Huye: Abasaga 600 batangiye kuvurwa amaso ku buntu

Yanditswe na Prudence Kwizera
Kuya 18 Nyakanga 2019 saa 03:09
Yasuwe :
0 0

Abaturage bo mu Karere ka Huye bafite uburwayi bw’amaso bari gukorerwa isuzuma bagahabwa indorerwamo abandi bakabagwa amaso, byose bikozwe ku buntu nta kiguzi batanze.

Ni igikorwa cyatangiye kuri uyu wa Gatatu kizamara iminsi irindwi; kirigukorwa n’abaganga b’inzobere baturuka muri Leta Zunze Ubumwe za Amerika ku bufatanye n’Umuryango Come and See Rwanda ndetse n’itorero rya Assemblée de Dieu.

Umuyobozi w’Umuryango Come and See Rwanda, Murenzi Frank, yavuze ko umubano mwiza w’u Rwanda n’amahanga ari wo watumye haboneka inzobere zaje kubafasha kuvura abanyarwanda amaso.

Ati “Iki gikorwa gishingiye ku mubano mwiza hagati ya Khalvari ndetse n’amatorero mu Rwanda ariko cyane cyane Umuryango Come and See Rwanda na Assemblée de Dieu; ni aho rero byashingiye kugira ngo iki gikorwa cyo kuza gusuzuma amaso no kuyavura gikorwe.”

Bamwe mu bo twasanze bamaze gusuzumwa amaso no guhabwa indorerwamo zibafasha kureba neza, bavuze ko byabashimishije kuko bari barabuze ubushobozi bwo kwivuza.

Murekezi Jean ati “Nasomaga inyuguti sinzibone neza ahubwo rimwe na rimwe hakaza amarira; ubu bamaze kumpa indorerwamo kandi ndumva ndeba neza.”
Mukamusoni Patricia ati “Najyaga mu rusengero bavuga ngo musome aha nkabyihorera kuko nari naramaze guhuma na telefone nari narayiretse kubera kutabona.”

Umwe mu nzobere z’abaganga bari kuvura amaso, Dr. Rodolfo Rudy Sarmiento, yavuze ko nyuma yo kubona ko uburwayi bw’amaso bukomeje kwiyongera ku isi kandi akenshi butera ubuhumyi, bahisemo gutanga umusanzu wabo mu kubukumira no kubuvura.

Ati “Ni ikintu twabonye ko gikenewe; mu Rwanda honyine abakeneye ubuvuzi bw’amaso ni benshi kandi abaganga bayavura baracyari bake. Ubwo twazaga mu Rwanda umwaka ushize twabonye ko abanyarwanda bafite icyo kibazo kandi bakeneye ubufasha (…) twahisemo kuza gutanga umusanzu mu Rwanda ku bufatanye n’amatorero ya gikirisito y’ino.”

Biteganijwe ko kuri iyi nshuro abagera kuri 600 ari bo bazasuzumwa amaso bamwe bahabwe indorerwamo naho abandi 60 babagwe amaso.

Icyo gikorwa bagishyizemo amafaranga y’u Rwanda angana na Miliyoni 50 kandi umuntu wese ubagannye baramwakira.

Abaganga b'inzobere bari kuvura amaso abaturage bo mu Karere ka Huye ku buntu
Bamwe mu baganga b'inzobere bari kuvura indwara z'amaso i Huye
Bamwe mu baje kwivuza amaso bategereje kwakirwa n'abaganga
Bamwe mu bari kuvurwa uburwayi bw'amaso bari guhabwa indorerwamo zibafasha kureba neza
Barasuzuma amaso bifashishije n'uburyo bwo gusoma
Dr. Rodolfo Rudy Sarmiento, umwe mu nzobere z’abaganga bari kuvura amaso i Huye
Kimwe mu bikoresho bari kwifashisha mu gusuzuma uburwayi bw'amaso bareba ikibazo nyirayo afite
Umuturage wese ubagannye afite ikibazo cy'uburwayi bw'amaso baramwakira
Umuyobozi w’Umuryango Come and See Rwanda, Murenzi Frank
Umwe mu baje kwivuza amaso asuzumwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza