00:00:00 IGIHE NETWORK KN KINYARWANDA EN ENGLISH FR FRANCAIS

Ibidakunze kuvugwa ku bangavu baterwa inda

Yanditswe na Akayezu Jean de Dieu
Kuya 31 May 2022 saa 12:13
Yasuwe :

Ntabwo twakundanye nk’uko bigenda ku bandi, byabaye igihe kimwe, ni kwa kundi haba hari ibintu mudafite iwanyu, wabona umuntu ugiye kubiguha, ukaba wemeye gutyo […]

Hari nka saa saba ku wa Kabiri tariki 30 Mutarama 2018, Uwase [amazina yahinduwe] wiga mu wa Gatandatu w’amashuri abanza ku ishuri rimwe ryo mu Murenge wa Rubengera, ahagurutse mu rugo arererwagamo na Nyirakuru, agenda nk’ugiye ku ishuri, ageze mu nzira arahindura yekerekeza iwabo w’umusore w’inshuti ye.

Ageze mu gipangu kibamo abantu batandukanye, hari inzu imwe ifite icyumba kimwe n’uruganiriro [Salon] ariko mu ruganiriro nta ntebe zibamo. Umusore bakundana na we ni umunyeshuri mu wa Gatanu w’ayisumbuye ariko birasa n’aho iyo nzu nto [ghetto] ari iyo yatiye mugenzi we.

Mu kuhagera Uwase yahise ahabwa karibu, arebye aho kwicara arahabura, wa musore w’inshuti ye ahita amusaba ko bajya kwicara mu cyumba, ku buriri. Baragiye baricaye batangira kuganira […]. Ibyakurikiyeho nk’abantu bari bicaye ku buriri birumvikana.

Uwase kuri ubu afite umwana w’umukobwa wavutse tariki 26 Ukwakira 2018. Ni ukuvuga ko kugeza ku wa Gatanu tariki 20 Gicurasi 2022, ubwo yaganiraga na IGIHE, uwo mwana we yaburaga amezi atanu gusa ngo yuzuze imyaka ine.

Uwase we afite 20 y’amavuko kuko icyo gihe ubwo yaterwaga inda yari afite imyaka 16, ari umunyeshuri mu mashuri abanza. Uwayimuteye we ngo ntabwo bari baziranye birambuye ku buryo n’izina rye yibuka rimwe ariko ibijyanye n’imyaka yari afite ntiwabimubaza usibye kuba azi ko yigaga mu yisumbuye mu Mujyi wa Karongi.

Uyu wari umukobwa kuri ubu akaba ari umubyeyi w’umwana umwe, aherukana n’umusore wamuteye inda kuri iyo tariki kuko niyo nshuro imwe gusa baryamanye ndetse nyuma y’ukwezi kumwe yamubwiye ko atwite, undi ahita aburirwa irengero kugeza ubu ntabwo arongera kumuca iryera.

Inkuru yagejeje Uwase ku buriri yetereweho inda

Uwase yabanaga na nyirakuru utunzwe n’ubuhinzi ndetse rimwe na rimwe akabona amafaranga make cyane yajyanye ibyo yasaruye ku isoko.

Batuye mu Mudugudu wa Nyarubuye, Akagari ka Gacaca mu Murenge wa Rubengera, Akarere ka Karongi, Intara y’Uburengerazuba.

Uyu muryango ntabwo wabashaga kubona ibikoresho by’ibanze nkenerwa byose kugira ngo Uwase abashe kwiga adafite ibyo yifuza ku bandi, ibi ngo ni byo byatumye umusore wari umunyeshuri mu yisumbuye amushukisha amafaranga bikaza kurangira amuteye inda.

Uwase avuga ko ubwo uwo musore yamusabaga kujya kumusura atabashije kumuhakanira kubera ko yari afite ibyo amukuraho, ikindi ngo bageze no mu gihe cyo gukora imibonano mpuzabitsina, ntabwo yabashije kubyanga kubera ko atari guhakanira umuntu wamuhaye amafaranga ndetse akamugurira na telefone.

Ati “Yabanje kujya ampa amafaranga ariko atambaza ibyo bintu [gukora imibonano mpuzabitsina], nkirirwa ku ishuri mfite amafaranga, ndya icyo nshaka ariko nkumva nta yindi gahunda amfiteho.”

Nubwo byabaga bimeze gutyo ariko ngo Uwase ntabwo yari azi ubwenge ku buryo yavuga ko icyo gihe yakundaga uwo musore gusa ngo yabonaga amuha utwo tuntu akumva ari byiza.

Ati “Ntabwo twakudanye ngo tuvuge ngo twagiye mu rukundo nyine nk’abantu bakundana, byabaye igihe kimwe. Ni kwa kundi ubona hari ikintu mudafite iwanyu, wabona ugiye kubiguha ukaba wemeye gutyo. Ni uko inda njyewe nayitwaye.”

Yakomeje agira ati “Ntabwo byari ibintu birenze cyane, yanguriye telefone, angurira n’ikanzu n’amavuta yo kwisiga, nyine muri iyo minsi nibwo inda nahise nyitwara.”

Ku munsi Uwase yasambanyirijweho yari yavuye ku ishuri mu masaha ya mu gitondo aho kugira ngo asubireyo nyuma ya saa sita ajya kureba uwo musore.

Ati “Nagiye kwiga mu gitondo, hanyuma saa sita sinajyayo ndagenda turahura na we avuye ku ishuri.”

Uwase avuga ko tariki 23 Mutarama 2018, yari yabonye imihango ariko bigeze kuri 23 Gashyantare abona imihango itaje ahita afata icyemezo cyo kujya kwa muganga ari nabwo basanze atwite.

Ubuzima bushaririye nyuma yo gutwita

Kuva umunsi yamenyeyeho ko atwite, Uwase yabanje kubihisha ntiyabibwira Nyirakuru gusa ngo igihe cyarageze biramenyekana ndetse uwo Mukecuru ahita amwirukana muri urwo rugo.

Ati “Bamaze kumenya ko ntwite, ibintu byabaye bibi, mu rugo ndirukanwa ndahava njya mu baturanyi, nkajya mba hamwe ahananiye nkahava, nkajya kuba ahandi kugeza igihe nabyariye, umubyeyi wanderaga afata umwanzuro w’uko nagaruka ariko nabwo atari uko yishimye ari ukubura uko mbigenza. Ubu niho ndi kuba nta kibazo.”

Yavuze ko nyuma yo kumenya ko atwite, yabibwiye uwo musore wayimuteye, akibyumva kuva icyo gihe ngo yahise akuraho telefone ndetse aratoroka.

Ati “Iwabo nahageze rimwe ntwite, nabwo nagiye mpabaririza, ngezeyo nsanga umuhungu ntawe uhari, nta n’ubwo banyakiriye neza ngo bananyijize mu nzu nagumye ku muryango barambwira ngo ntawe uhari.”

Yakomeje agira ati “Uko biri kose byagaragaraga nk’aho babizi [ko umwana wabo yateye inda] kuko barabanje barambwira ngo yagiye muri Kenya, barongera barambwira ngo hari aho yagiye araje, mbona bari kuvuga indimi nyinshi mu isaha imwe. Icyo gihe nafashe inzira ndataha ndetse kuva ubwo naramuretse.”

Uwase ni umwe mu bana b’abangavu benshi bo mu Karere ka Karongi batewe inda muri ubwo buryo kuko hari nka mugenzi we wo mu Kagari ka Nyarusazi, Umurenge wa Bwishyura, we wasambanyijwe ku ngufu ahita atwita none ubu afite umwana w’imyaka ibiri.

Aba ni abaganiriye na IGIHE ariko inkuru yabo iratanga ishusho y’uburemere bw’ikibazo cy’inda ziterwa abangavu kuko nko mu Karere ka Karongi habarurwa abana 454 bazitewe kuva mu 2019 kugeza mu ntangiriro za 2022.

Ni mu gihe muri rusange, Intara y’Iburengerazuba raporo yo ku wa 16 Gicurasi 2022, igaragaza ko kuva uyu mwaka watangira kugeza icyo gihe hari hamaze guterwa inda abangavu 1141.

Ku myaka 16 yatewe inda n'umusore wamushukishije telefone n'amavuta, none ubu yaramubuze uwo musore yahise aburirwa irengero

Guverineri w’Intara y’Uburengerazuba, Habitegeko François yabwiye IGIHE ko iki kibazo cy’abangavu gihangayikishije kandi gikwiye guhagurukirwa n’Abanyarwanda bose.

Yibukije ko ababyeyi ko nabo bafite inshingano zo guha uburere abana, kubigisha indangagaciro zikwiye, kubigisha ibijyanye n’ubuzima bw’imyororokere, kubarinda kujya ahabashyira mu bishuko no kubitaho muri rusange babigisha kunyurwa n’ibyo babagenera.

Ati “Mugomba kubumvisha ko ibyo mutabasha kubabonera kubera ubushobozi, igihugu cyabahaye amahirwe yo kuba babyibonera baramutse bakoze cyane. Babyeyi ,umwana si nk’itungo umuntu ashumura ku gasozi cyangwa ryiragira rikicyura.”

Guverineri Habitegeko yasabye kandi abana b’abakobwa kwirinda ibishuko, irari ry’ibintu kuko bingiriza ejo hazaza, indoto za bamwe zikarangirira aho.

Kwigisha abaterwa inda, bigomba kujyana n’abazibatera

Iyo uganiriye n’abana basambanyijwe by’umwihariko abatewe inda, bagaragaza ko mu bazibatera harimo n’ababa ari abasore bo mu kigero cyabo cyangwa ababarusha imyaka itari myinshi.

Aba bana bagizwe ababyeyi imburagihe bagaragaza ko usanga nta bumenyi buhagije ku bijyanye n’ubuzima bw’imyororokere bityo bagafatiranwa n’abahungu.

Niyigena Josiane wo mu Karere ka Gasabo, avuga ko yatewe inda ari mu mwaka wa gatandatu w’amashuri abanza, bikamuviramo kureka ishuri ariko ngo byose byatewe n’uko nta bumenyi yari afite ku buzima bw’imyororokere.

Ati “Ndasaba ko Leta y’ubumwe yazashinga amahuriro bakigisha abana ku buzima bw’imyororokere byazafasha abashoboraga guterwa inda bakiri bato, kuko hari n’uwo ubaza niba azi ukwezi kwe akakubwira ko atakuzi ariko mu by’ukuri baramutse bigishijwe ubuzima bw’imyororokere, byaba ngombwa ntibasige ba bana b’abahungu bazibatera, kugira ngo na bo bamenye ubuzima bw’imyororokere, basobanukirwe abo ari bo.”

Sarah Mutoniwase w’imyaka 30 avuga ko yatewe inda ari munsi y’imyaka 16 ubwo yari umunyeshuri mu mwaka wa kabiri w’amashuri yisumbuye muri Groupe Officielle de Butare.

Kuri ubu afite umwana wiga mu mashuri yisumbuye, na we yaje kugira amahirwe arangiza ayisumbuye ndetse ubu yanashinze umuryango ufasha abana b’abakobwa batewe inda.

Kuri we, asanga imbaraga zishyirwa mu kwigisha abakobwa bakiri bato ubuzima bw’imyororokere, zajya zinashyirwa mu kwigisha basaza babo b’abahungu.

Ati “Dushyira imbaraga cyane mu kwigisha abana b’abakobwa ibijyanye n’ubuzima bw’imyororokere nyamara ntabwo tumenya ababatera inda, kandi ababatera inda ni abana b’abahungu. Kuki bariya bahungu tutabigisha ubuzima bw’imyororokere? Umuti w’ikibazo turimo kwiga, tujye no kuwigisha na bariya bana b’abahungu”.

Mutoniwase akomeza agira ati “Imbaraga nyinshi hano mu gihugu tuzishyira ku bana b’abakobwa, ariko hari abantu bazitera. Mu by’ukuri ndabasaba nk’abayobozi mushyiremo imbaraga na bo bigishwe ku buzima bw’imyororokere”.

Urugamba rwo guta muri yombi inkoramahano…

Bamwe muri aba bana batewe inda bagaragaza ko uretse kuba ababateye inda barabashutse cyangwa bakabafata ku ngufu ariko nyuma yo kubakorera ayo marorerwa bahita batoroka, bamwe bakaburirwa irengero.

Ku rundi ruhande ariko Urwego rw’Igihugu rw’Ubugenzacyaha (RIB), rukomeje gushyira imbaraga mu gukangurira ababyeyi n’aba basambanyijwe kudahishira abakoze ayo mahano.

Ibi nibyo byatanze umusanzu wo kuba imibare y’uru rwego igaragaza ko mu myaka itatu ishize abagabo bamaze gufatwa bagakurikiranwaho gusambanya abana b’abakobwa ari 13.201.

Minisitiri w’Uburinganire n’Iterambere ry’Umuryango Prof. Jeannette Bayisenge, aherutse kubwira IGIHE ko uku kwiyongera kw’imibare y’abasambanya abana n’ababatera inda yazamutse kubera impamvu zitandukanye.

Ati “Imibare yerekana ko inda zagabanutse kuva kuri 7,3% mu mwaka wa 2015, zikagera kuri 5,2% muri 2020, kubera guhuriza hamwe serivisi, muri Isange One Stop Center, no gukora ubukangurambaga mu baturage byatumye barushaho kumenya no gusobanukirwa byinshi ku ihohoterwa rishingiye ku gitsina kandi ubutabera bugahabwa abahohotewe nk’uko bigaragazwa n’imibare y’ibirego byakirwa na RIB mu myaka itatu ishize”.

Guverineri Habitegeko we avuga ko abagabo cyangwa abasore bangiza abana bakwiye kumenya ko ijisho ry’ubutabera ribareba kandi na mbere y’ubutabera bakwiye kwirinda kwangiza abana b’u Rwanda rw’ejo hazaza.

Guverineri Habitegeko yibukije abasambanya abana ko ijisho ry'ubutabera ribareba aho baba bari hose
Minisitiri w’Uburinganire n’Iterambere ry’Umuryango, Prof. Bayisenge Jeannette, avuga ko ari ishyano kubona abana basambanywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .