Huye: Mu kigo cya Radiyo SALUS harakekwa ko hari imibiri y’abazize Jenoside yakorewe Abatutsi

Yanditswe na Prudence Kwizera
Kuya 22 Gicurasi 2020 saa 02:55
Yasuwe :
0 0

Mu kigo cya Radiyo SALUS giherereye mu Murenge wa Ngoma mu Karere ka Huye harakekwa ko haba hari imibiri y’abishwe muri Jenoside yakorewe Abatutsi kubera ibimenyetso bihari birimo imyenda n’ibindi.

Ubuyobozi bw’Akarere ka Huye ku bufatanye na Kaminuza y’u Rwanda ndetse na Ibuka, kuri uyu wa Gatanu batangiye ibikorwa byo gucukura bareba ko hari imibiri y’abazize Jenoside yakorewe abatutsi yaba ihari.

Umuyobozi wa Radiyo SALUS, Mbaraga Paul, yavuze ko baketse ko mu kigo ayoboye hashobora kuba hari imibiri ku makuru bahawe na bamwe mu banyamakuru bahakorera babonye bimwe mu bimenyetso.

Ati “Ni Abanyamakuru nka babiri babonye ejo (Kuri uyu wa Kane) ibimenyetso birimo imyenda, inkweto bagira impungenge (…) barabimbwira, mpita mbibwira Umuyobozi w’Akarere ka Huye, na we yohereza abantu baraza barareba basanga ari ibimenyeso bifatika.”

Mu gitondo cyo kuri uyu wa Gatanu ni bwo hatangiye ibikorwa byo gucukura bashakisha ko hari imibiri baza kubona.

Bimwe mu bimenyetso bamaze kubona harimo ibice by’imibiri bitaramenyekana neza niba ari iy’abishwe muri jenoside; imyenda n’inkweto z’abana n’abantu bakuru.

Inyubako Radiyo SALUS ikoreramo zahoze zituyemo abantu barimo n’abakoraga muri Kaminuza Nkuru y’u Rwanda.

Umuyobozi w’Akarere ka Huye, Sebutege Ange, yabwiye IGIHE ko nyuma yo guhabwa amakuru n’Ubuyobozi bwa Radiyo SALUS, bafashe umwanzuro wo gucukura kugira ngo bamenye ukuri kwabyo.

Ati “Turimo gushakisha ko hari ibimenyetso byatuganisha ku kumenya amakuru arambuye. Turacyashakisha amakuru turaza kuyababwira nyuma.”

Perezida wa Ibuka mu Murenge wa Ngoma, Mbabazi Norbert, yavuze ko mu makuru bafite bakuye mu Nkiko Gacaca yemeza ko muri Stade Huye hari Abatutsi bagiye bahazanwa mu gihe cya Jenoside bakicirwa mu nkengero zaho harimo n’aho Radiyo SALUS ikorera.

Ati “Mu makuru twamenye mu gihe cy’Inkiko Gacaca bavugaga ko aha muri Stade Huye higeze kuzanwa abantu na nyuma yaho bakurwamo ariko baza kwicwa, bicirwa hafi ya Stade; ntabwo twari kumenya ngo ni ikihe gice barimo ariko ukurikije aho Stade iri n’aho duhagaze ubungubu bitwereka ko hano hantu hashobora kuba haraguye abantu.”

Mbabazi yakomeje avuga ko mu gukomeza gushakisha amakuru y’impamo baza no kubaza bamwe mu bari bahatuye kuko hari abakiriho kandi kuri ubu baba mu Karere ka Huye.

Ati “Mu makuru dufite hari bamwe na bamwe bagihari bigeze gutura muri aya mazu, umuntu yakomeza kubifashisha bakaduha amakuru ndetse n’abaturage muri rusange bari batuye hano mu Karere ka Huye kuko hari bamwe bagihari kandi bafite ayo makuru.”

Mbabazi yakomeje avuga ko mu Cyumweru cyo kwibuka ku nshuro ya 26 Jenoside yakorewe Abatutsi, hari imibiri irenga 10 yabonetse mu nkengero za Stade Huye ahagana hirya ku musozi wa Kabutare.

Ati “Mu minsi ishize mu cyumweru cyo kwibuka muri uyu mwaka hari n’ahandi byabaye hano ku Kabutare munsi y’Ibitaro bya Caraes, abantu barimo bahinga baza kuduhamagara ko babonye imibiri. Twagize amahirwe kuko imiryango yabo yarabamenye.”

Abayobozi batandukanye barimo ab’inzego z’ibanze n’iz’umutekano ndetse na Ibuka bari gukurikira igikorwa cyo gushakisha ko haba hari imibiri y’abazize Jenoside yakorewe Abatutsi

Ibimenyetso byamaze kuboneka birimo ibice by’imibiri, imyenda n’inkweto. Umunyamabanga Nshingwabikorwa w’Umurenge wa Ngoma, Mutsindashyaka Alphonse yabitwaye ajya kubibika mu Murenge wa Ngoma.

Umuyobozi w’Akarere ka Huye, Sebutege Ange, yavuze ko igikorwa cyo gucukura bashakisha iyo mibiri cyasojwe bakaba bafashe umwanzuro wo gukomeza gushakisha amakuru y’impamo ku bufatanye n’izindi nzego.

Bimwe mu bimenyetso bamaze kubona harimo ibice by'imibiri bitaramenyekana neza niba ari iy'abishwe muri Jenoside yakorewe abatutsi, inkweto n'imyambaro
Biragaragara ko hahoze icyobo kuko hatangiye kwiyasa
Birakekwa ko ari ibice by'imibiri y'abishwe muri jenoside yakorewe Abatutsi
Bimwe mu bimenyetso byatangiye kuboneka birimo imyenda, inkweto n'ibice by'imibiri
Igikorwa cyo gushakisha ko haba hari imibiri y'abishwe muri jenoside yakorewe abatutsi kirakomeje
Mu kigo cya Radiyo SALUS harakekwa ko hari imibiri y’abishwe muri Jenoside yakorewe abatutsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .