Huye: Imiryango 100 yiganjemo impunzi z’Abarundi yagizweho ingaruka na Coronavirus yagobotswe

Yanditswe na Prudence Kwizera
Kuya 12 Ukuboza 2020 saa 09:00
Yasuwe :
0 0

Imiryango 100 yo mu mirenge itandukanye y’Akarere ka Huye yiganjemo impunzi z’Abarundi zicumbitse mu mujyi yatewe ubukene n’ingaruka na Coronavirus yahawe ibiribwa n’ibikoresho by’isuku mu kwirinda icyo cyorezo.

Ni igikorwa cyabaye kuri uyu wa Kane tariki ya 10 Ukuboza 2020 gikozwe n’ihuriro ry’abatanga ubufasha mu by’amategeko (LAF) ku nkunga ya Ambasade y’u Budage mu Rwanda.

Abahawe ibyo biribwa n’ibikoresho by’isuku barimo imiryango 60 y’impunzi z’Abarundi zicumbitse mu Mujyi wa Huye n’indi 40 y’Abanyarwanda bo mu mirenge itandukanye y’ako karere.

Buri muryango wahawe ibilo 25 by’umuceri, ibilo 10 by’ifu ya kawunga, ibilo bitanu by’ifu y’igikoma n’ibilo bitanu by’isukari ndetse n’ibase. Bahawe n’udupfukamunwa, icupa ry’isabune yo gukaraba intoki n’umuti wo gusukuza intoki.

Abahawe ubwo bufasha bavuze ko bugiye kubafasha muri ibi bihe kuko bibagoye kubera ko icyorezo cya Coronavirus cyabateye ubukene bitewe n’uko akazi kabo kahagaze.

Nshimimana Albert ni impunzi yaturutse mu Burundi, acumbitse mu Murenge wa Tumba mu Karere ka Huye kandi afite ubumuga bw’ingingo mu kaguru. Yavuze ko ubufasha yahawe bugiye kumugoboka we n’umuryango we.

Ati “Najyaga nshakisha nkabona ibitunga umuryango wanjye ariko mu gihe cya Guma mu Rugo nabuze akazi. Ibi bampaye biradufasha muri iyi minsi tubone ibyo kurya, mfite umugore n’abana bane, twese hamwe turi batandatu.”

Gacoreke Lucie na we ni impunzi yaturutse mu Burundi, acumbitse mu Murenge wa Tumba. Yavuze ko mu gihe cya Guma mu Rugo yahuye n’ingaruka arwara diabète kubera kwirirwa yicaye kandi yahuye n’ubukene kuko atari akibasha kujya gukorera amafaranga.

Ati “Nabyakiriye neza cyane ndashimye cyane, ni ubwa mbere bibaye imbonekarimwe. Bampaye ibyo kurya ndetse n’ibisabune yo kugira isuku kugira ngo dukomeze kwirinda icyorezo cyaduteye.”

Barirwanda Vianney wo mu Murenge wa Kinazi we yavuze ko yagorwaga no kubona ibiribwa n’isabune kuko muri ibi bihe yahuye n’ubukene bitewe no kuba umugore we arwaye.

Ati “Nahuye n’ubukene kuko umugore wanjye yarwaye araremba ku buryo ari njyewe njyenyine ugerageza gushakira umuryango ibyo kurya kandi nkita no ku murwayi, ibi biribwa bigiye kumfasha cyane.”

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciate, yashimiye abatanze ubufasha asaba ababuhawe ku bufata neza kandi bukababera umusingi wo gushaka icyo bakora kibabeshaho.

Ati “Abafashijwe turabasaba kumva ko bitazakomeza, ntabwo ubufasha bukomeza kubaho ngo amare kimwe ahite abona ikindi, turabasaba kumva ko ubwo babonye intangiriro ishobora kubatunga ukwezi nabo bakora kugira ngo bazabone nyuma y’ukwezi ibibatunga.”

Kankesha yavuze ko hari abandi bakeneshejwe na Coronavirus bagera ku bihumbi bibiri bari guhabwa ibiribwa na Croix Rouge, yizeza ko n’abandi basigaye bazagerwaho bitewe n’uko inkunga ibonetse.

Yavuze ko mu gutanga ubufasha bareba umuntu wese ukennye nta vangura iryo ari ryo ryose ribayeho.

Ati “Igice kimwe kigizwe n’impunzi zavuye i Burundi ziba mu Mujyi wa Huye, ikindi gice kigizwe n’abaturage, ni mu rwego rwo kugaragariza impunzi ko ari kimwe n’abaturage abo ari bo bose, kugira ngo bibone mu muryango nyarwanda kuko nabo ni abantu.”

Usibye ibiribwa, muri rusange ihuriro ry’abatanga ubufasha mu by’amategeko (LAF) ryagennye gutanga amacupa 600 y’umuti usukura intoki, thermomètre 12, udukarito 90 tw’uturindantoki, amacupa 156 y’amasabune y’amazi yifashishwa mu gukaraba intoki, udupfukamunwa 900 twifashishwa n’abaganga, n’udupfukamunwa 16.844 twambarwa na buri wese.

Bateganya no gutanga ibiribwa ku mpunzi ziri mu nkambi ya Kigeme mu Karere ka Nyamagabe, mu nkambi ya Mugombwa muri Gisagara no mu nkambi ya Mahama muri Kirehe.

Umuyobozi wungirije ushinzwe imibereho myiza y’abaturage mu Karere ka Huye, Kankesha Annonciate, yashimiye abatanze ubufasha asaba ababuhawe ku bufata neza
Umuyobozi Nshingwabikorwa wa LAF, Me Andrews Kananga, yavuze ko bazakomeza gufasha abagizweho ingaruka na Coronavirus uko ubushobozi bubonetse
Imiryango 100 yiganjemo impunzi z’Abarundi yagizweho ingaruka na Coronavirus yahawe ubufasha
Abahawe ubufasha basabwe ko bubabera umusingi wo gushaka icyo bakora kibabeshaho
Abahawe ubufasha barimo imiryango 60 y’impunzi z’Abarundi zicumbitse mu Mujyi wa Huye n’indi 40 y’Abanyarwanda bo muri ako karere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .