Ibibazo by’akarengane muri serivisi z’ubutaka ku isonga mu bikibangamiye abaturage benshi

Yanditswe na Uwimana Abraham
Kuya 27 Ukwakira 2020 saa 08:45
Yasuwe :
0 0

Raporo y’ibikorwa by’Urwego rw’Umuvunyi ya 2019-2020 igaragaza ko ibibazo by’ubutaka ari byo biza imbere mu bikibangamiye abaturage benshi, kuko mu bibazo byakiriwe n’uru rwego muri uwo mwaka mu nyandiko, 32.4% muri byo birebana n’iby’ubutaka.

Ubwo yagezaga iyi raporo ku Nteko Ishinga Amategeko imitwe yombi, Umuvunyi Mukuru w’u Rwanda, Murekezi Anastase, yavuze ko ibibazo by’ubutaka byagaragaye cyane mu baturage ahanini harimo iby’abadahabwa ingurane ndetse n’iby’Abanyarwanda batahuka bava mu buhungiro bagasanga ubutaka bwa bo bwarakoreshejwe mu nyungu rusange.

Raporo y’ibikorwa by’Urwego rw’Umuvunyi igaragaza ko muri rusange ibibazo rwakiriye mu 2019-2020, birimo iby’akarengane 3,360 birimo 640 byakiriwe mu nyandiko, muri byo 207 bihwanye na 32.4% ni ibirebana n’ubutaka.

Mu bindi bibazo byakiriwe harimo ibibazo bireba imanza zitarangizwa ku gihe bingana na 22%, ibibazo bijyanye na serivisi z’imari bingana 11%, ibibazo bijyanye no kwimura abantu ku nyungu rusange bingana na 8%, hari kandi ibibazo birebana n’imitungo itari iy’ubutaka, ibibazo by’imibereho myiza y’abaturage n’ibindi.

Uretse ibi byakiriwe binyuze mu nyandiko, hari n’ibindi bibazo uru rwego rwakiriye binyuze muri za “Cyber Café” bakorana hirya no hino mu gihugu, hakaba n’ibibazo 2033 byakiriwe muri gahunda yo gukumira no kurwanya akarengane mu turere, muri byo 50% byahise bikemurwa ibindi bisigirwa uturere ngo tubikurikirane.

Muri ibi bibazo birebana n’ubutaka, Murekezi yavuze ko ibyakunze kugaragara ari Abanyarwanda bagiye batahuka bavuye mu buhungiro bagasanga ubutaka bwa bo bwaragiye butuzwamo abandi muri gahunda ya Leta yo gusaranganya ubutaka, aba bakaba baragiye batuzwa bikurikije gahunda Leta yashyizeho itagize uwo ibangamira.

Ikindi kibazo cyagaragaye ni icy’abaturage bagiye bimurwa bakajya gutuzwa mu midugudu ariko ntibahabwe ingurane.

Yagize ati “Hari ahubatswe imidugudu ariko aho ishyizwe ugasanga abaturage ntacyo babonye nk’ingurane, basigaye ntaho bafite ho guhinga, ahubwo ubuyobozi bw’ibanze bukababwira buti nimuze muturane n’abandi mu mudugudu, ibyo rero ntabwo bihagije.”

Yongeyeho ati “Twe turavuga tuti niba ari abaturage bari batuye mu mirima yabo banahahinga bakimuka bakaza gutura mu mudugudu hamwe n’abandi baturage, bakwiye guhabwa ingurane, yaba imirima, yaba ingurane y’amafaranga, kugira ngo babashe gukomeza imibereho yabo.”

Mu bindi bibazo Umuvunyi Mukuru yagaragaje ko bikeneye umwihariko uretse ibibazo by’ubutaka, harimo iby’abantu baberewemo imyenda n’ibigo cyangwa amasosiyete, ibibazo by’ingurane y’ahashyizwe ibikorwa by’amajyambere, hakaba kandi n’ibibazo bya Sacco zibereyemo imyenda abaturage.

Murekezi yavuze ko buri mwaka ibibazo birebana n’ubutaka ari byo biba ari byinshi buri mwaka, nk’uko binagaragara muri iyi raporo y’uyu mwaka.

Abagize Inteko Ishinga Amategeko basabye ko hakongerwa ubugenzuzi ku bakora muri serivisi z’ubutaka mu nzego z’ibanze.

Umuvunyi Mukuru, Anastase Murekezi, ageza ku Nteko Ishinga Amategeko imitwe yombi Raporo y'umwaka wa 2019-2020
Umuvunyi Mukuru yagaragaje ko bihangayikishije kuba hari abaturage bimurwa aho bari bafite amasambu bahingamo ntibahabwe ingurane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .