00:00:00 IGIHE NETWORK KN KINYARWANDA EN ENGLISH FR FRANCAIS

Huye: Mu mwaka umwe ingo 6100 zahawe amashanyarazi

Yanditswe na Prudence Kwizera
Kuya 29 Nyakanga 2021 saa 02:16
Yasuwe :
0 0

Hagamijwe guteza imbere imibereho myiza y’abaturage no kubagezaho iterambere rirambye, mu Karere ka Huye ingo zisaga 6100 zahawe amashanyarazi mu mwaka w’imihigo wa 2020/21.

Ni igikorwa Akarere ka Huye kakoze ku bufatanye n’Ikigo Gishinzwe Ingufu, Rwanda Energy Group (REG).

Usibye mu ngo, amashanyarazi yagejejwe no ku bigo by’amashuri, ku mavuriro y’ibanze no ku biro by’utugari.

Umuyobozi w’Akarere ka Huye, Sebutege Ange, avuga ko bari barihaye umuhigo wo kugeza amashanyarazi akomoka ku muyoboro mugari ku ngo zisaga ibihumbi bine no guha amashanyarazi akomoka ku mirasire y’izuba izisaga 1200 kandi bawesheje banarenzaho.

Ati “Kugeza ubu ingo zisaga 4600 mu Karere ka Huye zamaze kubona amashanyarazi akomoka ku muyoboro mugari mu mwaka umwe, hakaba noneho n’ingo zisaga 1500 zamaze kubona amashanyarazi akomoka ku mirasire y’izuba.”

Avuga ko bari bafite n’umuhigo wo kubaka umuyoboro w’amashanyarazi wa kilometero 16 mu tugari twa Kimuna na Gafumba mu Murenge wa Rusatira kuko turimo ibikorwa by’ubucuruzi kandi dutuwe n’abaturage bafite inyota yo kwiteza imbere.

Ati “Byasabaga rero ko hubakwa umuyoboro w’amashanyarazi ufite ibilometero 16, ubu byamaze kubakwa birarangira. Twiteguye ko uyu muyoboro uzaha amashanyarazi abaturage basaga 1200, ukaba waradutwaye ingengo y’imari ya miliyoni 378 Frw ku bufatanye na REG.”

Sebutege avuga ko uwo muyoboro wubatswe mu gihe cy’amezi atatu ariko igishimishije ari uko ari uko abaturage batangiye kubyaza umusaruro ayo mashanyarazi bakora ibikorwa bibateza imbere.

Muri ako gace hari Urwunge rw’Amashuri rwa Gafumba rwahawe mudasobwa mu 2019 ariko bagira ikibazo cyo kuzikoresha kubera kutagira amashanyarazi.

Umunyeshuri ku Rwunge rw’Amashuri rwa Gafumba, Uwiduhaye Belise, avuga ko kutagira amashanyarazi byatumaga batiga isomo ry’ikoranabuhanga kuri mudasobwa ariko kuri ubu basigaye biga kuyikoresha.

Ati “Twabaga dufite agahinda kuko tutigaga ikoranabuhanga none ubu turi kuryiga kuko haje amashanyarazi. Maze kumenya gufungura mudasobwa no kwandika kubera ko ari bwo tugitangira kuyiga.”

Bimwe mu bikorwa abaturage batangiye gukora harimo kogosha bakoresheje imashini, gukoresha ibyuma bisya n’ibindi.

Muhire Denis ukora akazi ko kogosha, avuga ko ayo mashanyarazi yamufashije gushyira mu bikorwa umushinga we.

Ati “Nsanzwe nzi kogosha kandi ni umwuga nkunda. Kuduha amashanyarazi byaramfashje cyane kuko nakoreshaga umurasire w’izuba ariko nta ngufu wari ufite. Kuba baduhaye amashanyarazi ngiye gukora cyane niteze imbere mbikesha akazi kanjye ko kogosha.”

Undi Murenge uheruka kugezwamo amashanyarazi vuba ni uwa Kigoma aho mu mwaka w’ingengo y’imari wa 2020/21 yagejejwe ku ngo 1218.

Kugeza ubu mu Karere ka Huye amashanyarazi amaze gukwirakwizwa ku kigero cya 51%. Mu mwaka w’ingengo y’imari wa 2020/21 yiyongereyeho 10%.

Imirenge yose yamaze kugezwamo amashanyarazi, hakurikiyeho icyiciro cyo kuyageza mu tugari twose kuko hari aho ataragera.

Amashanyarazi ari gukwirakwiza mu giturage mu Murenge wa Rusatira
Bashinze Salon de Coiffure babikesha kwegerezwa amashanyarazi
Batangiye gukoresha ibyuma bisya kubera amashanyarazi begerejwe
Abanyeshuri bo kuri GS Gafumba bishimira ko basigaye biga mudasobwa
Umuyobozi w’Akarere ka Huye, Sebutege Ange, yasabye abamaze kubona amashanyarazi kuyabyaza umusaruro bakora ibikorwa bibyara inyungu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .