributsa abantu ko gusura [abarwayi] bibujijwe kugeza igihe muzamenyeshwa. Abarwaza babiri babifitiye icyangombwa kandi bafite n’ibisubizo bigaragaza ko nta bwandu bwa Coronavirus bafite, nibo bemerewe gusura abarwayi”.

Ibi bitaro kandi byanatangaje ko bigiye kujya bisuzuma abarwayi bose babihawemo ibitaro, mu rwego rwo kureba ko nta bwandu binjiranye.

Rigira riti “Ibitaro by’umwami Faisal birabwira abantu bose ko kuva uyu munsi ku wa 20 Kanama, 2020, abarwayi bose boherejwe ku bitaro bazajya basuzumwa ibimenyetso bya Coronavirus”.

Ibi bitaro kandi byafashe ingamba zirimo gushyiraho ubukarabiro ku miryango yinjira n’isohoka, aho abarwayi n’abandi bose babigana basabwa kwisukura mbere yo kubyinjiramo.

Barasabwa kandi kwambara neza agapfukamunwa, no gushyiramo intera ya metero aho bikenewe hose ko bategereza.

Coronavirus imaze kwigaragaza nk’indwara izahaza abantu basanganywe ibindi bibazo by’ubuzima, ku buryo umuntu usanzwe ari mu bitaro kubera uburwayi aramutse ayanduye, bishobora kugira ingaruka mbi ku buzima bwe.

JPEG - 193.9 kb
Itangazo ry’ibitaro by’umwami Faisal ryasabye ko ibikorwa byo gusura abarwayi bihagarara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .