00:00:00 IGIHE NETWORK KN KINYARWANDA EN ENGLISH FR FRANCAIS

Hatangijwe ihuriro rigamije kurwanya ihohoterwa rikorerwa abana

Yanditswe na Mukwaya Olivier
Kuya 13 Nzeri 2021 saa 05:29
Yasuwe :
0 0

Umuryango wa World Vision Rwanda, ku bufatanye na Sendika y’Abakora Ubucukuzi bw’Amabuye y’agaciro, REWU, bashyize ku mugaragaro uburyo bushobora kwifashishwa mu kurwanya ibyaha by’ihohoterwa bikorerwa abana, birimo kubasambanya n’imirimo ibujijwe.

Ni igikorwa cyatangijwe mu nama nyunguranabitekerezo yabereye mu Karere ka Karongi mu Ntara y’Iburengerazuba yibanze mu gushaka ibisubizo by’ibibazo bikigaragara mu bikorwa byo kurengera abana.

Ikibazo cyo guhohotera abana kimaze gufata indi ntera, kuko mu mwaka wa 2019/2020, abasenateri bagaragaje abana basambanyijwe 4.265 muri bo harimo 97.4% ari abakobwa n’abahungu 2.6%.

Uretse gusambanya abana, hanagaragajwe ko hakiri ibibazo by’ihohoterwa ry’abana rishingiye ku gukoreshwa imirimo ibujijwe cyane cyane mu rwego rw’ubucukuzi y’amabuye y’agaciro, aho abana basabwa kujyana n’ababyeyi babo muri iyo mirimo, kugira ngo umuryango usarure agatubutse.

Umunyamabanga Mukuru wa Sendika y’Abakora mu bucukuzi bw’Amabuye y’Agaciro, REWU, Mutsindashyaka André, yavuze ko bagiye gushyira imbaraga mu kurwanya iki kibazo mu buryo burambye.

Yagize ati “Twabonye amakuru aturutse mu turere, yerekana ko iki kibazo gihari. Tugiye gukora inama n’amahugurwa, kugira ngo abakozi bakora mu birombe bahugurwe bamenye ko gukoresha abana mu kirombe ari icyaha.”

Uyu muyobozi yavuze ko ahanini iki kibazo giterwa n’uko abakozi bakora mu birombe by’amabuye y’agaciro batagira umushahara, ahubwo bagahemberwa umusaruro bakoreye ku munsi, bigatuma bamwe mu babyeyi bazana abana babo kugira ngo babafashe kubona umusaruro mwinshi.

Mukandekezi Gemma wari uhagarariye Umuyobozi Mukuru wa World Vision Rwanda, yavuze ko mu gihe inzego zose zahagurukira iki kibazo zigafatanyiriza hamwe kugishakira igisubizo, bishoboka cyane ko cyakemuka burundu.

Ati “Abana ni wo murage w’igihugu, ni yo mpamvu dukwiye kubarinda ihohoterwa iryo ari ryo ryose. Hari uburyo bwo kumenya ibikorwa by’ihohoterwa bikorerwa abana ndetse no kugaragaza uburyo dukwiye guhangana nabyo. Dukwiye gushyira imbaraga mu kwigisha abaturage bakamenya ubwo buryo kugira ngo bajya batanga amakuru aho babonye ibikorwa byo guhohotera abana.”

Umunyamabanga Nshingwabikorwa w’Intara y’Iburengerazuba, Uwambajemariya Florence, yavuze ko bagiye kurushaho kongera imbaraga mu gukorana, yaba ari hagati y’inzego z’ibanze ndetse no kongera imikoranire hagati n’imiryango itari iya Leta nka World Vision na REWU.

Ati "Twasanze tugomba guhuza imibare, tugahuza uburyo bwa raporo tukanashyira imbaraga mu gukumira mbere y’uko ibi byaha bibaho. Tugiye kongera intege mu ihuzabikorwa, dukorane n’abafatanyabikorwa nka World Vision na REWU, aho twiyemeje gushyiraho ihuriro kugira ngo tujye dukorana bya hafi.”

Muri iyi nama kandi World Vision yatangaje umurongo w’ayo utishyurwa wa 7272 ushobora kwifashishwa mu kumenyekanisha ihohoterwa rikorerwa abana, ndetse ukaba ushobora no kunyura ku rubuga rwa http://complaints.wvrwanda.org/ aho amakuru atanzwe ahita ashyikirizwa inzego z’ubuyobozi.

Hafashwe ifoto y'urwibutso, aho abitabiriye iyi nama bari bambaye udupfukamunwa mu rwego rwo kwirinda ikwirakwira ry'icyorezo cya COVID-19
Iyi nama yabereye mu Karere ka Karongi
Umukozi wa World Vision Rwanda wari uhagarariye Umuyobozi Mukuru wayo, Gemma Mukandekezi yavuze ko bikwiriye guhuza imbaraga mu kurwanya ihohoterwa rikorerwa abana
Iyi nama yitabiriwe n'inzego zose zifite aho zihuriye n'uburenganzira bw'umwana
Komiseri muri Komisiyo y'Uburenganzira bwa Muntu, Muhongerwa Patricia, yavuze ko Umwana wese afite uburenganzira bwihariye kuko ari aba ataragira intege, bityo ko bukwiye kubahirizwa
Uturere twagaragaje uko imibare y'abana bakoreshwa imirimo y'agahato, n'abasambanywa ihagaze
Umunyamabanga Nshingwabikorwa w'Intara y'Iburengerazuba, Uwambajemariya Florence, yavuze ko inzego z'ibanze zikwiye gukora iyo bwabaga zikarwanya ibyaha bikorerwa abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .