Ibiciro bishya byo gusuzumisha ibinyabiziga byakubwe kabiri

Yanditswe na Evariste Nsengimana
Kuya 15 Gashyantare 2020 saa 04:28
Yasuwe :
0 0

Ibiciro byo gusuzuma ibinyabiziga, ibizwi nka Contrôle Technique, byazamuwe byikuba inshuro ebyiri ndetse n’amapikipiki atasuzumwaga akaba agiye kujya asuzumwa.

Izi mpnduka zigaragara mu iteka rya Minisitiri n° 001/20/Minicom ryo ku wa 13/02/2020 rishyiraho igiciro ntarengwa cyo kugenzura imiterere y’ikinyabiziga, ryasohotse mu mu igazeti ya Leta nimero idasanzwe yo ku wa 13 Gashyantare 2020.

Iri teka ryasimbuye Iteka rya Minisitiri n° 08/10/Minicom ryo ku wa 28/10/2010 rishyiraho ibiciro ntarengwa byo kugenzura imiterere y’ibinyabiziga.

Iteka rishya rigaragaza ko ipikipiki ifite cyangwa idafite intebe ku ruhande n’ikinyabiziga cy’amapine atatu kitarengeje ibiro 500 igiciro cy’isuzuma rya mbere n’irya kabiri hatabariwemo imisoro ari 6000Frw mu gihe iteka ryari risanzwe rigaragaza ko byari 3000Frw (ariko ntiryakorwaga kubera ko nta bikoresho).

Isuzuma rihinyuza rikorwa bitarenze ibyumweru bibiri uhereye, igihe isuzuma ryabereye. Iri teka rishya risobanura ko ipikipiki izajya yishyurirwa 1200Frw kuri iri suzuma mu gihe iteka ryari risanzwe ryateganyaga 600Frw.

Risobanura ko isuzuma rya mbere rizajya rikorwa mu mezi atandatu ya mbere uhereye igihe yatangiye kugenda mu muhanda mu gihe irya kabiri ari buri mwaka.

Isuzuma rya mbere n’irya kabiri ku modoka zakorewe gutwara abantu zitarengeje uburemere bwa toni eshatu n’igice kandi zifite imyanya itarenga umunani yo kwicarwamo, hatabariwemo uw’umuyobozi ryavanywe ku bihumbi 10Frw rishyirwa kuri 20.000Frw mu gihe irihinyuza ryavanywe ku 2000Frw rigashyirwa kuri 4000Frw.

Iri teka rigaragaza ko isuzuma rya mbere n’irya kabiri ry’imodoka zakorewe gutwara abantu mu buryo bwishyura cyangwa zikora indi mirimo y’ubucuruzi, zitarengeje uburemere bwa toni eshatu n’igice kandi zifite imyanya umunani yo kwicarwamo, hatabariwemo uw’umuyobozi ryavanywe ku bihumbi 10Frw rigashyirwa kuri 20 000Frw mu gihe irihinyuza ryavanywe kuri 2000Frw rigashyirwa kuri 4000Frw.

Isuzuma rya mbere n’irya kabiri ku modoka zakorewe gutwara ibintu zifite uburemere ntarengwa bwa toni eshatu n’igice ryavuye ku bihumbi 15Frw rishyirwa kuri 30.000Frw mu gihe irihinyuza ryavanywe kuri 3000Frw rigashyirwa kuri 6000Frw.

Imodoka zakorewe gutwara ibintu zifite uburemere ntarengwa bwa toni eshatu n’igice kandi zitarengeje imitambiko ibiri, isuzuma rya mbere n’irya kabiri ryavanywe ku bihumbi 20Frw bishyirwa kuri 40.000Frw mu gihe irihinyuza ryavanywe kuri 4000Frw rigashyirwa ku 8000Frw.

Imodoka zakorewe gutwara ibintu zifite uburemere ntarengwa bwa toni eshatu n’igice, kandi zirengeje imitambiko ibiri, isuzuma rya mbere ry’irya kabiri ryavanywe ku bihumbi 25Frw rishyirwa kuri 50 000Frw mugihe irihinyuza ryashyizwe ku 10 000Frw rivanywe kuri 5000Frw.

Imodoka zikurura kandi zifite uburemere ntarengwa bwa toni eshatu n’igice kandi zitarengeje imitambiko ibiri, isuzuma rya mbere n’irya kabiri ryavanywe kuri 15000Frw rishyirwa kuri 30.000Frw mu gihe irihinyuza ryavanywe kuri 3000Frw rigashyirwa kuri 6000Frw.

Imodoka zikurura kandi zifite uburemere burengeje toni eshatu n’igice kandi zirengeje imitambiko ibiri, isuzuma rya mbere n’irya kabiri ryavanywe kuri 25 000Frw rishyirwa kuri 50 000Frw mu gihe irihinyuza ryavanywe kuri 5000Frw rigashyirwa ku 10.000Frw.

Isuzuma rya mbere n’irya kabiri ku modoka zagenewe gutwara abantu kandi zifite imyanya 18 yo kwicarwamo utabariyemo uw’umuyobozi ryavanywe ku bihumbi 15Frw rishyirwa kuri 30.000Frw mu gihe irihinyuza ryavanywe kuri 3000Frw rigashyirwa kuri 6000Frw.

Imodoka zagenewe gutwara abantu kandi zifite hagati y’imyanya 25 na 30 utabariyemo uw’umuyobozi, isuzuma rya mbere n’irya kabiri ryavanywe ku bihumbi 20Frw rishyirwa kuri 40.000Frw mu gihe irihinyuza ryavanywe kuri 4000Frw rigashyirwa ku 8000Frw.

Imodoka zagenewe gutwara abantu kandi zifite imyanya 30 utabariyemo uw’umuyobozi, isuzuma rya mbere n’irya kabiri ryavanyuwe ku bihumbi 25Frw rishyirwa kuri 50.000Frw mu gihe irihinyuza ryavanywe kuri 5000Frw rigashyirwa ku 10.000Frw.

Rumoroki cyangwa makuzungu ifite uburemere ntarengwa bwa toni eshatu n’igice, isuzuma rya mbere n’irya kabiri ryavanywe kuri 5000Frw rishyirwa ku 10.000Frw mu gihe irihinuza ryavanywe ku 1000Frw rigashyirwa kuri 2000Frw.

Isuzuma rya mbere n’irya kabiri kuri Rumoroki cyangwa makuzungu ifite uburemere ntarengwa bwa toni eshatu n’igice kandi ifite imitambiko itarengeje ibiri ryavanywe kuri 15.000Frw rishyirwa kuri 30.000Frw mu gihe irihinyuza ryavanywe kuri 3000Frw rigashyirwa kuri 6000Frw.

Isuzuma rya mbere n’irya kabiri kuri Rumoroki cyangwa makuzungu bifite uburemere burengeje toni eshatu n’igice kandi bifite imitambiko irengeje ibiri ryavanywe kuri 30.000Frw rishyirwa kuri 60.000Frw mu gihe irihinyuza ryavanyuwe kuri 6000Frw rigashyurwa kuri 12.000Frw.

Ibinyabiziga byagenewe gutwara ibikoresho by’ubutabire n’ibishobora kugurumana bifite uburemere ntarengwa bwa toni eshatu n’igice, isuzuma rya mbere n’irya kabiri ryavanywe kuri 15.000Frw rishyirwa kuri 30 000Frw mu gihe irihinyuza ryavanywe kuri 3000Frw rigashyirwa kuri 6000Frw.

Isuzuma rya mbere n’irya kabiri ku binyabiziga byagenewe gutwara ibikoresho by’ubutabire n’ibishobora kugurumana bifite uburemere burengeje toni eshatu n’igice kandi bifite imitambiko itarengeje ibiri ryavanywe ku bihumbi 20Frw rishyirwa kuri 40.000Frw mu gihe irihinyuza ryavanyuwe kuri 4000Frw rigashyirwa ku 8000 Frw.

Ku binyabiziga byagenewe gutwara ibikoresho by’ubutabire n’ibishobora kugurumana bifite uburemere burengeje toni eshatu n’igice kandi bifite imitambiko irengeje ibiri, isuzuma rya mbere n’irya kabiri ryavanywe ku bihumbi 30Frw rishyirwa kuri 60000Frw mu gihe irihinyuza ryavanywe kuri 6000Frw rigashyirwa kuri 12.000Frw.

Ibinyabiziga by’ubutabazi bifite uburemere butarengeje toni eshatu n’igice, isuzuma rya mbere n’irya kabiri ryavanywe ku bihumbi 10Frw rishyirwa kuri 20.000Frw mu gihe irihinyuza ryavanywe kuri 2000Frw rigashyirwa kuri 4000Frw.

Ibinyabiziga by’ubutabazi bifite uburemere burengeje toni eshatu n’igice kandi bifite imitambiko itarengeje ibiri, isuzuma rya mbere n’irya kabiri ryavanywe kuri 15000Frw rishyirwa kuri 30.000Frw mu gihe irihinyuza ryavanywe kuri 3000Frw rigashyirwa kuri 6000Frw.

Ibinyabiziga by’ubutabazi bifite uburemere burengeje toni eshatu n’igice kandi birengeje imitambiko ibiri, isuzuma rya mbere n’irya kabiri ryavanywe kuri 15000Frw rishyirwa kuri 30000Frw mu gihe irihinyuza ryavanywe kuri 3000Frw rigashyirwa kuri 6000Frw.

Isuzuma rya mbere n’irya kabiri ku zindi mashini zikora mu mirimo itandukanye ryavanywe ku 30 000Frw rishyirwa kuri 60000Frw mu gihe irihinyuza ryavanywe kuri 6000Frw rishyirwa kuri 12000Frw.

Igenzura rya mbere n’irya kabiri ku nyandikonshungu ya Vinyeti y’igenzura ry’ibinyabiziga n’icyemezo cy’igenzura ryavanywe kuri 5000Frw rishyirwa ku 10.000Frw, nta genzura rihinyuza rikorwa.

Izi mpinduka zibaye nyuma y’uko Guverinoma ishyizeho uburyo budasanzwe bwo gukusanya amafaranga yo kunganira Mutuelle de Santé nabwo buteganya ko hari amafaranga azajya atangwa na Polisi, avuye mu yo yinjiza mu bijyanye no gusuzuma ibinyabiziga.

Ni uburyo buteganya ahantu hatandukanye harimo ibigo bya Leta, ibihano n’ahandi.

Inkunga y’ubwisungane mu kwivuza itangwa na Leta

Iri teka rivuga ko ku mafaranga azajya aturuka muri Leta, iri teka rigaraaza ko miliyari 6Frw azajya aturuka mu ngengo y’imari y’umwaka, yishyurwa na Minisiteri ifite imari mu nshingano zayo.

Iri teka risobanura ko buri mwaka Minisiteri ifite imari mu nshingano zayo izajya itangira 3.000 Frw buri muntu utishoboye uri mu cyiciro cya mbere cy’Ubudehe.

Ku mafaranga yishyurwa ku iyandikwa ry’imiti n’ibikoresho byo mu buvuzi, yishyurwa na Minisiteri ifite ubuzima mu nshingano zayo, 50% azajya nayo agenerwa kunganira Mutuelle de Santé mu gihe amafaranga yose(100%) yishyurwa n’abakora ubushakashatsi mu rwego rw’ubuzima nayo azajya agenerwa kuyunganira.

Iri teka rigaragaza kandi ko 10% by’amafaranga acibwa kuri serivisi zihabwa amasosiyete y’ubucuruzi akora ibikorwa by’imikino y’amahirwe azwi nka Betting, yishyurwa Minisiteri ifite ubucuruzi mu nshinga nayo azajya agenerwa kunganira ubu bwishingizi.

Iri teka risobanura ko 50% by’amafaranga yose atangwa mu kugenzura imiterere y’ibinyabiziga ‘Contrôle Technique’ ndetse na 10% acibwa abakoze amakosa mu muhanda, asanzwe yishyurwa Polisi y’igihugu nayo agiye kujya agenerwa kunganira Mutuelle de Santé.

Hari kandi amafaranga asanzwe acibwa abacuruza ibintu bitujuje ubuziranenge, yishyurwa ikigo cya Leta gifite ubuziranenge mu nshingano zacyo iri teka risobanura ko yose(100%) agiye kujya yunganira ubu bwishingizi ndetse n’amafaranga 100Frw ava ku mahoro yakwa kuri parikingi z’ibinyabiziga kuri buri saha imwe bihagaze, yishyurwa n’Umujyi wa Kigali.

Iri teka rigaragaza inkomoko y’amafaranga yunganira ubu bwishingizi rinagaragaza ko 0.5% by’umushahara umukozi atahana, yishyurwa n’umukoresha ndetse na (10%) by’amafaranga ava mu bukerarugendo agenewe uturere bireba, yishyurwa n’Urwego rushinzwe Iterambere mu Rwanda (RDB) agiye kugenerwa ubu bwishingizi.

Hari kandi ibihumbi 20Frw asanzwe ava mu ihererenywa ry’imodoka yaguzwe n’ibihumbi 10Frw kuri moto asanzwe yishyurwa n’ikigo cy’imisoro n’amahoro nayo agiye kuzajya yunganira ubu bwishingizi.

Rivuga ko 4.000Frw kuri hegitari imwe y’ubutaka bw’igishanga na 5.000Frw kuri hegitari imwe y’ubutaka bw’imusozi na 2.000Frw kuri hegitari imwe y’amaterasi y’indinganire, yishyurwa n’Akarere bireba azajya agenerwa kunganira ubu bwishingizi.

Iri teka rivuga ko uretse inkunga ya Leta igenewe abatishoboye itangwa bitarenze tariki ya 30 Nzeri buri mwaka, inkunga ya Leta ivugwa muri iyi ngingo itangwa buri gihembwe.

Inkunga ituruka mu bigo bitanga ubwishingizi bw’indwara

Ingingo ya gatatu y’iri teka ivuga ko hari Inkunga ituruka mu bigo bitanga ubwishingizi bw’indwara aho buri kigo gitanga ubwishingizi bw’indwara gikorera mu Rwanda kizajya gitanga 5% y’imisanzu yose yinjijwe mu mwaka mu ishami ryacyo ry’ubwishingizi bw’indwara.

Icyakora, inkunga itangwa n’Ikigo cya Leta gifite ishami ry’ubwishingizi bw’indwara mu nshingano zacyo izajya iba ari 10% by’imisanzu cyinjije mu mwaka wose.

Iri teka rivuga ko inkunga itangwa na buri kigo gitanga ubwishingizi bw’indwara mu Rwanda igezwa mu kigo cya Leta gifite ubwisungane mu kwivuza mu nshingano zacyo mu minsi 30 nyuma y’itariki umwaka y’ibaruramari ry’ikigo gitanga ubwishingizi bw’indwara warangiriyeho.

Iri teka rigaragaza ko hari n’inkunga izajya itangwa na sosiyete z’ubucuruzi bw’itumanaho n’zi’ubw’ibikomoka kuri peteroli izajya igenerwa kunganira Mutuelle de Santé.

Rivuga ko umwaka wa mbere n’uwa kabiri uhereye igihe iri teka ritangarijweho mu Igazeti ya Leta ya Repubulika y’u Rwanda, amafaranga 2.5% y’agaciro k’ibyacurujwe byose ku mwaka n’isosiyete y’ubucuruzi bizajya byunganira ubu bwishingizi naho guhera ku mwaka wa gatatu iri teka ritangajwe mu Igazeti ya Leta ya Repubulika y’u Rwanda, amafaranga 3% y’agaciro k’ibyacurujwe byose ku mwaka n’isosiyete y’ubucuruzi ariyo azajya abwunganira.

Buri sosiyete y’ubucuruzi bw’ibikomoka kuri peteroli yishyura inkunga mu bwisungane mu kwivuza ingana n’amafaranga 20Frw kuri buri litiro y’ibikomoka kuri peteroli igurishije nayo azajya yunganira ubu bwisungane mu kwivuza mu gihe buri sosiyete y’ubucuruzi bw’itumanaho cyangwa bw’ibikomoka kuri peteroli ishyikiriza.

Ikigo cya Leta gifite ubwisungane mu kwivuza mu nshingano zacyo nicyo iri teka riha ububasha bwo gukora igenzura rigamije kumenya ko inkunga yishyuwe yabazwe uko biteganywa.

Ikigo kigomba kwishyura iyi nkunga kitazajya kiyitangira igihe kizajya kishyuzwa inyungu z’ubukererwe ingana na 2% buri kwezi.

Amafaranga azajya ava mu gusuzumisha ibinyabiziga hari igice kizajya kijya mu kunganira ubwisungane mu kwivuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza