Hasobanuwe impamvu ibipimo bya Covid-19 bifatwa muri iyi minsi mu Rwanda bigenda bigabanuka

Yanditswe na Iradukunda Serge
Kuya 13 Nzeri 2020 saa 12:05
Yasuwe :
0 0

Ikigo cy’Igihugu Gishinzwe Ubuzima,RBC cyatangaje ko impamvu imibare y’abantu bapimwa icyorezo cya Covid-19 mu Rwanda muri iyi minsi ugenda ugabanuka ugereranyije n’umubare w’ibipimo byafatwaga mbere, ari uko n’abandura bagenda baba bake.

Kuba hashize iminsi ibipimo Covdi-19 bifatwa buri munsi ari bike bigaragazwa kandi n’imibare Minisiteri y’Ubuzima ishyira hanze buri munsi ijyanye n’uko icyorezo cya Covid-19 gihagaze mu gihugu.

Guhera ku wa 8 Nzeri abantu bapimwe bari 3253, ku wa 9 Nzeri bari 3805,Ku wa 10 Nzeri bari 2838 ku wa 11 Nzeri bari 3027 ku wa 12 Nzeri bari 2901. Iyi mibare n’imito ugereranyije n’abantu 4420 bapimwe ku wa 5 Nzeri, 5622 bapimwe ku wa mbere Nzeri cyangwa abantu 5544 bari bapimwe ku wa 30 Kanama n’abandi barenga ibihumbi bitandatu bari bapimwe ku munsi wari wabanje.

Asobanura impamvu umubare w’abantu bapimwa buri munsi mu Rwanda ugenda ugabanuka, Umuyobozi wa RBC, Dr Sabin Nsanzimana yabwiye IGIHE ko umubare w’abapimwa ugendera ku bintu bitandukanye birimo n’umubare w’abarwayi uba wabonetse ku munsi wabanje.

Yagize ati “Buriya ibipimo bifatwa bitewe n’imibare yagaragaye ku munsi wabanje ufata imibare y’abahuye n’abarwaye iyo wagize bake barwaye ugira ibipimo bike ku munsi ukurikiyeho ukenera gufata[…]mu by’ukuri nko muri iyi minsi ibipimo biri kuba bike bitewe n’uko umubare w’abarwayi uri kugabanuka, kuba ugabanuka akenshi usanga biba byaturutse no ku myitwarire y’abantu.”

Yakomeje agira ati “Ikindi kigena ifatwa ry’ibipimo ni ahantu haba habaye ikibazo kidasanzwe ugasanga nka kuriya Rusizi twajyagayo tugafata ibipimo birenga ibihumbi bibiri ku munsi.”

Dr Nsanzimana yavuze ko muri iyi minsi bateganya kongera umubare w’abantu bapima ku munsi bitewe n’uko amasaha yo gutaha yongeye agasubizwa inyuma kandi no muri Rusizi imirimo ikaba yarongeye gusubukurwa.

Yagize ati “Mu by’ukuri Rusizi kubera ko hafunguye imirimo ubu turateganya ko mu byumweru bibiri nibwo umuntu aba akeka ko yakorayo ikintu gisa n’ubushakashatsi naho urumva iyo twakoze nk’ubushakashatsi dufata byinshi […]Ubwo abantu bongeye gusubira mu ngendo n’amasaha y’akazi yiyongereye ubwo turaza natwe kongera ibipimo byafatwaga kugira ngo dufate ishusho rusange y’ubuzima bushya.”

Kugeza ubu inzego z’ubuzima zivuga ko u Rwanda rumaze kugira ubushobozi bwo kuba mu munsi umwe rwapima Cov-19 abantu bari hagati y’ibihumbi birindwi n’ibihumbi 10.

Kuva umurwayi wa mbere wa Covid-19 yagaragara mu Rwanda hamaze gufatwa ibipimo birenga ibihumbi 460, byasize byemeje ko abarenga 4500 bamaze kwandura iki cyorezo barimo 2544 bakize n’abandi 1999 bakirwaye ndetse n’abagera kuri 22 bamaze kwitaba Imana.

Kuba abandura Covid-19 ku munsi bagenda bagabanuka biri mu byatumye n'umubare w'ibipimo bifatwa ku munsi ugabanuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .