Ibikubiye mu itegeko rishya riha ububasha Perezida wa Repubulika ku bigo bya leta bikora ubucuruzi

Yanditswe na Philbert Girinema
Kuya 26 Kamena 2020 saa 07:44
Yasuwe :
0 0

Mu itegeko rishyiraho amategeko rusange agenga ibigo bya Leta rishya, ubu ibigo bya Leta bigabanyije mu byiciro bibiri: ibigo bya Leta bikora imirimo itari iy’ubucuruzi n’ibigo bya Leta bikora imirimo y’ubucuruzi.

Iri tegeko rigena ko ikigo cya Leta gikora imirimo itari iy’ubucuruzi gishyirwaho kandi kikavanwaho n’Iteka rya Perezida wa Repubulika akaba ari naryo rigena kandi intego, inshingano, imiterere n’imikorere byacyo.

Rigena kandi ko sosiyete y’ubucuruzi ya Leta ishyirwaho kandi ikavanwaho hakurikijwe amategeko agenga amasosiyete y’ubucuruzi kandi iteka rya Perezida rikagena iby’ibanze bisabwa kugira ngo hashyirweho sosiyete y’ubucuruzi ya Leta n’amategeko y’inyongera yerekeye imicungire yayo.

Kuba iteka rishyiraho ikigo cya leta cyangwa se rigikuraho rigomba kuba ari irya Perezida, bisobanurwa nk’ibigamije kwihutisha “ishyirwa mu bikorwa rya politike n’ingamba bya Leta naho sosiyete y’ubucuruzi igengwa na Leta igashyirwaho hakurikijwe amategeko agenga amasosiyete y’ubucuruzi”.

Isobanurampamvu y’iri tegeko ivuga ko ubusanzwe hari inzira ndende mu gushyiraho ikigo cya Leta kuko ikigo cya Leta cyashyirwagaho n’itegeko kandi kikavanwaho n’itegeko. Ni mu gihe ishyirwaho ry’itegeko rica mu nzira ndende uhereye mu itegurwa kugeza ku itangazwa ryaryo mu gihe politiki, gahunda n’ingamba bya Leta nka gahunda ya Guverinoma y’imyaka irindwi (NST1) bikenera ishyirwa mu bikorwa ryihuse binyujijwe mu bigo bya Leta.

Riti “Ni muri urwo rwego ishyirwaho ry’ikigo cya Leta hakoreshejwe itegeko bidasubiza icyifuzo cyo kwihutisha ishyirwa mu bikorwa rya politiki, gahunda n’ingamba bya Leta no kwihutisha itangwa rya serivisi.”

Mu byiciro by’ibigo bya Leta harimo ikigo cya Leta kidakora imirimo y’ubucuruzi n’ikigo cya Leta gikora imirimo y’ubucuruzi. Iyo bigeze ku kigo cya Leta gikora imirimo y’ubucuruzi harebwa ibikiranga, aho bigaragara ko gifite ibikiranga bisa n’ibiranga sosiyete y’ubucuruzi Leta ari yo munyamigabane rukumbi hirengagijwe ko ikigo cya Leta gikora imirimo y’ubucuruzi gihabwa ingengo y’imari iturutse mu isanduku ya Leta, mu gihe gito cyagenwe, kugira ngo kibashe kubungabunga ingengo y’imari yacyo mu gihe gito.

Icyakora, amategeko agenga ibigo bya Leta ntaha ibigo bya Leta bikora imirimo y’ubucuruzi imikorere yoroshye nk’ihabwa amasosiyete y’ubucuruzi, ku buryo bigira ingaruka ku ipiganwa hagati y’ikigo cya Leta gikora imirimo y’ubucuruzi na sosiyete z’ubucuruzi biri mu mirimo imwe y’ubucuruzi, bityo bikabuza ibigo bya Leta bikora imirimo y’ubucuruzi kugera ku ntego zatumye bishyirwaho.

Ibigo bya Leta bikora imirimo itari iy’ubucuruzi bishobora kuba bikora imirimo ibyara inyungu ariko idafatwa nk’iy’ubucuruzi bitewe n’uko iyo mirimo itari mu nshingano z’ibyo bigo.

Aha hatangwa urugero nko ku mashuri ya Leta abona amafaranga atangwa n’abayagana, haba ku masomo y’igihe kirekire cyangwa gito. Muri icyo gihe, iyo mirimo itanga inyungu ntiyishyurirwa imisoro. Ibyo yinjije bikoreshwa mu bikenerwa mu mikorere y’ikigo, bikagabanya umutwaro ku mafaranga atangwa na Leta.

Ku bigo bya Leta byabaga bifite imirimo itari iy’ubucuruzi n’indi y’ubucuruzi, imirimo yabyo y’ubucuruzi izajya ishingirwa sosiyete y’ubucuruzi igengwa n’amategeko agenga za sosiyete z’ubucuruzi haba mu ishyirwaho n’imicungire yazo.

Aha hatangwa urugero ku bigo nka Rwanda Convention Bureau, Rwanda Cooperation Initiative, WASAC, REG, EDCL, EUCL n’ibindi. Ndetse ku kigo nka RSSB na NAEB bigashyirirwaho sosiyete z’ubucuruzi zibishamikiyeho.

Uburyo bushya bwo kubazwa inshingano ku bagize Inama y’Ubuyobozi

Muri iri tegeko, hasobanurwa neza inshingano z’Inama y’Ubuyobozi y’ikigo cya Leta aho abayigize babazwa n’urwego rureberera ikigo cya Leta n’izindi nzego bireba ibijyanye n’inshingano zabo.

Nabo bafite inshingano zo kubaza abagize Urwego Nshingwabikorwa [aribo baba bayoboye ikigo umunsi ku wundi] uburyo buzuza inshingano zabo. Ibi bisubiza ikibazo cyakunze kugarukwaho cyane ko Inama y’Ubuyobozi aba ari abantu barebera gusa kandi ubusanzwe aribo bakwiriye gutanga amabwiriza y’uburyo ikigo kigomba gukora bikakirinda igihombo.

Riteganya ko bitabangamiye ibiteganywa n’amategeko ahana, abagize Inama y’Ubuyobozi bagize uruhare mu micungire mibi y’ikigo cya Leta cyangwa bagiteje igihombo umwe ku giti cye cyangwa bose hamwe, “baryozwa amakosa bakoze”, uretse ugize Inama y’Ubuyobozi wagaragaje mu nama ko atemera icyemezo cyafashwe, bikandikwa mu nyandiko mvugo y’inama y’uwo munsi.

Imicungire mibi y’umutungo mu bigo bya leta bikora ubucuruzi

Raporo y’Umugenzuzi Mukuru w’Imari ya leta igaragaza uko umutungo w’igihugu wakoreshejwe mu 2019, igaragaza ko ibigo bya Leta bikora ubucuruzi byagenzuwe (RSSB, WASAC, BDF, SGF na RPC Ltd) bitacunze neza umutungo “mu gihe ari byo bishyira mu bikorwa porogaramu z’ingenzi z’igihugu zikora ku buzima bw’abaturage”.

Ibigo bya Leta bikora ubucuruzi hamwe n’ibigo binini icumi byagenzuwe, byagaragaye ko byari byihariye 52% by’ingengo y’imari yose y’igihugu yarangiye mu 2019, bingana na miliyari 1406 Frw.

Iyi raporo ivuga ko ibibazo by’imicungire mibi y’umutungo muri ibi bigo byakomeje kudakosoka mu myaka myinshi ishize.

Ubwo yari mu Nteko Ishinga Amategeko, Umugenzuzi Mukuru w’Imari ya Leta, Obadiah Biraro, yabwiye abagize Inteko Ishinga Amategeko ko ikibazo gikomeye mu ikoreshwa ry’umutungo wa Leta, ari imiyoborere n’imicungire ya bimwe mu bigo, bidashyira mu bikorwa inama bigirwa cyangwa ngo bikosore amakosa yagaragajwe ubushize.

Raporo igaragaza ko ibi bigo bitashyize mu bikorwa inama byari byaragiriwe n’umugenzuzi mukuru w’imari ya leta ku kigero 46%.

Ati “Hari uburwayi bwateye ko ibigo bikomeye byakabaye bitanga urugero ahubwo bishaka ko igenzura rikorwa mu buryo babishaka. Barashaka kuduha amabwiriza yabo kandi twe tugendera ku mabwiriza mpuzamahanga. Hakwiriye gukorwa n’igenzura ry’imyitwarire. Ni imico mibi muzareba uko mwakumira.”

Biraro yabwiye IGIHE ibigo uko byaba bimeze kose bigomba kuba bihuriye ku buryo buhamye bwo gucunga umutungo ku buryo icyari kigamijwe kigerwaho. Iyo bigiye mu bucuruzi, bwo yavuze ko biba bigomba kubyara inyungu kandi inshuro nyinshi “ntibyoroha”.

Ati “Ubwo rero iryo tegeko riradushoboza gute, rituzaniye iki kizashimangira ubushobozi bwacu, ubushake, mu kubahiriza amahame yose y’ibigo by’ubucuruzi mu gucunga umutungo wa leta muri ibyo bigo.”

Yavuze ko ubundi iyo umuntu avuze ikigo cy’ubucuruzi, ikintu cya mbere kigomba kumvikana, aba ari inyungu, bityo ko mu gushyiraho itegeko, hakwiye no kurebwa ku bigomba kuba iyo inyungu itabonetse.

Ati “Kuki bitabona inyungu? Ese birashoboka? [...] Iyo inyungu itabonetse bigenda bite? Hari amategeko, hari ikiba cyabiteye, hari ibyo tugomba kuzirikana ku buryo ikintu cyose dukora duhagarara kuri rya hame rya mbere. Iyo bitabonetse bigenda bite?.”

Yavuze ko itegeko ryose ryakorwa, rigomba kuba rigamije gushimangira inshingano abantu bagomba kugira zo kuzirikana ko bagomba kwinjiriza leta amafaranga aho kuyishyira mu bihombo.

Yakomeje agira ati “Uko wabyita kose, niba ari sosiyete icungwa na leta, igomba gukurikiza amategeko yose agenga ibigo by’ubucuruzi kuko ari ibya leta, ubwo twese turimo. Mwese mubaye abanyamigabane. Ubwo rero niba ufite aba bantu bose bakureba, ugomba kurangwa n’imikorere myiza kurusha wa wundi ufite abafatanyabikorwa nka batatu.”

Magingo aya hari ibigo bya leta 12 bikora ubucuruzi.

Minisitiri w’abakozi ba Leta n’umurimo, Kayirangwa Rwanyindo Fanfan, ubwo yasobanuraga ishingiro ry’umushinga w’iri tegeko, yavuze ko igihe ikigo cya leta kibayemo imicungire mibi cyangwa igihombo, abagize inama y’ubuyobozi bazajya baryorezwa hamwe amakosa bakoze.

Muri ibi bigo, leta niwe mugabane rukumbi, ntabwo bizahamagarira abandi bantu kubishoramo imari.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .