Ibigo byigenga bikoresha umubare munini w’abagore bizatangira kubihemberwa mu 2020

Yanditswe na Evariste Nsengimana
Kuya 17 Werurwe 2019 saa 12:33
Yasuwe :
0 0

Umuyobozi w’Ishami ry’Umuryango w’Abibumbye ryita ku bagore mu Rwanda (UN Women-Rwanda), Fatou Lo, yavuze ko guhera umwaka utaha, ibigo byigenga bizaba bikoresha umubare munini w’abagore bizatangira kubihemberwa hagamijwe kongera umubare wabo nk’uko bimeza mu nzego za Leta.

Yabivuze ubwo yifatanyaga n’Umuryango uhuza abagore bakora mu nzego za leta, izigenga n’abikorera ’Career Women’s Network Kigali’ ku wa 16 Werurwe 2019, mu gikorwa cyiswe ’Ishyaka Gala Dinner’.

Umwaka ushize nibwo UN Women ifatanyije n’Urugaga rw’Abikorera (PSF), Urwego rushinzwe iyubahirizwa ry’ihame ry’uburinganire n’ubwuzuzanye (GMO) n’Ishami rya Loni ritsura Amajyambere (UNDP) batangije guhunda yo gushishikariza ibigo byigenga kugabanya icyuho hagati y’abagabo n’abagore.

Iyi gahunda yiswe ‘Gender Equality Seal Certification Programme’ ubuyobozi bwavuze ko yitezweho kongerera ibigo umusaruro, ishoramari n’ibindi, umugore abigizemo uruhare.

Minisitiri w’Ubucuruzi n’Inganda, Soraya Hakuziyaremye, yavuze ko Guverinoma yakoze ibishoboka mu kugabanya icyuho hagati y’abagabo n’abagore mu nzego zifatirwamo ibyemezo.

Umubare w’abagore bari mu Nteko Ishinga Amategeko y’u Rwanda Umutwe w’Abadepite ni 61.25%, abari muri guverinoma ni 58%, mu gihe aba minisitiri wongeyeho abanyamabanga ba Leta, abagore bihariye 50%.

Umuyobozi wa UN Women Rwanda, Fatou Lo, yavuze ko mu bigo bya Leta icyo cyuho cyagabanutse ariko mu byigenga kigihari kandi aribyo bikoresha umubare munini w’abaturage, akaba ariyo mpamvu bashyizeho ubwo bukangurambaga.

Ati “Guca icyo cyuho tuvuga mu bigo bya Leta bikwiye kugera no mu byigenga kuko nk’uko mubizi niho batanga akazi ku mubare munini aho ariho hose ku Isi. Turashaka ko abagore bagira uruhare mu kuzamura ubukungu, bagahagararirwa mu nzego zose.”

Yavuze ko iyo gahunda itagamije kuzamura ubukungu bw’ibyo bigo gusa ahubwo izanatanga ubutumwa bw’uko umugore yubashywe kandi ahabwa agaciro muri gahunda zose.

Ati “Yatangijwe umwaka ushize, ibigo byiyandikishije biri guhugurwa uko biyinjiza muri politiki zabyo, twizeye ko umwaka utaha tuzatangira guhemba ibigo bya mbere byitwaye neza.”

Bizahabwa imidari itandukanye bitewe n’uko bizaba birushanwa mu gushyira mu bikorwa ibikubiye muri iyo gahunda.

Umuyobozi wa Banki ya Kigali, Dr. Diane Karusisi, yavuze ko abagabo n’abagore bakwiye guhabwa agaciro kangana no mu nzego z’ubuyobozi bw’ibigo byigenga bagahagararirwa kuko n’abakiliya babigana barimo abagabo n’abagore.

Ati “Abagore batanga ibyo bafite, ubunararibonye, uburambe, ubuhanga mu mibereho bafite n’ibindi. Ni iby’agaciro kugira ubunararibonye bwabo n’ibitekerezo bitandunye mu bayobozi bagenzura imikorere y’ibigo.”

Umuyobozi wa Career Women’s Network Kigali, Lucy Schalkwijk, yavuze ko buri Werurwe bategura igikorwa cyo guhuza abagore bakora mu nzego zitandukanye kuko ari n’Ukwezi kwabahariwe, bagamije gushakira hamwe uko bongererwa ubushobozi.

Muri uyu muhango hashimiwe ibigo bifite umubare munini w’abagore mu nama z’ubutegetsi bwazo birimo Ecobank ifite 52%, Banki ya Kigali ifite 43% n’Agaciro Development Fund ifite 33%.

Umuyobozi wa Banki ya Kigali, Dr Diane Karusisi, yari mu bitabiriye iki gikorwa
Minisitiri w’Ubucuruzi n’Inganda, Soraya Hakuziyaremye, yavuze ko Guverinoma yakoze ibishoboka mu kugabanya icyuho hagati y’abagabo n’abagore mu nzego zifatirwamo ibyemezo
Umuyobozi wa Career Women’s Network Kigali, Lucy Schalkwijk, yavuze ko buri Werurwe bategura igikorwa cyo guhuza abagore bakora mu nzego zitandukanye
Umuyobozi wa UN Women, Fatou Lo, niwe washyikirije igihembo Banki ya Kigali
Umuyobozi wa Ecobank, Alice Kilonzo, ashyikirizwa igihembo na Minisitiri wa Minicom Soraya Hakuziyaremye
Umuyobozi wa Agaciro Development Fund, Jack Kayonga yashyikirijwe igihembo kuko ikigo ayobora gifite umubare munini w'abagore mu nama y'ubutegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza