Ibigo by’amashuri bisaga 340 byahawe amashanyarazi akomoka ku mirasire y’izuba

Yanditswe na Evariste Nsengimana
Kuya 17 Gashyantare 2020 saa 03:54
Yasuwe :
0 0

Sosiyete y’u Rwanda Ishinzwe Ingufu (REG), igaragaza ko ibigo by’amashuri 341 biri hirya no hino mu gihugu, biherereye kure y’umuyoboro rusange ari byo bimaze guhabwa amashanyarazi akomoka ku mirasire y’izuba mu rwego rwo kubifasha kuva mu kizima no kwihutisha iterambere.

REG igaragaza ko uretse ibyo bigo by’amashuri byahawe aya mashanyarazi hari n’ingo zisaga ibihumbi 20 hirya no hino mu gihugu na zo zitegereye umuyoboro mugari zimaze guhabwa akomoka ku zuba.

Iki gikorwa cyo gukwirakwiza amashanyarazi akomoka ku mirasire y’izuba ku mashuri n’imiryango iherereye kure y’umuyoboro mugari gikubiye mu mushinga uterwa inkunga n’Umuryango w’Ubumwe bw’Ibihugu by’i Burayi (EU), ufite intego yo guha aya mashanyarazi ingo zirenga ibihumbi 49 mu gihugu cyose.

Ni umushinga watangiye gushyirwa mu bikorwa mu mwaka wa 2014, binyuze mu kigo gicuruza ibikoresho bitanga amashanyarazi akomoka ku mirasire y’izuba, Mobisol.

Mu mashuri 341 aherutse guhabwa amashanyarazi akomoka ku mirasire y’izuba, harimo agera kuri 55 yo mu Ntara y’Amajyaruguru, 80 yo mu Burengerazuba, 112 yo mu ntara y’Amajyepfo na 94 yo mu Burasirazuba.

Umuyobozi w’Ikigo cy’Igihugu gishinzwe guteza imbere ingufu (EDCL), gishamikiye kuri REG, Eng. Felix Gakuba, yavuze ko umubare w’abafite ingo mu Rwanda ukomeje kuzamuka kandi ko uyu ari umwe mu mishinga izafasha u Rwanda kugera ku ntego y’amashanyarazi kuri bose.

Ati “Umuryango w’Ubumwe bw’Ibihugu by’i Burayi (EU) n’abandi bafatanyabikorwa badufasha bikomeye mu kugera ku ntego y’amashanyarazi kuri bose. Muri uyu mushinga wo gukwirakwiza amashanyarazi akomoka ku mirasire y’izuba, baduteye inkunga ingana na miliyoni 6 z’ama-euro.”

Ambasaderi uhagarariye Umuryango w’Ubumwe bw’Ibihugu by’i Burayi mu Rwanda, Nicola Bellomo, yavuze ko uyu mushinga ugamije iterambere ari na yo mpamvu wibanze mu bice by’icyaro.

Ati “Intego nyamukuru ni ukugeza amashanyarazi cyane cyane mu bice by’icyaro aho umuyoboro mugari utari wagera. Ibi bizatuma imibereho y’abaturage irushaho kuba myiza cyane cyane abagore n’urubyiruko.”

Amb. Nicola avuga ko uretse kuzamura imibereho y’abahabwa amashanyarazi, uyu mushinga wanatanze akazi ku bantu barenga 200 bityo na bo babasha kwiteza imbere.

Akanyamuneza ku mashuri yavuye mu bwigunge

Umuyobozi wungirije w’Ishuri ribanza rya Karambi mu Murenge wa Nyamata mu Karere ka Bugesera, Mukamabano Emeritha, yabwiye IGIHE ko hashize amezi arenga atatu bahawe amashanyarazi akomoka ku mirasire y’izuba.

Kugeza uyu munsi, iri shuri rifite kuva mu mwaka wa mbere kugera mu wa gatandatu w’amashuri abanza rifite ibyumba bine bicanirwa n’iyi mirasire y’izuba, umuriro ukifashishwa mu bikorwa bitandukanye birimo kumurika, gucaginga telephone bifashisha mu kwigisha n’izabo, gukoresha mudasobwa n’ibindi.

Mukamabano ati “Ni amatara mu by’ukuri adufasha no mu gucunga umutekano hano nijoro haba habona ku buryo byorohereza abashinzwe kuturindira ikigo kuko haba habona kandi natwe iyo dutinze mu kazi dutegura amasomo ntabwo bitugora kuko haba habona.”

Uyu murezi avuga ko telephone zifashishwa mu kwigisha wasangaga mbere y’uko bahabwa aya mashanyarazi bamwe bibasaba kuba bazitahana kugira ngo bazazigarure zirimo umuriro bigatera impungenge ariko uyu munsi ibyo bikaba bitakibaho.

Ati “No mu gihe cyo gukora ubushakashatsi cyangwa igihe abana barimo gusubiramo amasomo mu masaha y’umugoroba aradufasha cyane cyangwa na cya gihe imvura iba iguye, ukaboma mu mashuri haje umwijima, duhita dukanda ku gikuta, hakongera kubona, akazi kagakomeza nta kibazo.”

Niyomucyo Yulke wiga mu mwaka wa kane yabwiye IGIHE ati “Kwigira ahantu habona byatumye tugira uburezi bufite ireme kubera ko hari igihe twageraga nka nijoro bigatuma duhagarika amasomo kuko tutabonaga ikidufasha kubona tugataha hakiri kare ariko ubu tubasha kwiga amasaha yose. Na mugitondo iyo hazindutse ibihu, turayacana bikadufasha, hakongera kubona.”

Mugenzi we witwa Batamuriza Raissa wiga mu wa gatandatu we yagize ati “Aya matara adufasha gusubira mu masomo ku mugoroba, atuma no mu kigo tugira umutekano kandi tukiga neza tugatsinda. Mbere batarayazana, wasangaga iyo bugorobye mwarimu arinda gucana itoroshyi ya telephone yiwe ariko ubu duhita ducana hakabona.”

Umwe muri abo yagize ati “Aya mashanyarazi yaradufashije cyane. Bidufasha gukora raporo. Ubu ntibikiri ngombwa kujya gusharija mudasobwa ahandi, duhita ducomeka tugakora. Ikindi na none amatara yo hanze adufasha nijoro mu burinzi, haba habona bikorohera abazamu.

Ku barimu bigisha Siyansi bavuga ko aya matara abafasha gukoresha ibyuma bisakaza amashusho (projecteur) bikaborohereza kwigisha neza.

REG igaragaza ko magingo aya, amashanyarazi ageze ku baturarwanda basaga 52.8%, bingana n’abafatabuguzi miliyoni 1.4. Barimo abasaga miliyoni imwe bakoresha amashanyarazi yo ku muyoboro mugari (38.5%), n’abarenga ibihumbi 400 (14.3%) bakoresha akomoka ku zindi ngufu.

Abayobozi b'ibigo by'amashuri byahawe amashanyarazi barabyinira ku rukoma
Aya mashuri abasha kumurika hanze n'imbere mu nzu
Batamuriza yavuze ko iyo hatabona bayacana bagakomeza kwiga
Iri shuri rikoresha amashanyarazi akoreshwa n'izuba
Mu mashuri harimo amatara
Mu mashuri iyo haje umwijima bacana amatara
Niyomucyo Yulke yavuze ko amashanyarazi abafasha kwiga
Umuyobozi w'ishuri ryungirije rya Karambi mu Murenge wa Nyamata Mukamabano Emeritha yavuze ko amasomo agenda neza kubera amashanyarazi bahawe
Iri shuri ryashyize amatara ku mbaraza mu rwego rwo kongera umutekano

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .