Human Rights Watch; igitotsi mu jisho ryayo

Yanditswe na Albert Rudatsimburwa
Kuya 21 Kanama 2019 saa 08:19
Yasuwe :
0 0

Kuwa 15 Kanama 2019, Umuryango uharanira uburenganzira bwa muntu ‘Human Rights Watch (HRW)’, wasohoye inkuru ifite umutwe ugira uti “Rwanda: Kuburirwa irengero bikeneye iperereza ryizewe”.

Uyu mutwe urimo kurondogora: Birumvikana ko kuburirwa irengero nk’ibindi byaha byose bishobora gukekwa, bikenera iperereza.

Gusa HRW irashaka kwamamaza imvugo yuko ubutabera bw’u Rwanda atari ubwo kwizera mu gukora iperereza ry’ukuri muri rusange by’umwihariko muri uko kuburirwa irengero itekereza.

Birumvikana neza ko nta shingiro ry’iri shushanya kandi mu gihe ishingiro ry’ibyo bavuga rinyomojwe n’ibimenyetso bifatika, bizagaragara neza ko intego ya HRW n’imiryango nkayo ari ukugerageza gukoresha imbaraga zishoboka kugira ngo iteshe agaciro ubwigenge bw’ubutabera mu Rwanda, ibintu bidashobora gukorwa mu bihugu byabo.

Mu bisobanuro bye birambuye ku binyoma bya Human Rights Watch ku Rwanda, uwahoze ari umudipolomate wa Amerika, Richard Johnson, agaragaza uburyo uyu muryango n’indi nkayo yakoze uko ishoboye kose ngo yishyire mu mwanya w’ubutabera mu bihugu bumva ko batera ubwoba nk’u Rwanda.

Nyuma yo kuyisoma, biraboneka neza ko igihe cyose raporo nk’izi zisohoka zigamije intego nk’izo ambasaderi Johnson yagaragaje.

Urugero, nta bihamya byo kuvuga ko amaperereza y’inzego z’ubutabera adafite ukuri guhagije mu Rwanda, kurenza aho bari muri Amerika aho HRW iherereye.

Ku rundi ruhande, icya mbere birakomeye kubona umuryango utangaza nanone imitwe y’inkuru itangaje kuko intego ari uguha ubwoko bw’inkuru abantu runaka b’inzirakarengane basabwa gutanga imisanzu yo kwagura iryo terabwoba ryihishe inyuma yo guteza imbere uburenganzira bwa muntu. Muri make ni ukutita ku bintu.

Ikindi ku byo ambasaderi Johnson yagaragaje, hari imyumvire ibiri. Imwe ni uko aba biyita abaharanira uburenganzira bwa muntu baba bagamije guhimba inkuru z’abantu bahohotewe na leta.

Icyakora, iyo ibimenyetso binyomoza bigaragaye, ntibashobora kugira umwete wo gusaba imbabazi mu ruhame. Babana n’igisebo bucece bagategereza ko igihe gihita bakazongera gusohora indi raporo irimo nanone bya birego.

Kuzura abapfuye

Mu Ukwakira 2017, nyuma y’amatora ya Perezida wa Repubulika, HRW yasohoye inkuru ku banyarwanda yavugaga ko bishwe na Guverinoma. Uyu muryango ntiwigeze wita ku kugenzura niba abo wavugaga ko bapfuye ko byari ukuri.

Kuri iyi nshuro HRW ntiyabigiriyemo amahirwe kuko iperereza ryakozwe na Komisiyo y’igihugu y’uburenganzira bwa muntu ryagaragaje ko abantu yavugaga ko bapfuye ari bazima.

Kuwa 14 Ukwakira uwo mwaka, ibitangazamakuru bitandukanye birimo The New Times, byatangaje inkuru kuri ayo mahano. Niba abapfuye barazutse, byarigaragaje.

Kuwa 31 Ukwakira 2017, Cassien Ntamuhanga wari warakatiwe imyaka 25 yatorotse gereza ya Mpanga ajya muri Afurika y’Epfo kwiyunga ku muyobozi w’abaterabwoba Kayumba Nyamwasa.

Kuwa 8 Ugushyingo 2017, bimwe mu bitangazamakuru byegamiye ku banzi b’u Rwanda byatangiye kwandika ko Ntamuhanga atatorotse nk’uko byavugwaga ahubwo yishwe na guverinoma y’u Rwanda.

Gusa byatwaye igihe gito cyane kiri munsi y’amezi atatu Ntamuhanga yigaragaza kuri Radio Ijwi ry’Amerika ishami ry’Ikinyarwanda, yivuga n’ishema ryinshi ko yatorotse gereza ya Mpanga ubu yidegembya.

Ukuburirwa irengero nk’uku kwagaragaye ku munyamakuru wa BBC Phocas Ndayizeye. Kuwa 25 Ugushyingo 2018, BBC ishami ry’Ikinyarwanda yatangaje ko umunyamakuru wayo mu Rwanda Phocas Ndayizeye yashimuswe na Guverinoma.

RIB yahise inyomoza ibyo gushimutwa ivuga ko Ndayizeye ari yo imufite kuko akurikiranyweho umugambi wo kugaba ibitero by’iterabwoba mu Mujyi wa Kigali akoresheje ibiturika.

Kuwa 31 Kanama 2016, ku mbuga nkoranyambaga hakwirakwiye amakuru ko John Ndabarasa, umunyamakuru wa SANA Radio yaburiwe irengero, hahurizwa ko yaba yarishwe n’inzego z’umutekano.

Gusa muri Werurwe 2018, uwo bavugaga ko yapfuye Ndabarasa agaruka mu Rwanda abwira bagenzi be b’abanyamakuru ko yari yarijyanye mu buhungiro kubera ubwoba yiteraga bwo kuba yahuzwa na muramu we Lt Mutabazi wakatiwe gufungwa burundu kubera iterabwoba.

Izi ni ingero nyinshi z’ibivugwa ko abantu baburiwe irengero ndetse baricwa. Gusa iyi miryango ntabwo ijya yigira ku makosa adasobanutse ikora.

Urugero, kuva RNC yatangira kongera ibikorwa byayo muri RDC ifashijwe na Uganda, uko kuburirwa irengero kwakomeje kubaho ariko ntabwo HRW ku bushake ijya yibaza impamvu ari bwo bivugwa.

Impamvu ntashidikanywaho ni uko banyotewe kubona icyo ari cyo cyose banenga u Rwanda; amaperereza yabo akirengagiza uko kuburirwa irengero.

Abayobozi bakuru ba RNC, Capt Charles Sibo na Major Habib Muthadiru, byavuzwe ko babuze imyaka irenga itatu ishize.

Bagiye muri Uganda, biyandikisha muri UNHCR basanga abandi mu mashyamba ya RDC baba abayobozi b’ingabo. Imirwano iheruka muri RDC yahitanye Capt Sibo; mu gihe Major Habib yafashwe nk’imfungwa y’intambara.

Gushaka abajya mu mutwe wa FDLR uba muri RDC birakomeje mu Rwanda ndetse abarwanyi bayo barafashwe cyangwa bicirwa muri RDC no mu ishyamba rya Nyungwe, baturutse muri RDC baciye i Burundi.

Mu yandi magambo, abantu baburirwa irengero bagiye muri Uganda, Burundi na RDC cyangwa ahandi hose mu bikorwa bya RNC.

Raporo yo kuwa 31 Ukuboza 2018, impuguke za Loni zagaragaje Congo nk’inzira inyuzwamo ababurirwa irengero. Iratanga ikimenyetso gikomeye kuri buri wese ushaka kumenya aho abo bantu baherereye, mu cyo yita ‘umuyoboro’ mu karere.

Uku kuburirwa irengero guhimbano ndetse na raporo zigushamikiyeho nk’iza HRW, birerekana uguhuza imbaraga mu mugambi w’ikinyoma ku rwego rw’Isi.

Mu gihe abakora uyu mugambi bumva ko intego zabo zishobora gutera ubwoba ntawe ubibaryoza muri iyi miryango, ntakizahinduka. Dushobora ahubwo vuba aha kwitega indi nkuru ya HRW ku bantu bivugwa ko babuze cyangwa bishwe.

HRW yaba yumvikana nk’urwego rushobora gushinja buri wese kutaba umunyakuri?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza