Huye: Abatega imodoka batewe impungenge n’uko amabwiriza yo kwirinda Coronavirus atubahirizwa

Yanditswe na Prudence Kwizera
Kuya 29 Kamena 2020 saa 07:57
Yasuwe :
0 0

Abagenzi batega imodoka ziva mu i Rango zerekeza muri Gare Mpuzamahanga ya Huye mu Karere ka Huye bavuga ko batewe impungenge n’uko hatashyizweho uburyo bwo kwirinda icyorezo cya COVID-19, bagasaba ko inzego zibishinzwe zabyitaho.

Kugeza ubu imodoka zitwara abagenzi muri utwo duce nta buryo zashyizeho bwo kwirinda COVID-19 kuko umugenzi winjiye mu modoka atabanza gukarabywa intoki ndetse nta buryo bw’ikoranabuhanga mu kwishyura bukoreshwa kuko bishyuzwa bahererekanya amafaranga mu ntoki.

Izo modoka ziva mu i Rango zikanyura i Tumba zigakomeza ku Mukoni zerekeza mu Mujyi wa Huye rwagati zigakomereza muri Gare ya Huye.

Bamwe mu bagenzi bazitega babwiye IGIHE ko n’ubwo baba bambaye udupfukamunwa batewe impungenge n’uko izo modoka zishobora gukwirakwiza icyorezo cya COVID-19 giterwa n’agakoko ka Coronavirus.

Umwe ati “Muri taxi batwereka imyanya tugomba kwicaramo n’iyo tutagomba kwicaramo ariko iyo winjiye ya alcool ntayo baguha. Urinjira ukicara komvwayeri akaza kukwishyuza wagera iyo ujya ukavamo. Ibiceri n’inoti byose tubiherekanya mu ntoki ndetse n’iyo abuze ayo akugarurira aragenda akajya kuvunjisha akagaruka akakugarurira.’’

Abagenzi baganiriye n’umunyamakuru basaba inzego zibishinzwe kwiga kuri iki kibazo kuko bafite impungenge ko Coronavirus igeze mu Karere ka Huye yakwirakwira vuba.

Undi ati “Impungenge ziba zihari kuko iyo tugenda duhererekanya amafaranga mu ntoki gutyo kiba ari ikibazo ariko nka kuriya bari bafashe ingamba ngo aho umuntu ageze hose ajye akaraba intoki, taxi yo nta mazi ahari ariko byibura bagombye kugira n’iyo alcool wakwinjira ugakaraba intoki wanasohoka ugakaraba.”

Mu byifuzo byabo basaba ko inzego zibishinzwe zabikurikirana nk’uko zikurukirana abantu zireba ko bambaye udupfukamunwa.

Ati “Muri taxi ntabwo byubahirizwa, izo ngamba zagombye kubahirizwa nk’uko kwambara agapfukamunwa byubahirizwa, umugenzi akinjira mu modoka akarabijwe na alcohol yajya gusohoka nabwo agakaraba ndetse bakajya banishyura hakoresheje ikoranabuhanga.”

Umunyamakuru wa IGIHE na we yateze imodoka inshuro zirenze imwe ashaka kwirebera ko ibivugwa n’abagenzi ari byo asanga koko bavugisha ukuri.

Yagerageje kuvugisha abashoferi n’abakomwayeri bishyuza abagenzi ariko barabyanga.

Umuvugizi wa Polisi y’u Rwanda, CP John Bosco Kabera, yabwiye IGIHE ko icyo kibazo batari bakizi ariko bagiye kugikurikirana kigakemuka byihuse.
Ati “Ayo ni amakosa bakora ntabwo byemewe tugiye kubikurikirana.”

Ni kenshi abatwara ibinyabiziga bihanangirizwa ku kubahiriza amabwiriza yo kwirinda COVID-19 kuko bahura n’abagenzi benshi bikaba byatuma gikwirakwira vuba.

Minisiteri y’Ubuzima iherutse gutangaza ko kwishyura urugendo kuri moto cyangwa mu modoka hakoreshejwe ikoranabuhanga, usibye ko birinda ikwirakwira bya COVID-19 bifasha no kumenya abagenzi bashobora kuba banduye kuko imyirondoro yabo ihita iboneka muri telefone y’uwari utwaye ikinyabiziga.

Abatega imodoka mu Karere ka Huye batewe impungenge n’uko amabwiriza yo kwirinda Coronavirus atubahirizwa
Bishyuza abagenzi amafaranga mu ntoki kandi iyo bagiye kwinjira mu modoka ntabwo babanza kubakarabya intoki
Komvwayeri ubwo yishyuzaga abagenzi mu modoka iva mu i Rango yerekeza muri Gare ya Huye kuri uyu wa Mbere

[email protected]igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .