00:00:00 IGIHE NETWORK KN KINYARWANDA EN ENGLISH FR FRANCAIS

Huye: Abanyonzi barinubira amabwiriza bashyiriweho abagonganisha n’abagenzi

Yanditswe na Manzi Angelo
Kuya 2 Ukwakira 2022 saa 12:38
Yasuwe :

Abatwara abagenzi ku magare bakorera mu Karere ka Huye, Umurenge wa Ngoma baravuga ko uburyo bw’ imigendere ubuyobozi bwabashyiriyeho busigaye bubagonganisha n’abanyamaguru.

Kuva Abanyonzi batangira kugaragaza ikibazo bahura nacyo mu gihe bagendera hamwe mu muhanda n’ imodoka zisanzwe bigateza impanuka byatumye ubuyobozi bubishakira ingamba.

Ubuyobozi bwa Karere ka Huye bwahisemo gukora umuhanda w’amagare ukwawo, cyakora abanyonzi bavuga byabarinze impanuka z’ imodoka, ariko ubu bakaba bashobora kugonga abantu kubera bamwe mu baturage.

Bamwe mu baganiriye na IGIHE, bavuze batakigendera mu muhanda wabagenewe kubera abaturage banga kugendera mu kayira kabo.

Tuyishime Samson, umwe mu batwara amagare ukorera muri uyu mujyi yavuze ko babangamiwe na bamwe mu baturage basigaye babateza impanuka.

Ati “Ikibazo dufite hano,baduhaye inzira yacu ariko inyurwamwo n’ abantu benshi. Impungege dufite ni abanyeshuri bagiye gutangira kandi benshi niyo banyuramo ugasanga turi kugongana nabo, dutukana kandi yaragenewe abanyamagare.”

Uyu munyonzi akomeza avuga ko n’iyo bavugije inzongera batumva kandi hari inzira yabagenewe.

Nzayivuga Théoneste na we avuga ko hari gihe bahitamo kugendera mu muhanda w’ imodoka ugasanga habayeho impanuka kubera abo banyamaguru.

Ati “Ikibazo n’ubundi bizana n’impanuka za hato na hato, nk’ejo bundi nagonze umuntu ariko muha amafaranga kugira ngo dukiranuke kuko igare barijyanye kurigaruza bisaba amafaranga menshi kandi aribwo buzima.”

Umwe mu baturage utashatse ko amazina ye atangazwa, yavuze ko biterwa n’ ubumenyi buke mu bijyanye n’ikoreshwa ry’imihanda.

Ku ruhande rw’Umuyobozi wa Karere ka Huye, Sebutege Ange yavuze ko ahubwo aba banyonzi batagikoresha neza inzira zabashyiriweho nubwo hari n’abanyamaguru nabo batabyubahiriza.

Yagize ati “Twashyizeho abantu ku munsi babibutsa gukoresha inzira zabo ariko usanga bo batabyubahiriza nubwo n’abanyamaguru badohoka.”

Akomeza avuga ko akenshi abanyonzi aribo batubahiriza kunyura mu nzira zabagenewe ugasanga biteza impanuka kandi aricyo birindaga.

Sebutege avuga ko bagiye kongera ubukangurambaga bwigisha abantu gukoresha imihanda neza ndetse anashimira bamwe mu bayobozi b’amatsinda y’amagare bashyizeho gahunda yo kwigisha abanyonzi gukoresha imihanda.

Mu Karere ka Huye ni hamwe mu turere hashyizweho imihanda y’abanyamaguru itandukanye n’iy’amagare ndetse n’imodoka mu rwego rwo kugabanya impanuka zikunda gutezwa n’ikibazo cy’imihanda mito.

Abanyonzi basabwe kubahiriza amategeko y'Umuhanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .