Ibimenyetso by’itegurwa n’ishyirwa mu bikorwa rya Jenoside yakorewe Abatutsi muri Kigali (Igice cya kabiri)

Yanditswe na Dr Bizimana Jean Damascène
Kuya 4 Ugushyingo 2020 saa 03:22
Yasuwe :
0 0

Igice cya kabiri cy’iyi nyandiko kirerekana ibikorwa by’ingenzi byaranze ishyirwa mu bikorwa ry’umugambi wo gutsemba Abatutsi mu Mujyi wa Kigali guhera tariki 8 Mata 1994 nkuko byasobanuwe na Bizimana Jean wayoboraga Komini ya Nyarugenge.

Bizimana Jean yavutse mu 1957, yaaboneye izuba mu Kagari ka Rugando, Umurenge wa Kimihurura, Akarere ka Gasabo; yayoboye Komini ya Nyarugenge kuva Mata 1992 kugeza Nyakanga 1994.

Uyu mugabo yanabaye umukozi mukuru muri Perezidansi ya MRND (Ugushyingo 1986-Gicurasi 1991), Minisiteri y’Ubutegetsi bw’Igihugu n’Amajyambere ya Komini (Gicurasi 1991 - Kanama 1991), Perezidansi ya Repubulika (Perezidansi ya Repubulika (Kanama 1991-Mutarama 1992) no mu Biro bya Minisitiri w’Intebe (Mutarama 1991 - Mata 1992).

Yari kandi no muri Komite Nyobozi ya MRND ya Perefegitura y’Umujyi wa Kigali, akaba yemera ko yagize uruhare rweruye mu gutegura, gushishikariza no kugenzura ishyirwa mu bikorwa rya Jenoside yakorewe Abatutsi.

Bizimana Jean afungiye muri Gereza ya Nyanza, aho yakatiwe igifungo cya burundu.

1) Iyicwa ry’Abatutsi mu Mujyi wa Kigali ku wa 8 Mata 1994

Bizimana Jean yemeza ko ku wa 8 Mata 1994 yafashije Perefe Renzaho, Superefe Butera Jean Baptiste wari ushinzwe Serivisi ya Politiki, Ubutegetsi n’Amategeko kuri P.V.K; Major Nyamuhimba wari ushinzwe Serivisi ya Polisi y’Umujyi n’abandi bayobozi ba za Serivisi za P.V.K., Burugumesitiri wa Komini Kacyiru Nyirinkwaya Pierre Claver n’abasirikare baturutse muri Minisiteri y’Ingabo z’Igihugu (MINADEF) mu gikorwa cyo guha imbunda, kuri P.V.K bamwe mu bakuru b’interahamwe na CDR bo ku rwego rw’Igihugu, Komini na Segiteri bo muri P.V.K. Izo mbunda zaturutse muri MINADEF.

Mu Nterahamwe n’Impuzamugambi zahawe imbunda harimo Kajuga Robert, Rutaganda Georges, Ruhumuriza Phénéas, Niyoyita Dieudonné, Maniragaba Bernard, Ngerageze Pecas, Uwizeyimana Epimaque, Gatabazi Jean Baptiste, Ndayitabi Sued, Gahungu Gaëtan, Habinshuti Augustin, Ntamfurayishyari Félix, Mukandutiye Angeline, Ziragobora Joseph, Simbizi Stanislas (CDR), Twagirayezu Jean Népomucène (CDR) n’abandi.

Buri wese yahabwaga imbunda eshanu. Bizimana Jean yemeza ko kuva icyo gihe, we ubwe na Perefe Renzaho n’abandi bayobozi ba P.V.K bagiye bohereza, bakanayobora ibitero mu bigo n’insengero Abatutsi bagiye bahungiramo kugeza muri Kamena 1994.

Ku wa 08/4/1994, Bizimana Jean na Perefe Renzaho bohereje ibitero bibiri, kimwe mu kigo cy’Abafurere Josephites i Nyamirambo biyobowe na Konseye wa Segiteri Nyamirambo, Sezibera Céléstin n’uwa Nyakabanda, Nyirimanzi Grégoire.

Bari kumwe kandi na Colonel Hakizimana Edouard (Commandant wa Compagnie ya gisirikare yari ikambitse muri College Saint-André), abapolisi bari kumwe n’abo bakonseye, abajandarume ba teritwari ya Nyamirambo yayoborwaga icyo gihe na Lt Baziruwiha Frédéric n’interahamwe nyinshi zaturutse mu masegiteri ya Biryogo, Nyamirambo, Nyakabanda na Gitega.

Ikindi gitero cyagiye mu kigo cya Paruwasi Karoli Lwanga boherejweyo Konseye Karekezi Amri ari kumwe n’abajandarume ba Compagnie territoriale ya Nyamirambo n’interahamwe nyinshi zirimo Hadji Gahungu, Ndayitabi Sudi, Simbizi Stanislas (CDR), Ngeze Hassan (CDR), Habyarimana Alias Kigingi, Maniragaba Bernard, Ngerageze Pecas,…

Mu bo bishe ku ikubitiro hari Maurice Muganamfura wakoraga mu isanduku yo kuzigama y’u Rwanda, Boyi Straton wari umuganga atuye i Nyamirambo, Gahigi wari umudozi mu Biryogo, Mathias wari ufite Boutique Progres mu Biryogo, Nyiranyamibwa Tasiyana wo mu Nyakabanda ahitwa mu Kigarage. Abishwe tariki 8 Mata 1994 barengaga 200 muri ibyo bigo byombi.

2) Iyicwa ry’Abatutsi muri Kigali hagati muri Mata 1994

Ku wa 16/4/1994, Bizimana Jean yitabiriye inama yayobowe na Perefe Renzaho afatanyije na Karimanzira Callixte wari Directeur de Cabinet muri Minisiteri y’Ubutegetsi bw’Igihugu n’Amajyambere ya Komini.

Imwe mu myanzuro yafatiwemo irimo gukaza za bariyeri kugira ngo umwanzi atazicaho ahunga, kugenzura neza indangamuntu n’ibindi byangombwa by’inzira, ubonetseho ko ari Umututsi agahita yicwa, gukora amarondo yo ku manywa na nijoro nta kujenjeka no kutereka imibiri y’Abatutsi abanyamakuru ngo batayifotora.

Ku wa 22 Mata 1994, Bizimana Jean, Perefe Renzaho na Général Munyakazi Laurent bayoboye igitero kirimo Nyirabagenzi Odette na Mukandutiye Angeline Alias Inspectrice. Ibitero byose byo muri Segiteri Rugenge byahagurukiraga kwa Mukandutiye wari warigaruriye interahamwe zaho. Muri kiriya gitero zari nyinshi cyane harimo izamamaye cyane nka Habimana Fidèle Alias Castar, Lango Hussein, Nkeshimana Alias Kivide, Habintwari Pascal Alias Shitani, Harelimana Simba, Bugande Joseph, Misago Modeste Alias Furaha, Rwabuhungu Jerome Alias Butihare, Hakiza Alias Rudiha, Rurangwa, Richard,…

Bizimana Jean abivuga muri aya magambo ati “Nahageze nyuma nsa n’utegerejwe maze tuvugana na Perefe nemeza ko ari Abatutsi bahahungiye, bose bari bababoheye mu mazu, abagabo bashyizwe ukwabo n’abagore bashyizwe ukwabo hanze. Perefe yahise ahamagara interahamwe azishumuriza abagabo bajya kubicira imbere ya Boulangerie yo kwa Gasana muri Rugenge. Mu gihe barimo kubica, mu by’ukuri binturutseho kuko nemeje ko ari Abatutsi, Perefe yategetse kujyana abagore kuri Sainte Famille. Twagiye n’amaguru abagore bakikijwe n’abajandarume ndi imbere yabo. Maze kubashyikiriza Padiri Munyeshyaka Wenceslas nahise ngenda, imodoka nari nagiyemo umupolisi witwa Nyanzineza twakundaga kugendana yayinsangishije kuri Sainte Famille.’’

"Sinakurikiranye ngo menye uko byaje kugendekera bariya bagore. Abagabo twiciye aho ni benshi: Gihana wakoraga muri ORINFOR, Murangwa umuhungu wa Munyampundu Manasse, uyu na we Interahamwe zamwiciye iwe mu rugo n’abandi bagize umuryango we. Imibiri y’abishwe Interahamwe zagiye kuyijugunya mu cyobo cyo kwa Yaremye bitaga CND, indi ijyanwa mu irimbi ry’i Nyamirambo. Muri icyo gitero kandi harimo aba Responsables b’amaserire yo muri Segiteri Rugenge n’abapolisi batatu bakoraga hamwe na Konseye Nyirabagenzi aribo Mwazo, Richard na Eugène na Perezida wa MRND muri iyo Segiteri Rubangura Emmanuel yari ahari.”

Ku wa 24 Mata 1994, Burugumesitiri Bizimana Jean avuga ko yitabiriye inama yayobowe na Nzirorera Joseph, Umunyamabanga Mukuru wa MRND akaba na Perezida w’Inteko Ishinga Amategeko muri Guverinoma y’Abatabazi aherekejwe na Semanza Laurent wari Perezida wa MRND muri Perefegitura ya Kigali Ngali.

Muri iyi nama, hizwe uburyo interahamwe zo mu rwego rw’Igihugu, izo mu rwego rwa Perefegitura y’Umujyi wa Kigali zafasha abasirikare mu guhashya umwanzi; Perefe Renzaho ashimangira ko Abatutsi bagomba gushira byanze bikunze.

Bafashemo kandi imyanzuro ikurikira: Interahamwe zigomba kongererwa ubushobozi bwo guhangana n’umwanzi zihabwa intwaro zikomeye, gukaza ibitero byo gutsemba Abatutsi ahantu hose bahungiye.

Bizimana Jean yongeyeho ko Interahamwe zari muri iyo nama zasabye imiti yo kuvuza inkomere zazo, Umunyamabanga Mukuru wa MRND, Nzirorera Joseph yazishumurije za Pharmacie zo mu Mujyi ngo zijye zijya gushakirayo bityo aba anazishumuriye no gusahura byeruye umujyi.

Ku wa 25 Mata 1994, Bizimana Jean avuga ko yitabiriye inama iyobowe na Perefe Renzaho Tharcisse, berekwa umuyobozi wa Serivisi ya Defense Civile muri Perefegitura y’Umujyi wa Kigali, Major Bivamvagara n’umwungirije Lt Nshimiyimana boherejwe na MINADEF.

Umuhuzabikorwa wa defense civile ku rwego rw’Igihugu yari Colonel Gasake Athanase. Bizimana Jean akavuga ko mu nshingano zayo z’ingenzi basobanuriwe ko ari ukunoza ishyirwaho, imicungire n’igenzura rya za bariyeri n’amarondo, guha imyitozo urubyiruko mu Mujyi wa Kigali rwo kongera Interahamwe, gutanga imbunda zo gukoresha mu rwego rwa defense civile, gukurikirana imikorere ya za Komite de crise, kujyana interahamwe mu bitero byo kwica Abatutsi.

Bizimana Jean avuga ko bemeje ko buri wese agomba gukorana n’iyo serivisi, bemeje kandi ko abakonseye bashyiraho byihutirwa za komite de crise mu masegiteri yabo zo kubafasha mu kazi ko kwica Abatutsi. Banemeje ko abakonseye bagomba gutanga raporo z’uko Abatutsi bishwe mu ma Segiteri yabo.

Ku wa 29 Mata 1994, muri Segiteri Nyakabanda, Bizimana Jean avuga ko we na Major Bivamvagara bahayoboye inama Konseye w’iyo Segiteri yari yabatumiyemo kugira ngo abereke abagize Komite yagenzuraga Jenoside (Comite de crise) yari yashyizeho. Akavuga ko babemeje hanyuma babashishikariza igikorwa cyo kwikiza Abatutsi vuba.

3) Iyicwa ry’Abatutsi mu Mujyi wa Kigali muri Gicurasi 1994

Bizimana Jean asobanura ko mu matariki ya mbere ya Gicurasi 1994, kuri St Paul na Ste Famille, we na Perefe Renzaho na Major Bivamvagara bayoboye igitero cyarimo bariya bose bari mu gitero cyo kwica kuri CELA ku wa 22 Mata 1994.

Bamwe mu bahiciwe barimo: Rukundo Emmanuel wari ufite ishuri ryigisha gutwara imodoka kuri Ste Famille, Bihehe wari umucuruzi, Umutoni Safi waje avuye muri Segiteri Biryogo, Louis waje ava ku Kinamba n’abandi.

Bizimana Jean avuga ko abo biciye aho hantu bari benshi, ko babahaye interahamwe zikajya kubicira hafi y’ahahoze “Peage” muri Rugenge. Bizimana Jean yongeraho ko yategetse Umuyobozi wa Serivisi y’Isuku (hygiène) ya P.V.K, Ngerageze Jean-de-Dieu kuhavana imibiri yabo akayijyana n’imodoka za MINITRAPE kuyijugunya mu byobo by’irimbi ry’i Nyamirambo.

Bizimana Jean yemeza kandi ko yatanze imbunda yahawe na Perefe Renzaho ku buryo bukurikira: Imbunda eshanu Konseye wa Nyakabanda Nyirimanzi Grégoire, Imbunda ebyiri kuri Konseye mushya wo muri Segiteri Nyamirambo Kaboyi Jérémie, Imbunda imwe Konseye wa Segiteri Gitega Bizimana Madjariwa, Imbunda 2 responsable wa Serire ku Kimisagara Sekamana Mathias, Rwajekare André, imbunda 1 akaba yari umuturage wa Kimisagara.

Abandi bakonseye imbunda bazihawe na MINADEF ku wa 11 na 12 Mata 1994 bitegetswe na Perefe Renzaho.

Bizimana Jean avuga kandi ko yafashije Major Bivamvagara gutanga imbunda zo gutoza urubyiruko kuri Stade Regional ya Kigali i Nyamirambo, ku Kimisagara, ku mashuri abanza yo ku Gitega n’ayo ku Ntwari, ku bibuga bya Cercle Sportif de Kigali (CSK), mu Rugunga, kwa Simbizi Stanislas no mu Biryogo.

Abarangizaga imyitozo bahabwaga kandi imbunda kuri P.V.K na Perefe Renzaho, Général Kabiligi Gratien na Major Bivamvagara. Izindi zatangirwaga muri MINADEF na Colonel Bagosora Théoneste na Colonel Gasake Athanase.

4) Iyicwa ry’Abatutsi mu Mujyi wa Kigali muri Gicurasi 1994

Minisitiri w’intebe wa Guverinoma y’Abatabazi, Kambanda Jean yatumije inama Bizimana Jean arayitabira. Avuga ko bafashe umwanzuro wo guhiga Abatutsi aho baba bacyihishe hose mu ngo no gukaza ibitero mu bigo n’insengero Abatutsi bahungiyemo.

Asobanura neza ko muri rusange izo nama zose zavuzwe umwanzuro bafashe wari uwo “gutsemba Abatutsi bashakaga kugarura Ingoma ya Cyami mu gihugu cyacu”.

Mu kuwushyira mu bikorwa ingamba bafashe zirimo gukaza ibitero ku Batutsi mu ngo n’ahandi bahungiye, gukaza za bariyeri kugira ngo umwanzi atazinyuraho ahunga, gukaza amarondo ku manywa na nijoro, guha intwaro Interahamwe n’Abahutu bose zo kwikiza umwanzi, kudashyira imibiri y’Abatutsi bishwe ku mihanda mbere y’uko serivisi y’isuku ya P.V.K ihagera ngo iyijyane mu irimbi ry’i Nyamirambo hirindwa ko abanyamakuru mpuzamahanga bayifotora n’indi ikajugunywa mu byobo rusange byacukuwe mu masegiteri.

Kuri P.V.K, mu bazaga muri izo nama hari bamwe mu basirikare mu ngabo z’Igihugu na Jandarumori nka Général Munyakazi Laurent, Lt Colonel Rwabarinda Ephrem, Lt Colonel Rutayisire Laurent, Colonel Ntiwiragabo Aloys, Major Nyamuhimba, Major Bivamvagara, S/Lt Nshimiyimana, Capitaine Ntirugiribambe (Commandant wa Compagnie Territoriale ya Nyarugenge), Lt Baziruwiha Frédéric (Commandant wa Compagnie Territoriale ya Nyamirambo) waje gusimbuzwa kuri uwo mwanya na Capitaine Ngaboyisonga, abayobozi ba serivisi z’imirimo muri P.V.K, ba Burugumesitiri, ba Konseye, abayobozi b’amashyaka mu rwego rwa Perefegitura na Komini (MRND, CDR, PECO n’ayo mu ishami rya Power MDR, PSD, PL, PDC na PDI). Abayobozi n’abakuru b’Interahamwe mu rwego rw’Igihugu, Perefegitura, Komini na Segiteri.

5) Iyicwa ry’Abatutsi mu Mujyi wa Kigali muri Kamena 1994

Ku wa 14 Kamena 1994 kuri Centre Pastoral Saint Paul, Bizimana Jean avuga ko yajyanyeyo na Perefe Renzaho bayoboye igitero bica Abatutsi bari ku rutonde.

Asobanura ko yari yaraye yoherereje raporo Commandant wa Brigade ya Muhima, Adjudant Chef Mugiraneza, ku wa 13 Kamena 1994.

Urwo rutonde rwariho Abatutsi barenga 40 rwari rwateguwe na Konseye Nyirabagenzi Odeta wa Rugenge na Konseye Kamatamu Euphrasie wa Muhima. Mukandutiye Angelina na Nyirabagenzi Odeta bari mu bayoboye igitero. Akavuga ko bamaze kubica Interahamwe zabajugunye mu cyobo cyo kwa Yaremye bitaga CND muri Rugenge.

Ku wa 17 Kamena 1994 kuri Saint Paul na Sainte Famille, Bizimana Jean na Perefe Renzaho, Général Munyakazi Laurent, Major Bivamvagara na Major Nyamuhimba, bayoboye igitero cyari kigizwe n’abasirikare, abajandarume n’Interahamwe nyinshi cyane ziganjemo abavuzwe haruguru cyane cyane abari bitabiriye igitero cyo ku wa 22/4/1994 kuri CELA, barangajwe imbere na Mukandutiye Angeline, Nyirabagenzi Odeta na Lt Claude. Iki gitero cyarimo n’Interahamwe zari zikambitse ku kibuga cya Paroisse Sainte Famille.

Bizimana Jean avuga ko bishe Abatutsi benshi cyane barimo: Nsabimana Eugène murumuna w’umucuruzi Rubangura Védaste, Hyacinthe, umukobwa wa Karoli Lwanga wo muri Rugenge, Umulisa Goderiva waje avuye muri Selire Kabasengerezi yo muri Rugenge, Mukamanzi Grâce wigaga muri APACOPE, Manzi Georges wari umukinnyi w’umupira, Uwamurera Regine, Roger wari uwo muri Rugenge, Kamanzi wari uwo muri Rugenge, Selire Kabasengerezi, Etienne wari umwarimu ku Kagugu, Mama Ines wari wavuye i Gikondo, Callixte waje aturutse ku Kacyiru, Desire wigaga kuri CISK n’abandi benshi Bizimana Jean avuga ko atibuka amazina.

Hagati muri Kamena 1994, Bizimana Jean asobanura ko we na Perefe Renzaho, Butera Jean-Baptiste (Umuyobozi wa Serivisi y’Ubutegetsi, Politiki n’Amategeko), Major Bivamvagara (Umuyobozi wa Defense Civile muri P.V.K), Major Nyamuhimba (Umuyobozi wa Serivisi ya Polisi y’Umujyi), Rubwejanga Tharcisse (umuyobozi wa serivisi y’abinjira n’abasohoka muri P.V.K) birukanye kuri P.V.K Abatutsi bari barahahungiye, akavuga ko atigeze amenya aho berekeje n’uko byaje kubagendekera.

Mu gusoza, Bizimana Jean asaba imbabazi muri aya magambo “Ku bw’ubwo bugome ndengakamere nakoze, maze kwicuza, kwihana no gusobanukirwa neza gahunda ya “Ndi Umunyarwanda n’iy’Ubumwe n’Ubwiyunge”, ndasaba imbabazi mbikuye ku mutima abarokotse Jenoside yakorewe Abatutsi by’umwihariko imiryango y’ababuriye ubuzima bwabo muri Komini ya Nyarugenge nayoboraga, ndasaba imbabazi Leta y’u Rwanda, Abanyarwanda bose muri rusange n’Imana ngira nti ‘Jenoside ntizongere kubaho ukundi’.”

-  Umusozo

Ku wa 16 Kamena 2006, Urukiko Mpanabyaha Mpuzamahanga Rwashyiriweho u Rwanda, Urugereko rw’ubujurire rwafashe umwanzuro ukomeye winjiye mu mateka y’Isi wemeza ko Jenoside yakorewe Abatutsi mu Rwanda ari ihame mpuzamahanga ritagomba kugibwaho impaka.

Ubuhamya bw’abari abategetsi nka Bizimana Jean wakoze imirimo itandukanye, akaba mu bateguye bakanayobora Jenoside mu Mujyi wa Kigali ni ikimenyetso ndakuka kigaragaza umugambi wo gutsemba Abatutsi. Abashaka gupfobya iri hame barata umwanya.

Bizimana Jean wayoboraga Komini ya Nyarugenge yakatiwe igifungo cya burundu nyuma yo guhamywa ibyaha bya Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .