00:00:00 IGIHE NETWORK KN KINYARWANDA EN ENGLISH FR FRANCAIS

Ibidakunda kuvugwa ku bayobozi ba FDLR, baba mu mashyamba imiryango yabo iri ahashashe

Yanditswe na Mwene Ndabarasa
Kuya 4 Mutarama 2023 saa 09:21
Yasuwe :

Nyuma y’urugamba rwo guhagarika Jenoside yakorewe Abatutsi, ingabo z’abicanyi zahungiye mu bihugu bitandukanye cyane cyane Repubulika Iharanira Demokarasi ya Congo yitwaga Zaïre icyo gihe, ariko hari n’abandi bahungiye i Burundi no muri Tanzania.

Abahoze muri FAR n’Interahamwe bakigera muri Congo barisuganyije, dore ko batambuwe intwaro bahunganye, kugira ngo bazongere batere u Rwanda. Kuri bo guhungira muri Congo byari ukwisuganya by’igihe gito.

Kuva muri Nyakanga 1994 bagiye bashyiraho imitwe itandukanye yaje kuba FDLR mu mwaka wa 1999, ikiriho muri iki gihe nubwo igenda icikamo ibice.

Kuri iyi nshuro turagaruka ku mayeri y’abayobozi bakuru ba FDLR, baba mu mashyamba bitwaje ko barwanira gucyura impunzi, kandi imiryango yabo hafi ya yose yibereye mu Rwanda.

FDLR yashinzwe isimbuye icyiswe ALiR (Armée pour la libération du Rwanda) izwiho kugaba ibitero mu Rwanda mu ntambara yiswe iy’abacengezi hagati ya 1997 na 1998.

Ubwo abacengezi bari bibumbiye muri ALiR bakubitwaga inshuro n’Ingabo z’u Rwanda bahise basubira muri Congo-Kinshasa bisabwe n’umukuru wabo Maj Gen Paul Rwarakabije.

Rwarakabije yabaye umuyobozi mukuru wa ALiR nyuma y’aho abasirikare bakuru ba ALiR biciwe ku rugamba aribo Col Leonard Nkundiye wiciwe muri Giciye muri Kanama 1998 nyuma y’iminsi 15 uwari wamusimbuye ariwe Lt Col Dr Flodouard Mugemanyi yicirwa ahitwaga Nyarutovu, ubu ni mu Karere ka Gakenke.

Nyuma y’aho Maj Gen Rwarakabije wari ukuriye ingabo za FDLR atahiye mu Rwanda, FDLR yahise iyoborwa na Lt Gen Mudacumura wishwe tariki ya 19 Nzeli 2019.

Lt Gen Sylvestre Mudacumura

General Sylvestre Mudacumura yari azwi ku mazina ya Bernard Mupenzi, Mudac cyangwa Pharaoh, izina yakoreshaga ubwo yari ayoboye ingabo za Congo mu ntambara ya Pweto muri 1999, aho ingabo za Congo zari zihanganye n’inyeshyamba za RCD zari zishyigikiwe n’u Rwanda.

Yavukiye mu yahoze ari Segiteri Gatumba, Komine Kibilira ku babyeyi bitwa Mukanda na Nibagwire.

Mbere ya 1994, yari umukuru wa Batayo ya 31 yari izwi nka Batayo Rutare yabaga ahitwa muri Rutare muri Byumba/Gicumbi. Mu rugamba rwo guhagarika Jenoside no kubohora igihugu, yahunze amaze gutsindwa urugamba ku musozi wa Jali.

Umugore we Goretti Nyirabakunzi yagarutse mu Rwanda muri 1996 nyuma yo gusenya inkambi z’impunzi, aherekejwe na bashiki ba Mudacumura babiri.

Yabaye mu Rwanda igihe kirekire, ubu akorana n’Umuryango utegamiye kuri Leta aho aba mu Bufaransa.

Mudacumura yize mu ishuri ribanza rya Gatumba, ayisumbuye ayiga mu Iseminari Nto ya Nyundo. Nyuma yaje kwinjira mu ishuri rikuru rya gisirikari ESM, asohoka afite ipeti rya Sous-Lieutenant

Yahise ajya kwiga mu Budage, agaruka ajya mu basirikare barindaga Perezida Habyarimana, akaba yari ashinzwe ibikorwa bya gisirikare muri uwo mutwe.

Tariki ya 31 Ukwakira 1996, mbere gato y’uko inkambi z’impunzi muri Zaïre zisenywa, yari mu nama yateguraga ibikorwa bya gisirikare.

Ingabo zari ziyobowe na Laurent Desire Kabila ubwo zakuragaho Perezida Mobutu See Seko, Mudacumura n’abandi basirikare bahungiye muri Centrafrique aho yakoze nk’umuntu ushinzwe umutekano ku ihahiro (Supermarket).

Muri icyo gihugu yarafashwe, afungwa akekwaho gufasha abari mu mugambi wo guhirika Perezida Ange-Félix Patassé, arekurwa kubera ubuvugizi bwa Perezida Laurent Desire Kabila.

Yavuye muri Centrafrique muri 1999 kugira ngo ajye kwihuza na Col Ntiwiragabo na Lt Col Renzaho Tharcisse bari bari kurwanira Perezida Laurent Desire Kabila, ubwo yari ahanganye n’inyeshyamba za RCD mu ntambara yari yatangiye muri Kanama 1998.

Mudacumura ari mu batangije FDLR, akaba yaranabaye umukuru wayo nyuma y’aho Maj Gen Paul Rwarakabije atahiye mu Rwanda.

Mudacumura yari azwiho kuba mu myaka 27 yari amaze mu mashyamba, nta muntu wigeze amufotora, akaba nta munyamakuru bigeze babonana.

Yemeje ko nta wundi yakumvira usibye Habyarimana. Ingengabitekerezo ya Jenoside yo kwanga Abatutsi iri muri FDLR ishamikiye kuri Mudacumura, kuko ntiyigeze ahisha urwango abafitiye.

Mudacumura yari umuntu wa hafi wa Habyarimana

Brigadier-General Gaston Iyamuremye

Brigadier-General Gaston Iyamuremye, alias Rumuli DOB, ubu ni we Perezida wa FDLR. Yavukiye mu cyitwaga Segiteri Mubuga, Komini Nyakinama, ubu ni mu karere ka Musanze.

Ababyeyi be ni Stanislas Muhetsi bakundaga kwita Rusazi na Anastasie Mpongano. Mu ngabo zatsinzwe yari umukuru wa batayo yari ishinzwe ibikoresho bya gisirikare. Ingabo yayoboraga zimwe zabaga mu kigo cya gisirikari cya Kanombe, izindi mu kigo cya Camp Kigali.

Umugore we aba mu karere ka Rulindo aho akora umwuga w’ubwarimu, bafitanye abana babiri, akaba anafite mushiki we utuye mu murenge wa Muko. Iyamuremye yize amashuri abanza ahitwa ku Kimonyi muri Nyakinama.

Amashuri yisumbuye yayize kuri College St. André i Kigali, nyuma akomereza amashuri mu gihugu cy’u Bubiligi aho yarangije ari Enjeniyeri mu by’amashanyarazi (Electrical Mechanical Engineer).

Iyamuremye azwiho kugira ingengabitekerezo ya Jenoside ikabije, ku buryo iyo ari imbere y’abasirikari ababwira ko ari batoya batazi ubugome bw’Abatutsi, kandi ko bagomba kumwumva.

Nubwo umugore we aba mu Rwanda, Gaston Iyamuremye yarahiye ko atazataha mu Rwanda yita ko ruyobowe n’Abatutsi.

Maj Gen Pacifique Ntawunguka, alias Omega cyangwa Nzeli na Israel

Maj Gen Omega yavukiye mu yahoze ari Komine Gaseke, Perefegitura ya Gisenyi, ku babyeyi bitwa Balihenda na Nyirabalima.

Mu 1994, Omega yari umukuru wa batayo ya 94 yari ishinzwe ibikorwa bya gisirikari muri Muvumba mu Mutara. Mu gihe cya Jenoside yabarizwaga mu kigo cya Mukamira, aho ingabo ze zishe Abatutsi ahazwi nka Mukamira na Jenda.

Omega yigiye amashuri yisumbuye muri Christ Roi i Nyanza, nyuma ajya mu ishuri rikuru rya gisirikari, ESM. Nyuma yakomeje amahugurwa mu Misiri, mu Bugereki no mu Bufaransa.

Omega azwiho kutavuga rumwe na Lt Gen Mudacumura wari ukuriye ingabo za FDLR, akaba azwiho gusenga cyane muri Kiliziya Gatolika, ngo akazataha mu Rwanda nta mututsi ukirurimo, nubwo abana be babiri bari mu Rwanda, aho bishyurirwa amashuri na Leta y’u Rwanda.

Mu byo Mudacumura yapfaga na Ntawunguka ni amasengesho akabije yayoborwaga n’uwitwa Muzimangane.

Brigadier-General Appolinaire Hakizimana, alias Amikwe Lepic/Poète

Brigadier-General Appolinaire Hakizimana alias Amikwe Lepic/Poète, azwi ku rindi zina rya Bagenzi. Yavukiye mu yahoze ari Komini Karago, kuri Enock Kalimunda na Nyirampozembizi.

Mu kwezi gushize umutwe wa M23 wafashe abarwanyi n’abanyapolitiki ba FDLR, maze uwitwa Innocent Uwamungu wabaga mu biro bya Gen Pacifique Ntawunguka ababwira abayobozi bakomeye ba FDLR.

Yagarutse kuri Brigadier-General Appolinaire Hakizimana, alias Amikwe Lepic/Poète.

Mbere ya 1994 yari Major muri Jandarumori akuriye batayo ya 53 muri Byumba, aho mu gihe cya Jenoside yahise ashyirwa mu iperereza rya jandarumori, ku cyicaro gikuru ku Kacyiru.

Umugore we aba ku Gisenyi aho ari umwarimukazi mu mashuri yisumbuye. Nyina yapfuye mu 2008 azize uburwayi busanzwe. Abandi bo mu muryango we batuye ku musozi wa Rugogwe.

Hakizimana yize amashuri abanza i Rambura, naho ayisumbuye ayiga kuri College Inyemeramihigo no mu mu Byimana.

Yinjiye mu ishuri rikuru rya gisirikari, ESM, muri Kigali, akomereza amashuri mu Bufaransa no mu Bubiligi. Yagize imirimo itandukanye muri FDLR, aho yanabaye Komiseri ushinzwe umutekano.

Brig Gen Poete na we ari mu bantu bari inyuma y’umugambi wa Jenoside mu mujyi wa Kigali, nk’umuntu wakoraga mu iperereza. Ari ku rutonde rw’abashakishwa.

Major-General Stanislas Nzeyimana, alias Bigaruka cyangwa Izabayo Déo

Maj Gen Stanislas Nzeyimana wari uzwi ku izina rya Bigaruka, bivugwa ko yitabye Imana.

Umugore we na we yari umusirikari yitwa Maj Godelive Mukamanzi, na we yabaga muri FDLR kugeza igihe yimukiye ajya i Kigoma muri Tanzania, aho arerera abana be. Avuka mu yahoze ari Komini Karago, akaba yarakoraga ku Kibuga cy’indege cya Kanombe.

Nzeyimana avuka mu yahoze ari Komini Mugusa, ubu ni mu karere ka Gisagara mu Ntara y’Amajyepfo.

Mu ntangiriro za 1990, Nzeyimana yabarizwaga muri batayo ya Huye, ariko yahise yoherezwa mu mutwe w’abarindaga umukuru w’igihugu. Muri 1993 yoherejwe mu mahugurwa mu Bufaransa. Yagarutse ingabo za Habyarimana zaratsinzwe, ahita azisanga mu nkambi muri Congo.

Nubwo Nzeyimana atari mu Rwanda mu gihe cya Jenoside, yagize uruhare runini mu ntambara y’abacengezi yahitanye ibihumbi by’inzirakarengane hagati ya 1997-1998, aho yari akuriye abacengezi bakoreraga mu makomine yari akikije Nyabarongo. Aha twavuga nka Bulinga, Nyakabanda, Kivumu, Ramba na Kibilira.

Abacengezi bamaze gukubitwa inshuro, bamaze guhungira muri Congo, yagizwe Komiseri ushinzwe ibikorwa bya gisirikari no gushaka abarwanyi , nyuma aza gukurira abarwanyi bose babaga muri Kivu y’Amajyepfo.

Nyuma kubera impamvu z’uburwayi, yoherejwe mu gihugu cya Tanzania, aho bivugwa ko yaburiwe irengero.

Brigadier-General Léodimir Mugaragu, alias Léo Manzi

Gen Mugaragu bikekwako yishwe mu mwaka wa 2012, yishwe na Mai Mai Guido.

Gen Mugaragu yavukiye mu yahoze ari Segiteri Rutenderi mu yari Komini Tare, ubu ni mu karere ka Rulindo. Ni we wari ukuriye batayo ya 32 yabaga muri Camp Muhoza mu mujyi wa Musanze.

Umugore wa Mugaragu yapfuye muri 1999, naho abana be bane bigiye Kaminuza i Lubumbashi. Bashiki ba Mugaragu babiri bakora ubucuruzi ahitwa ku Rushashi.

Yigiye amashuri abanza ahitwa Mbogo, nyuma yiga ayisumbuye i Kabgayi mbere yo kujya mu ishuri rikuru rya gisirikari rya ESM.

Nyuma yakomereje amahugurwa mu Bubiligi mu bijyanye n’itumanaho. Akigaruka mu Rwanda yagizwe umukuru w’ishami rishinzwe itumanaho mu ngabo z’u Rwanda.

Jenoside yakorewe Abatutsi yabaye Mugaragu ari mu Ruhengeli, aho yagize uruhare rukomeye muri Jenoside yakorewe abatutsi.

Yakwirakwije intwaro mu nterahamwe, akaba yarasuraga bariyeri ndetse akaba yaratoje Interahamwe.’

Yaragize uruhare runini mu iyicwa ry’Abatutsi bari bahungiye ku Rukiko rw’Ubujurire rwa Ruhengeli. Ubu bwicanyi Mugaragu yabuteguranye na Lt Col Marcel Bivugabagabo, wahungiye mu Bufaransa.

Mugaragu yagize uruhare runini mu gushinga FDLR afatanyije na Maj Faustin Ntilikina.

Mugaragu ni we wayoboye ingabo za Ex FAR zahungiye muri Congo Brazzaville, zaje gufasha Kabila mu guhangana n’umutwe wa RCD.

Kimwe na Mudacumura, bahanganye n’ingabo za RCD zari zishyigikiwe n’ingabo z’u Rwanda. Mu mwaka wa 2005 yabaye umugaba w’ingabo za FDLR.

Muri iki gihe Leta ya Congo ivuga ko FDLR batarenze abantu 500, ukibaza umutwe w’ingabo ufite abajenerali barenga 10 uburyo bayobora abasirikari batageze kuri 500. Tuzakomeza kubagezaho amakuru yo muri FDLR.

Ntawunguka aheruka kugirwa umuyobozi wa FDLR FOCA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .