00:00:00 IGIHE NETWORK KN KINYARWANDA EN ENGLISH FR FRANCAIS

Hutuland na Tutsiland, ibihugu by’amacakubiri byageragejwe mu 1994 bikananirana

Yanditswe na Ferdinand Maniraguha
Kuya 16 Ugushyingo 2022 saa 10:40
Yasuwe :

Guhera mu myaka ya 1959 ubwo mu Rwanda havukaga inkubiri y’amashyaka yavugaga ko aharanira ubwigenge n’uburenganzira bw’Abahutu, nibwo bwa mbere imvugo za Hutuland na Tutsiland mu Rwanda zumvikanye.

Ni uburyo bwatekerezwaga bw’u Rwanda rwagabanywamo ibice bibiri, kimwe kikaba igihugu cyagenewe Abahutu gusa (Hutuland) ikindi kikajyamo Abatutsi (Tutsiland).

Kayibanda Grégoire wabaye Perezida wa mbere w’u Rwanda ni we wabitangije mu 1959, nubwo atabishyize mu bikorwa amaze kuba Perezida.

Byongeye gukaza umurego nyuma ya Jenoside yakorewe Abatutsi mu 1994, ubwo FPR Inkotanyi n’ingabo zayo bari bamaze guhagarika Jenoside, hakajyaho Guverinoma y’Ubumwe.

Benshi mu banyamahanga barimo abanditsi, abanyapolitiki bavuze ko Abanyarwanda badashobora kuzongera kubana mu mahoro, by’umwihariko ko Abahutu badashobora kubana n’Abatutsi bahemukiye.

Inama zatanzwe ni uko igice cy’Amajyaruguru n’Uburengerazuba cyaharirwa Abahutu, kigahabwa izina ryacyo rya Hutuland hanyuma Amajyepfo n’Uburasirazuba bigaharirwa Abatutsi, igihugu kikaba Tutsiland.

Ntabwo byakunze kuko Leta y’Ubumwe yari ishyize imbere kubanisha Abanyarwanda bose, icyo gitekerezo kimwa agaciro.

Umwanditsi akaba n’inzobere mu mateka, Isaïe Murashi yabwiye IGIHE ko uwo mugambi watangiye kera ubwo Abakoloni na Kiliziya Gatolika bageraga mu Rwanda, bakabona nta bundi buryo bwo kurwigarurira.

Ati “Ntabwo ari ikinyoma byabayeho ariko byabayeho kubera abazungu bashaka gusenya u Rwanda, ni uburyo bwo gusenya u Rwanda kuko urebye u Rwanda, amateka n’imiturire yarwo, ntabwo ushobora kubona umusozi uriho abatutsi cyangwa abahutu ntaho uzabona […] kuko babaga basangiye imisozi.”

Murashi avuga ko mu gihe u Rwanda rwaharaniraga ubwigenge, mu Bubiligi no mu bihugu by’u Burayi hari inkundura y’amashyaka ya gikristu, azwi nka Internationale démocrate-chrétienne (IDC). Ni ishyaka ryashyigikiraga andi yo mu bihugu bikolonijwe ariko afite imyumvire imwe y’uko nubwo haboneka ubwigenge, abazungu bagomba gukomeza kugira ijambo muri Afurika.

Uyu munyamateka wanditse ibitabo nka Sur les origines du génocide contre les Tutsi, yavuze ko nta kuntu Ababiligi bari gukomeza kwigarurira u Rwanda badashyize imbere imyumvire y’uko Abahutu n’Abatutsi atari bamwe, badakwiriye no kubana.

Ati “Muri ya politiki y’abazungu igamije gusenya, bashatse kugaragaza ko koko abahutu n’abatutsi aria bantu batandukanye, babyinjizamo ba Kayibanda n’abandi babumvisha ko bagomba kurema igihugu cy’Abahutu n’Abatutsi, Hutuland na Tutsiland, ni politiki ya IDC.”

Yakomeje agira ati “ IDC n’ubu iraturwaye niyo mpamvu hariho intambara ya Congo. Buriya IDC ntabwo yigeze yemera ko FPR Ifata igihugu n’ubu […] ntabwo byantangaza kuko n’iyi ntambara yo muri Congo ni IDC ibiri inyuma.”

Murashi avuga ko ubwo FPR Inkotanyi yigaruriraga ibice bitandukanye by’igihugu ihagarika Jenoside yakorewe Abatutsi, Abazungu babonye ko umugambi wabo ushobora gupfuba, aribwo Abafaransa basabaga ko habaho agace katahariwe imirwano ko guhungishirizamo abaturage bise Zone Turquoise.

Ako gace kari kagizwe naPerefegitura za Cyangugu, Gikongoro na Kibuye mu Burengerazuba, kakagenzurwa n’Abafaransa. Bavugaga ko ako gace kagamije gufashirizwamo abantu bagizweho ingaruka n’intambara, nubwo byagaragaye ko byari mu mugambi wo guhungisha abari bamaze gukora Jenoside no kubafasha kwisuganya ngo bagaruke gutera igihugu.

Murasho avuga ko usesenguye neza, na Zone Turquoise yari Hutuland yari mu igerageza, nubwo itabahiriye.

Ati “Biriya abafaransa bashyizeho bya Zone Turqouise ni cyo bashakaga. Ni ikintu kimeze nk’icyo bashakaga ariko kubera FPR izi kwitwara neza igenda ibikosora, byarananiranye. Yari zone abantu bashyiramo abantu abafaransa barinda ubutegetsi bwa FPR, icyo babateganyirizaga kwari ukuzaba Hutuland ariko kubera ko abafaransa bananiwe FPR igafata hose, Hutuland yavuyeho.”

Murashi avuga ko Abanyarwanda udashobora kubatandukanya ngo bikunde kuko babaye umwe kuva kera, ibintu bigaragarira mu mibereho, imyitwarire n’imico yabo.

Abanyamahanga bavugaga ko kugira ngo Abanyarwanda bazongere biyunge, bisaba ko Abahutu bagira igihugu cyabo mu Burengerazuba, Abatutsi bakagira icyabo mu Burasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .