00:00:00 IGIHE NETWORK KN KINYARWANDA EN ENGLISH FR FRANCAIS

I Burasirazuba: Bagaragarijwe ko bari gusodoka muri gahunda zo kurwanya isuri

Yanditswe na Hakizimana Jean Paul
Kuya 3 August 2022 saa 08:21
Yasuwe :

Hegitari ibihumbi 543 zagaragajwe ko zikeneye gushyirwaho imirwanyasuri, ubuyobozi bw’inzego z’ibanze bunengwa uburyo buri gushyira mu bikorwa iyi gahunda aho mu mezi atatu hamaze gukorwa 2% by’izi hegitari.

Ibi byagaragajwe kuwa Kabiri tariki ya 2 Kanama 2022, ubwo habaga inama Nyunguranabitekerezo yahuje inzego zitandukanye ku ngamba zo kurwanya isuri no gutera amashyamba mu Ntara y’Iburasirazuba.

Kuva muri Mata Leta y’u Rwanda yiyemeje gushyiraho imiganda hirya no hino mu gihugu mu gihe cy’amezi icyenda hagamijwe gucukura imirwanyasuri, gutera ibiti bitandukanye hagamijwe kurwanya isuri.

Dr Rukundo Emmanuel, Umuyobozi Mukuru w’ Ikigo gishinzwe Umutungo Kamere w’Amazi mu Rwanda (RWB), yeretse aba bayobozi ko kurwanya isuri ari ikibazo gikwiriye gushyirwamo imbaraga cyane, aho yatanze urugero kuri Nyabarongo ahanyura ubutaka bungana n’ibiro 42 mu isogonda avuga ko ibi byerekana ubukana bw’isuri ihari.

Yavuze ko u Rwanda rwarwanyije isuri nibura ku mwaka rwajya rwunguka miliyari 183 Frw ubundi agenda akoreshwa mu kurwanya isuri mu bikorwa bitandukanye.

Dr Rukundo yavuze ko kuri ubu ibikorwa byo kurwanya isuri bitari gushyirwamo imbaraga nk’uko byagakozwe, yemeza ko mu mezi make ashize iki gikorwa gitangiye hamaze kurwanya isuri kuri 2%.

Ati “ Ubu rero tugeze kuri 2% tugendeye kuri raporo yo muri Nyakanga, tugendeye kuri uyu muvuduko twasanze byadutwara imyaka 50 kugira ngo turwanye isuri kuri za hegitari ariko turamutse dukoze hegitari imwe mu cyumweru muri buri Mudugudu iyi gahunda yarangirana n’uyu mwaka ubu hamaze gukorwa hegitari 2500 zirenga mu Burasirazuba kandi hakenewe gukorwa hegitari I bihumbi 177 dukeneye kwihutisha rero.”

Umuyobozi Mukuru wa Meteo Rwanda, Gahigi Aimable, we yavuze ko bimwe mu bintu bitera isuri harimo imvura nyinshi ndetse n’umuyaga mwinshi ukunze kwibasira Intara y’Iburasirazuba, yavuze ko igikorwa cyo kurwanya isuri cyakwihutishwa mu kwirinda imvura nyinshi izagwa mu ntangiriro za Nzeri.

Umuyobozi Mukuru wungirije wa RAB ushinzwe Iterambere ry’Ubuhinzi, Dr Bucagu Charles yavuze ko hegitari ibihumbi 543 arizo zikwiriye kurwanywaho isuri anagaragaza ko zimwe mu mpamvu zitera isuri ari ubutaka bworoshye n’ibindi.

Ati “Mu bitera isuri harimo ubukana bw’imvura, umwimerere w’ubutaka bworoshye cyane cyane mu misozi miremire aho iyo imvura iguye ubutaka bugasoma bugenda bumanukana n’ibiriho byose, ubuhaname bukabije, ubutaka bwambaye ubusa ndetse no kutagira amaterasi bituma isuri yiyongera.”

Dr Bucagu yagaragaraje ko ku butaka buhingwa ingano y’itaka rigenda ari toni 421 kuri hegitari ku mwaka wabibara ugasanga ngo nibura umuhinzi agira igihombo kiri hagati ya 5-10% by’umusaruro.

Yakomeje avuga ko umuturage wahinze agashyiramo ifumbire iyo atarwanyije isuri neza nibura ku mwaka ashobora guhomba ibihumbi 900 Frw kuri hegitari ngo kuko itaka rigenda ritwara ya fumbire aba yashyizemo kongeramo n’uruhare rwe mu guhinga.

Yavuze ko hashyizwe imbaraga mu kurwanya isuri hakorwa imiganda hagacibwa imirwanyasuri ahandi hagakoreshwa VUP byakwihutisha iki gikorwa abaturage ntibakomeze guhomba.

Umuyobozi w’Akarere ka Kirehe, Rangira Bruno, nka kamwe mu turi mu dukunda kwibasirwa n’isuri aho bafite hegitari ibihumbi 42 zishobora kugirwaho ingaruka n’isuri yavuze ko bari gukora ubukangurambaga mu baturage kugira ngo bamenye ububi bw’isuri.

Ati “Nk’Akarere turi kwegera abaturage kugira ngo hakorwe imiganda yo gukora imirwanyasuri mu mirima n’ahandi ku misozi, turi gutera ibiti kandi mu mirima y’abaturage ndetse tukanakora ubukangurambaga mu bandi bafite ubutaka.”

Kuri ubu Intara y’Iburasirazuba muri hegitari ibihumbi 177 zikwiriye kurwanywaho isuri hamaze gukorwa hegitari 2500 nkuko raporo yo uri Nyakanga ibigaragaza.

Abaturage bo Ntara y'i Burasirazuba basabwe kwihutisha gahunda zo kurwanya isuri zirimo n'iyo guca amaterasi ku misozi ihanamye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .