00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo by’ingutu bibangamiye abarimu mu mashuri yigenga

Yanditswe na Ferdinand Maniraguha
Kuya 3 Ugushyingo 2022 saa 01:38
Yasuwe :

Kuri uyu wa Gatatu tariki 2 Ugushyingo, abarimu benshi mu Rwanda bari babukereye mu kwizihiza umunsi mpuzamahanga wabahariwe. Ni umunsi usanze abakorera Leta bari mu byishimo nyuma y’iminsi mike Guverinoma y’u Rwanda yongereye imishahara y’abakora mu nzego z’uburezi za Leta.

Uwo munsi wizihirijwe muri BK Arena i Kigali, witabirwa n’ibihumbi by’abarimu baturutse imihanda yose baje kuganira na Guverinoma yari ihagarariwe na Minisitiri w’Intebe Dr Edouard Ngirente.

Mu gihe abarimu bakorera Leta n’abakorera ibigo bifatanya nayo kubw’amasezerano bari mu byishimo, ku rundi ruhande abakorera ibigo byigenga bo baracyataka ibibazo, bituma batibona nka bagenzi babo bo mu mashuri ya Leta.

Umunyamabanga Mukuru wa Sendika y’abarimu bakora mu bigo by’amashuri yigenga n’abakozi babikoramo (SYNEDUC), Abdon Faustin Nkotanyi yabwiye IGIHE ko bishimira intambwe urwego rw’uburezi rumaze gutera by’umwihariko ku kwita ku buzima bwiza bw’abarukoramo, gusa avuga ko mu mashuri yigenga hakiri ibibazo.

Inyungu ku nguzanyo iri hejuru

Koperative Umwarimu Sacco yashyizweho kugira ngo yorohereze abarimu kubona inguzanyo ku nyungu nto, babashe kwiteza imbere ubuzima bwabo buhinduke.

Inguzanyo abarimu barazihabwa ariko abo mu mashuri yigenga bavuga ko imbogamizi zikomeye bafite ari uburyo inyungu yabo iri hejuru ugereranyije n’abo mu mashuri ya Leta.

Nkotanyi yavuze ko abarimu bo mu mashuri yigenga ku nguzanyo bahawe, bishyura inyungu ya 14 % mu gihe abo mu mashuri ya Leta bishyuzwa inyungu ya 11 %.

Ati “Igisubizo tubona ni uko Leta yashyizemo amafaranga bishingiye ku mwarimu wayo. Twe tukumva ibyo byari busabwe wenda abakoresha nabo bakagira icyo bashyira mu Mwarimu Sacco ariko kandi n’izina ubwaryo rivuga umwarimu Sacco ntihavuzwe uwo mu bigo runaka kandi abarimu bose b’abanyamuryango icyo batanga kiba kingana.”

Amasezerano y’igihe gito

Byinshi mu bigo byigenga nubwo bihemba neza, si kenshi bitanga amasezerano y’igihe kinini ku bakozi babyo. Ibyo bigira ingaruka z’uko abo bakozi bahora badatuje bazi ko isaha n’isaha babura akazi, cyangwa se bajya kwaka inguzanyo ntibahabwe izo bakeneye kuko amasezerano yabo ari ay’igihe gito.

Nkotanyi ati “Aba ari aho akorera ashakisha ahandi bikaba byatuma ireme ry’uburezi ritagenda neza. N’iyo agiye mu Umwarimu Sacco, umwarimu ukora muri ibyo bigo ntabona inguzanyo y’igihe kirekire.”

Igisubizo kuri iki kibazo yumva ko cyaturuka ku guhinduka kw’amategeko, umwarimu yakora ahantu igihe kirenga umwaka agahabwa amasezerano y’igihe kirekire cyangwa kitazwi.

Kutishyurirwa ubwishingizi

Nkotanyi yabwiye IGIHE ko abanyamuryango babo abenshi badahabwa ubwishingizi bw’ubuzima cyangwa ubwiteganyirize bw’izabukuru nk’uko amategeko abiteganya.

Ibyo bituma nk’iyo barwaye babura uko bivuza neza cyangwa se bajya mu kiruhuko cy’izabukuru ntibabone imibereho myiza ijyanye n’igihe bamaze batanga umusanzu mu kubaka igihugu.

Ati “Ikindi ni uko ibigo byigenga byakorohereza Sendika gukorera mu bigo byabo hakabaho ibiganiro ku masezerano y’umurimo. Hanakenewe ko habaho ihuriro ryemewe n’amategeko rya ba nyir’ibigo byigenga noneho hakajya hakorwa CBA’s (Collective Bargaining Agreements), imishyikirano rusange.”

Covid-19 yabakozeho, barenzwa ingohe

Ubwo Covid-19 yageraga mu Rwanda muri Werurwe 2020, ibigo byinshi byigenga birimo n’amashuri byafunze imiryango mu rwego rwo kwirinda icyo cyorezo.

Kuko amashuri yigenga arwariza ku mafaranga abanyeshuri bishyura, amwe yahise ahagarika guhemba abakozi, nyamara bamwe muri bo bari bafite inguzanyo mu Mwarimu Sacco.

Ibyo bivuze ko abari bafite inguzanyo batakomeje kwishyura uko bisanzwe, bisanga bafite ubukererwe mu kwishyura. Bongeye gusubira kwishyura neza ari uko amashuri afunguye imiryango umwaka ushize.

Nubwo bimeze gutyo, Nkotanyi avuga ko abarimu bo mu bigo byigenga bari kwakwa inyungu z’ubukererwe z’icyo gihe bamaze batishyura kandi batarahabwaga umushahara.

Ati “Abarimu bo mu bigo byigenga ubu barimo kwishyura amafaranga y’inyungu ku bukererwe kandi batarahembwaga mu gihe mu mwaka ushize Minisitiri w’uburezi yari yatwijeje ko agiye kubiganira n’abo bireba icyo kibazo kigacyemuka.”

Minisitiri w’Intebe Dr Edouard Ngirente kuri uyu wa Gatatu yabwiye abarimu ko Guverinoma ibashyigikiye kandi izakomeza gukora ibituma akazi kabo kagenda neza.

Ati “Dukomeze twihe inshingano yo gukora akazi kacu neza ariko nongera kubisubiramo ko Leta y’u Rwanda ibashyigikiye, ishyigikiye umwuga mukora ndetse tuwufata nk’umwuga wa mbere utegura imibereho y’ejo hazaza.”

Imibare ya Minisiteri y’Uburezi (Mineduc) yo mu 2020/2021 igaragaza ko mu Rwanda hari amashuri y’incuke yigenga 1,026, abanza ni 497, ayisumbuye ni 325 naho ay’imyuga n’ubumenyingiro ni 203.

Mineduc igaragaza ko mu mashuri yigenga mu Rwanda hari abakozi 20,139 barimo abagabo 11,534 n’abagore 8,605.

Abarimu bo mu mashuri yigenga basabye Leta kubafasha gukemura bimwe mu bibazo bibugarije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .