00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo 15 Perezida Kagame yagejejweho mu Ntara y’Amajyepfo bigeze he bikemurwa?

Yanditswe na Prudence Kwizera
Kuya 18 September 2022 saa 03:43
Yasuwe :

Perezida Paul Kagame aherutse gusura Intara y’Amajyepfo, abaturage bamugezaho ibibazo bigera kuri 15 ahita asaba abayobozi kubikurkirana vuba bigakemurwa.

Umukuru w’Igihugu yasuye Akarere ka Ruhango ku wa 25 Kanama 2022 bukeye akomereza mu Karere ka Nyamagabe. Mu bibazo yagejejweho higanjemo iby’akarengane, ihohoterwa, uburiganya n’ibindi. Ni ukuvuga ko hashize ibyumweru birenga bitatu asabye ko ibyo bibazo bikurikiranwa.

Bimwe muri byo yabihaye ibisubizo ariko asaba abayobozi ku nzego z’ibanze kubikurikirana kugira ngo bishyirwe mu bikorwa ndetse bakemure n’ibindi.

Ubuyobozi bw’Intara y’Amajyepfo butangaza ko mu bibazo 15 byagejejwe kuri Perezida Kagame, hamaze gukemurwa burundu bibiri naho 13 bikaba bigikurkiranwa kandi naybo biri hafi kubonerwa ibisubizo bya burundu.

Mu kiganiro n’abanyamakuru, Guverineri w’Intara y’Amajyepfo, Kayitesi Alice yavuze ko ibibazo byose Umukuru w’Igihugu yagejejweho bari kubikurikirana kugira ngo bikemuke.

Ati “Ibyinshi byakozweho hari ibyari byasabwe gushyirwamo imbaraga bijyanye n’uruganda rwa Kinazi [rw’ifu y’imyumbati] uruganda rw’ingano i Nyamagabe, bijyanye na hoteli ya Muhanga ndetse n’ibindi bijyanye n’ibikorwa remezo muri rusange, ku bufatanye n’inzego bireba hari icyo biri gukorwaho kandi tubona turi mu nzira nziza ntabukererwe burimo.”

Yakomeje avuga ko hari ibyatangiye gushyirwa mu masoko ngo bikorwe, hari n’ibiri gukurkiranwa harebwa icyakorwa.

Ati “Ariko byose biri mu murongo kubera ko inzego zose bireba zarahuye twemeranya ku gishushanyo mbonera n’ibigomba gukorwa.”

Guverineri Kayitesi yasobanuye ko ibibazo by’abaturage byihariye nabyo byakurikiranwe bimwe bihabwa ibisubizo, ibitarasubizwa nabyo biri gukurikiranwa n’inzego zitandukanye bireba.

Mu byakemuwe burundu harimo icy’umugore w’i Nyamagabe wareze umugabo ko yamuteye inda ariko akaba yaranze umwana.

Ati “Ni umubyeyi wagaragarije Umukuru w’Igihugu ko umugabo babyaranye yihakanye umwana, icyo cyarakemutse kubera ko n’umwana yamaze kwandikwa kuri se nyuma yo gukora ibizamini akemera ko umwana ari uwe.”

Ikindi cyamaze gukemuka ni icy’umuturage witwa Riberakurora Adolphe wavuze ko umutungo we uri mu Karere ka Kicukiro ugizwe n’inzu n’ikibanza yawambuwe na Mutangana Eugène ukora muri RDB.

Mu kugikurikirana basanze uwo mutungo wari warashyizwe mu mitungo yasizwe na bene yo mu 1994, waraguzwe byemewe n’amategeko na Mutangana nyuma nawe arawugurisha.

Itegeko rivuga ko iyo nyiri ubwite ubifitiye uburenganzira atanze ikirego, itegeko rivuga ko akarere kamuha amafaranga yavuye mu kiguzi cy’umutungo havanywemo 10% ajya mu isanduku ya leta. Bategereje ko azaza gufata amafaranga ye.

Umwihariko w’ikibazo cy’umubyeyi w’i Nyanza

Ubwo Perezida Kagame yasuraga Akarere ka Nyamagabe ku wa 26 Kanama 2022, umugore witwa Mukankaka Elina wo mu Karere ka Nyanza yamugejejeho ikibazo, avuga ko umugabo witwa Musabyimana Emmanuel wo mu muryango w’umugabo we, yatanze ubutaka bwe, bukoreshwa n’akarere ndetse kamuha ingurane ariko ntiyazigeza kuri bene ubwo butaka.

Yavuze ko yiyambaje inzego zose guhera ku z’ibanze kugera mu nkiko, hose atsinda uwo mugabo ariko biza kurangira nta gisubizo abonye.

Meya wa Nyanza, Ntazida Erasme, yavuze ko iki kibazo bakizi, ndetse ko cyakurikiranwe bagasanga uwo muturage nta mutungo n’umwe umwanditseho.

Perezida Kagame yavuze ko uwo mugabo yari akwiriye kuba ari muri gereza, mu gihe hari gushakwa umuti.

Perezida Kagame yahise asaba Meya wa Nyanza na Guverineri w’Intara y’Amajyepfo, Kayitesi Alice, ko bakemura icyo kibazo mu gihe kitarenze icyumweru kimwe.
Guverineri Kayitesi yavuze ko icyo kibazo nacyo cyakurikiranwe uwo mugore ahindurirwa imibereho kuko ubu yatangiye guhabwa inkunga y’ingoboka, inzu ye iravugururwa ndetse ahabwa n’inka.

Musabyimana Emmanuel we basanze ari mu bitaro bakaba bategereje ko akira, ariko imitungo ye basanze yarayandikishije ku mugore witwa Gloriose Mukabuzizi.

Uyu mugore ari gukurikiranwa n’Ubugenzacyaha kugira ngo hamenyekane uko yayanditsweho kuko bikekwa ko bwari uburyo bwo kujijisha kugira ngo idatezwa cyamunara ngo haboneke ubwishyu wa miliyoni 5 Frw agomba Mukankaka Elina.

Ku bijyanye n’abaturage bagaragaje ko batishyuwe na ba rwiyemezamirimo bakoreye, Guverineri Kayitesi yavuze ko nabyo byakurikiranwe ku buryo mu minsi ya vuba batangira kwishyurwa.

Ubuyobozi bw'Intara y'Amajyepfo bwagaragaje ko bwatangiye gukemura ibibazo abaturage bagaragarije Perezida Paul Kagame ubwo yahagiriraga uruzinduko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .