Hemejwe ishingiro ry’umushinga w’itegeko ngenga rishyiraho amategeko rusange agenga ibigo bya leta

Yanditswe na Twarabanye Venuste
Kuya 26 Gicurasi 2020 saa 09:57
Yasuwe :
0 0

Sena y’u Rwanda yemeje ishingiro ry’umushinga w’itegeko ngenga rishyiraho amategeko rusange agenga ibigo bya leta utegerejwe kuganirwaho ingingo ku yindi, mbere yuko wemezwa.

Ishingiro ry’uwo mushinga ryemejwe n’abasenateri 25 kuri 25 bari mu cyumba cy’Inteko, kuri uyu wa 26 Gicurasi 2020, riherutse kwemezwa n’Umutwe w’Abadepite.

Mu isobanura mpamvu mbere yuko abasenateri bawuganiraho, Minisitiri w’Abakozi ba Leta n’Umurimo, Kayirangwa Rwanyindo Fanfan, yavuze ko itegeko rizakemura ibibazo byagiye bigaragara mu itegeko ngenga ryo mu 2016 ryakoreshwaga.

Ibyo bibazo birimo icy’inzira ndende mu gushyiraho ikigo cya leta, imicungire itanoze ku bigo bya leta bikora ubucuruzi, kutagira ubwinyagamburiro mu kwita ku ishyirwaho ry’ibigo bya leta bifite imiterere yihariye no kugenga ibiteganyijwe cyangwa ibyakabaye biteganyijwe n’andi mategeko.

Minisitiri Rwanyindo yagaragaje ko mu mpinduka zikomeye zizabaho harimo ko ibigo bya Leta bizaba bigabanyije mu byiciro bibiri harimo ibya Leta bikora imirimo itari iy’ubucuruzi n’ibikora imirimo y’ubucuruzi bizahinduka bikitwa sosiyete za leta zikora ubucuruzi.

Uretse ibyo amazina ibigo byitwa, n’inzego z’ubuyobozi bihabwa nabyo ngo bizahabwa umurongo, habeho uburyo buzwi butuma ikigo cyitwa Board, Authority n’andi, kimwe kikayoborwa na ‘DG’ ikindi na ‘Komiseri’.

Ati “Ikigo kikaza kikitwa ko ari ‘Board’ kikayoborwa n’umuntu witwa CEO ejo hakaza irindi tegeko rigashyiraho ikindi rikavuga ngo nacyo cyitwa ‘Board’ ariko kikayoborwa n’umuntu witwa DG, ibyo bigo byose bishyirwaho n’amategeko akaza no mu nteko. Hakaza ikindi cyitwa ‘Authority’ kikayoborwa na DG cyangwa Komiseri Jenerali ugasanga nta hantu bigaragara, impamvu byitwa gutyo.”

Ku makosa mu micungire y’ibigo bya Leta, Minisitiri Rwanyindo yavuze ko uburyozwe buzajya bureba inama y’ubuyobozi cyane ko itegeko rizaba rigaragaza inshingano za buri wese n’uburyo azibazwa, ibyo bikazafasha mu micungire myiza y’ibigo bya leta.

Abasenateri barimo Karangwa Chrisologue na Nkusi Juvénal bavuze ko ibyakorwa byose mu gushyiraho iryo tegeko bikwiye gushimangira imicungire myiza y’umutungo w’abaturage, binyuze mu micungire myiza y’ibyo bigo.

Senateri Kanyarukiga Euphrem we yavuze ko itegeko ryategurwa neza ku buryo ryazakemura ikibazo cy’ibigo bihora birangwaho imikoreshereze mibi y’imari ya leta ariko bigakomeza kugenerwa ingengo y’imari nk’aho ntacyabaye.

Ku kijyanye no kubaza inama y’ubuyobozi imicungire mibi y’ikigo runaka nabyo byasabwe kwiganwa ubushishozi ntibibazwe abagize inama y’ubuyobozi yose, kuko icyaha ari gatozi.

Perezida wa Sena yavuze ko nyuma yo kwemeza ishingiro ry’umushinga, hazakurikiraho kuwusuzuma ingingo ku yindi.

Minisitiri w’Abakozi ba Leta n’Umurimo, Kayirangwa Rwanyindo Fanfan, yavuze ko itegeko rishya rizakemura ibibazo byagiye bigaragara nk'icy’inzira ndende mu gushyiraho ikigo cya leta n'imicungire itanoze ku bigo bya leta bikora ubucuruzi
Sena y’u Rwanda yemeje ishingiro ry’umushinga w’itegeko ngenga rishyiraho amategeko rusange agenga ibigo bya leta
Abasenateri batandukanye batanze ibitekerezo by'icyakorwa ngo iryo tegeko ritange umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .