Hatashywe ubukarabiro bushya bwitezweho kugabanya indwara ziterwa n’umwanda mu Rwanda

Yanditswe na Mutangana Gaspard
Kuya 1 Nzeri 2020 saa 11:30
Yasuwe :
0 0

Minisiteri y’Ubuzima ifatanyije n’Umuryango utegamiye kuri Leta w’Abanyamerika World Vision yatashye ubukarabiro bugezweho 49 bwashyizwe mu bitaro bitandukanye mu gihugu bwitezweho gutanga umusanzu mu guhangana na COVID-19 n’izindi ndwara ziterwa n’isuku nke.

Ni igikorwa cyabereye ku Bitaro bya Masaka mu Karere ka Kicukiro ku wa Kabiri, tariki ya 1 Nzeri 2020.

Minisiteri y’Ubuzima ivuga ko umushinga wose uzasozwa hubatswe ubukarabiro 300 mu gihugu hose.

Minisitiri w’Ubuzima, Dr Ngamije Daniel, yasobanuye umumaro wabwo ku buzima bw’abagana Ibitaro bya Masaka, anashishikariza abaturage kwitoza gukaraba intoki mu ngo zabo.

Yagize ati “Ndashimira World Wision umufatanyabikorwa w’imena muri iki gikorwa. Icya ngombwa umuntu yakwitaho agiye gushimira uwakoze igikorwa nk’iki, si ingano y’amafaranga aba yakoreshejwe ngo bigerweho. Njye aha ndareba umumaro w’ubu bukarabiro. Bugiye kudufasha kurwanya COVID-19, n’izindi ndwara ziterwa n’umwanda. Ndakangurira kandi abazihawe kuzifata neza.”

Yakomeje agira ati “Ku baturage muri rusange, ibi bikorwa biri kwa muganga ariko no mu ngo zanyu mukwiye kubigira. Murinde abana banyu indwara ziterwa n’umwanda zirimo n’inzoka.”

Umuyobozi wa World Vision mu Rwanda, Sean Kerrigan, yijeje ko umuryango ayoboye uzakomeza gutera inkunga ibikorwa bigamije guteza imbere ubuzima bw’umuturage.

Yagize ati “Turashimira Leta y’u Rwanda umuhate ifite mu COVID-19. Ni ibintu leta yatangiye gukora mu myaka myinshi yashize, mbere y’uko Coronavirus itangira kuvugwa. Ibi bigaragarira mu bikorwa leta yahereye kera ikora birimo kwegereza amazi abaturage, guteza imbere urwego rw’ubuvuz, isuku n’isukura n’ibindi. Tuzashimishwa n’uko abana bazaba bafite ubuzima buzira umuze.”

Mu kiganiro na IGIHE, Umuyobozi w’Ibitaro bya Masaka, Dr Uwizeye Marcel, yavuze ko ubukarabiro bahawe bwari bukenewe.

Yagize ati “Bitewe n’uko twakira abarwayi benshi cyane, bigiye kudufasha ku buryo bugaragara. Kuba tubonye ubukarabiro butandatu bigiye kudufasha kwihutisha serivisi zacu. Bizadufasha kwirinda Cororonavirus n’indwara ziterwa n’umwanda.”

Ubukarabiro 49 bugezweho bufite agaciro ka miliyoni 290 Frw, nibwo bumaze kubakwa ku bufatanye na World Vision nk’umuterankunga w’imena. Ubugera kuri 47 bwubatswe ku bitaro binyuranye mu gihugu, naho bubiri bwubatswe ku bigo nderabuzima.
Ku bufatanye na World Vision kandi hari kubakwa ubundi bukarabiro 250 buzatwara miliyoni 260 Frw.

Abayobozi batandukanye baganuye ku bukarabiro bugezweho
Abana bitabiriye itahwa ry'ubukarabiro bushya mu Bitaro bya Masaka
Umuyobozi wa World Vision mu Rwanda, Sean Kerrigan
Minisitiri w’Ubuzima, Dr Ngamije Daniel
Minisitiri w'Ubuzima, Dr Ngamije Daniel, yashishikarije abaturage kwitoza gukaraba intoki mu ngo zabo
Umuyobozi wa World Vision mu Rwanda, Sean Kerrigan, yijeje ko umuryango ayoboye uzakomeza gutera inkunga ibikorwa bigamije kwita ku buzima bw’umuturage
Minisitiri w’Ubuzima, Dr Ngamije Daniel, ahererekanya inyandiko zo gucunga ubu bukarabiro n'Umuyobozi wa World Vision mu Rwanda, Sean Kerrigan
Ubukarabiro bugezweho bwubatswe ku Bitaro bya Masaka
Abayobozi bitabiriye itahwa ry'ubukarabiro bushyabwitezweho kwirinda COVID-19 no kugabanya indwara ziterwa n’umwanda mu Rwanda

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .