Huye: Abagore batewe ipfunwe n’ikibazo cy’inda zikomeje guterwa abangavu

Yanditswe na Prudence Kwizera
Kuya 1 Ugushyingo 2020 saa 07:14
Yasuwe :
0 0

Nyuma y’uko bigaragaye ko abangavu bataragira imyaka 18 y’amavuko bakomeje guterwa inda imburagihe kandi bibagiraho ingaruka mbi, bamwe mu bagore bo mu Karere ka Huye bavuga ko bibateye ipfunwe bityo bagiye kongera imbaraga mu gukumira icyo kibazo.

Byavugiwe mu mwiherero w’iminsi ibiri wahuje abagore bahagarariye abandi mu nzego zinyuranye ugamije kurebera hamwe uko umugore uri mu nshingano yarushaho kuzuzuza agafasha abandi bagore by’umwihariko n’umuryango muri rusange gutera imbere.

Kimwe mu bibazo bayagarutsweho ni icy’abangavu baterwa inda imburagihe kuko imibare yerekana ko kuva muri Nyakanga 2019 kugeza muri Kamena 2020 abagera kuri 60 bafite imyaka iri munsi ya 18 bazitewe muri ako karere.

Ni ikibazo abagore bavuze ko kibateye ipfunwe biyemeza gukumira izo nda z’imburagihe bakora ibikorwa bigamije kubaka umwangavu uzira guhungabanywa.

Bakundukize Redempta uhagarariye Urugaga rw’Abagore rushamikiye ku Muryango FPR Inkotanyi mu Murenge wa Ngoma, yavuze ko ari igisebo ku bagore kubona umwangavu yatewe inda.

Ati “Ni igisebo gikabije ku bantu nkatwe b’abagore, ubundi iyo uri umuyobozi ukora inshingano z’inyabutatu, hari inshingano yo kuba umuyobozi, iyo kuba umugore mu rugo n’iyo kuba umurezi. Ubwo rero iyo umwana wacu yatwaye inda ni ukuvuga ko hari inshingano imwe tuba tutubahirije. Icyo gihe rero biratubabaza kuko iba ari inkuru y’incamugongo.”

Komiseri w’Ubukungu mu Nama y’Igihugu y’Abagore mu Karere ka Huye, Umutesi Diane, yavuze ko biyemeje gukangurira ababyeyi kwibuka inshingano yabo yo kurera no kuganiriza abana babo bakamenya ibibazo bafite kugira ngo babarinde ibishuko bishobora kubashora mu busambanyi.

Ati “Hari ubwo abana bigira ibintu kuri internet ugasanga umubyeyi atabizi akazasanga byamwigishije imico mibi. Tugiye kongera ingufu mu kwibutsa ababyeyi kujya baganiriza abana babo bamenye ibyo bahugiyemo n’ibibazo bafite hakiri kare.”

Umuhuzabikorwa w’Inama y’Igihugu y’Abagore mu Karere ka Huye, Uwanyirigira Marie Hélène, yavuze ko bafashe ingamba zo gukumira inda ziterwa abangavu bahereye mu ngo no mu midugudu.

Ati “Tukabegera tukabereka urukundo tukabahumura amaso tukabereka ko hari ubundi buryo bashobora gukoresha kugira ngo ubuzima bwabo bube bwiza batabwangije ngo batwite inda z’imburagihe bishora mu busambanyi kuko twagiye tubibona ko hari imibare minini igaragaza ko abana nabo babikora babishaka, tugasanga ko hari n’abandi babikoreshwa.”

Akomeza agira ati “Dushaka kubaka umuryango Nyarwanda duhereye muri ba bana batoya kugira ngo bamenye uko ubuzima bwabo babutwara, bamenye ko ari bo ba mbere bagomba kurinda ubuzima bwabo.”

Mu busesenguzi bwakozwe, abagore bo mu Karere ka Huye bavuga ko ku bufatanye n’abafatanyabikorwa ndetse n’izindi nzego bahisemo gukoresha uburyo butatu mu gukumira inda z’imburagihe ziterwa abangavu.

Harimo gukomeza gukangurira ababyeyi kurera abana babo neza hakiri kare; kuganiriza urubyiruko no kurutoza kugendera kure ingeso mbi ndetse no gushyira mu bikorwa amategeko ahari hatangwa raporo ku nzego z’ibishinzwe

Imibare yerekana ko mu Karere ka Huye mu mwaka wa 2018 abangavu batewe inda imburagihe batarageza ku myaka 18 y’amavuko ari 338 naho mu mwaka wa 2019 ari 139.

Abazitewe bagiye bagira ingaruka zitandukanye mu mibereho n’ubuzima kuko usanga abenshi byarabaviriyemo kuva mu ishuri.

Abagore bo mu Karere ka Huye bahagarariye abandi bagaragaje ko batewe ipfunwe n’ubwiyongere bw’inda z’imburagihe zikomeje guterwa abangavu
Kimwe mu bibazo bayagarutsweho ni icy’abangavu bakomeje guterwa inda imburagihe
Komiseri w’Ubukungu mu Nama y’Igihugu y’Abagore mu Karere ka Huye, Umutesi Diane, yavuze ko biyemeje gukangurira ababyeyi kwibuka inshingano yabo yo kurera
Umuhuzabikorwa w'Inama y'Igihugu y'Abagore mu Karere ka Huye, Uwanyirigira Marie Hélène, yavuze ko bafashe ingamba zo gukumira inda ziterwa abangavu bahereye mu ngo no mu midugudu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .