00:00:00 IGIHE NETWORK KN KINYARWANDA EN ENGLISH FR FRANCAIS

Harimo abateguye ibitero ku Rwanda: Ibyo wamenya ku bantu umunani bafatiwe ibihano na EU

Yanditswe na Musangwa Arthur
Kuya 9 Ukuboza 2022 saa 08:26
Yasuwe :

Umuryago w’Ubumwe bw’u Burayi (EU) wongereye abantu umunani barimo Ruvugayimikore Protogène uzwi nka Colonel Ruhinda wo muri FDLR n’Umuvugizi wa M23 Major Willy Ngoma, ku rutonde rw’abafatiwe ibihano, bashinjwa uruhare mu bibazo by’umutekano muke muri Repubulika Iharanira Demokarasi ya Congo.

Abongerewe ku rutonde ubu rugezeho abantu 17, barimo batanu bo mu mitwe yitwaje intwaro ya M23, ADF, Codeco, FDLR na Maï-Maï Yakutumba, umwe mu basirikare ba Congo, umunyapolitiki umwe n’umucuruzi w’Umubiligi.

Muri rusange bashijwa uruhare mu byaha bikomeye byahonyoye uburenganzira bwa muntu, guhembera amakimbirane n’ubugizi bwa nabi no kwihisha inyuma y’ayo makimbirane mu kubyaza umusaruro ubucuruzi butemewe bw’imitungo kamere.

EU yagize iti "Muri rusange, abantu 17 nibo barebwa n’ibi bihano bya EU, byongerewe igihe kugeza ku wa 12 Ukuboza 2023, bigizwe no kubuzwa kwinjira muri teritwari ya EU no gufatira imitungo. Byongeye, birabujijwe ku baturage n’ibigo byo muri EU gukorana ihererekanya ry’amafaranga iryo ari ryo ryose n’abantu bari kuri urwo rutonde."

Ni icyemezo uyu muryango watangaje ko kiri muri gahunda yo gukumira uburyo buhembera intambara muri RDC, no gushyigikira ubushake bw’icyo gihugu bwo kugarura amahoro.

Ruvugayimikore Protogène

Amakuru yashyizwe ahagaragara avuga ko Ruvugayimikore Protogène ayobora umutwe udasanzwe w’abarwanyi ba FDLR-FOCA uzwi nka Maccabé, wahoze witwa Commando de recherche et d’action en profondeur, CRAP.

FDLR ni umutwe watangijwe na benshi mu bashinjwa ko bagize uruhare muri Jenoside yakorewe Abatutsi mu Rwanda, mu 1994. Ni umutwe washyizwe ku rutonde rw’iyindi ikora iterabwoba.

EU yakomeje iti "FDLR-FOCA, harimo n’umutwe wa Maccabé, igira uruhare mu makimbirane yitwaje intwaro n’umutekano muke muri RDC, by’umwihariko binyuze bitero bigabwa ku basivili no guhonyora uburenganzira bwa muntu, ubwicanyi, guhohotera abana, gufata ku gufu n’ibindi bikorwa byo guhohotera bishingiye ku gitsina."

Col Ruhinda ni umwe mu bayobozi ba FDLR

Ruvugayimikore Protogène ashinjwa ko yakomeje kugira uruhare mu gutegura ibyo bikorwa no kubiyobora.

Raporo y’impuguke yagejejwe ku kanama k’Umuryango w’Abibumbye gashinzwe umutekano ku wa 10 Kamena 2022, yagaragaje ko "Colonel" Ruvugayimikore Protogène alias Ruhinda, hamwe n’Umwungiriza we "Silencieux", ari bo bayobora uyu mutwe wihariye uzwi nka Commando (CRAP).

Colonel Ruhinda yanayoboye ibijyanye n’Imyitozo muri FDLR-FOCA.

Raporo y’impuguke z’Umuryango w’Abibumbye iheruka gushimangira imikoranire y’Ingabo za Repubulika ya Demokarasi ya Congo (FARDC) n’imitwe irimo FDLR ndetse ko yakomeje kuyiha intwaro.

Ku wa 23 Gicurasi 2022, nibwo Guverinoma y’u Rwanda yatangaje ko Ingabo za Congo, FARDC, zarashe ku butaka bw’u Rwanda, mu mirenge ya Nyange na Kinigi mu Karere ka Musanze na Gahunga mu Karere ka Burera.

Raporo y’impuguke za Loni igaragaza ko ubwo Itsinda rihuriweho rishinzwe kugenzura ibibazo byo ku mipaka (EJVM) ryajyaga mu iperereza, ryasanze hararashwe ibisasu umunani bya rokete za 122 mm.

Ivuga ko byakomerekeje bikomeye abantu babiri, byagiza n’ibintu nyinshi. Icyakora, ngo EJVM ntiyabashije kumenya neza inkomoko yabyo.

Ikomeza iti "Nk’uko byatangajwe n’abantu batatu bigenga, harimo babiri bafite imikoranire ya hafi n’imitwe yitwaje intwaro muri Rutshuru, Colonel Ruvugayimikore Protogène, alias Ruhinda, wa FDLR ni we wategetse ingabo ze kurasa ku butaka bw’u Rwanda."

Gusa ngo ubwo babazwaga n’izi mpuguke, umuvugizi wa FDLR yarabihakanye.

Iryo tsinda ngo ryakomeje gukora iperereza ku nkomoko y’ibi bisasu kimwe n’ababirashe cyangwa abatanze amabwiriza yabyo.

Raporo ikomeza iti "Itsinda ryasanze FARDC ifite ibisasu bya 122 mm, ariko izi ntwaro ntabwo iri tsinda ryazisanganye FDLR."

Muri bwa buryo bwo gutanga intwaro, birashoboka ko ibisasu byavuye ku basirikare ba Leta, bikaraswa n‘abandi bo muri FDLR.

Major Willy Ngoma

Uretse Colonel Ruhinda, undi wafatiwe ibihano ni Willy Ngoma uvugira umutwe wa M23/ARC.

EU yavuze ko M23/ARC "igira uruhare mu makimbirane akoreshwamo intwaro n’umutekano muke muri RDC, by’umwihariko binyuze mu bugizi bwa nabi no guhungabanya uburenganzira bwa muntu cmu bikorwa birimo bwicanyi, kugaba ibitero no guhohotera abasivili bishingiye kugitsina."

Ngoma ashinjwa ko yagize uruhare mu kubitegura no kubiyobora.

Uyu mutwe washinzwe ugamije kurwanira uburenganzira bw’abanye-Congo bo mu burasirazuba bw’igihugu basaga n’abatereranywe na Leta, muri iyi minsi ntabwo worohewe mu rugamba uhanganyemo n’ingabo za Leta.

Nubwo urimo gutsinda ku masasu, muri dipolomasi uri ku gitutu gikomeye.

Ubu urimo gushinjwa na Leta ya Congo na MONUSCO ko mu mirwano yawo n’imitwe ya FDLR, Mai Mai Mazembe na Nyatura ku wa 29/30 Ugushyingo 2022, wishe abasivile 131 mu duce twa Kishishe na Bambo.

Nyamara MONUSCO yemera ko iperereza ryakozwe mu buryo bwo kubaza abantu bahunze kuko itari kubasha kugera mu gace kagenzurwa na M23, ndetse ngo nabyo byakorewe muri Rwindi, muri kilometero 20 uvuye muri Kishishe.

Willy Ngoma ni umwe mu bayobozi ba M23 bafatiwe ibihano

Nkalubo wa ADF

Ku rutonde kandi hashyizweho Meddie Nkalubo a.k.a. Mohammed Ali Nkalubo; Abul Jihad cyangwa Punny Boy, umwe mu bayobozi b’umutwe wa ADF.

Nubwo ibyaha aregwa yabikoreye muri RDC, ibikorwa bye byakoze no ku Rwanda nk’uko bigaragara muri raporo yamurikiwe Akanama k’Umuryango w’Abibumbye gashinzwe umutekano ku wa 10 Kamena 2022, igaruka ku maperereza yakozwe kugeza aku wa 15 Mata.

Ku wa 1 Ukwakira 2021 Urwego rw’Ubugenzacyaha mu Rwanda rwemeje ko ku bufatanye n’izindi nzego z’umutekano, hafashwe abantu 13 mu mezi ya Kanama na Nzeri 2021 bakekwaho gukorana na ADF, mu mugambi wo gutera ibisasu ahantu hatandukanye mu Umujyi wa Kigali.

Icyo gihe hanafashwe ibintu bitandukanye byagombaga kwifashishwa mu gukora ibisasu birimo imisumari, insinga, intambi, sim card n’ibindi.

Ibyo bisasu ngo byagombaga guterwa kuri City Tower no kuri sitasiyo i Nyabugogo, "nubwo ngo imigambi y’ibanze yaje guhindurwa yari iyo kwibasira abayobozi b’Ingabo na Polisi by’u Rwanda."

Raporo ikomeza iti "Rishingiye ku mvugo z’abakekwa no ku makuru yatanzwe n’inzego z’iperereza, Itsinda ry’impuguke ryemeje imikoranire muri uwo mushinga wo gutera ibisasu na ADF, by’umwihariko uruhare rukomeye rwa Meddie Nkalubo."

Uyu Nkalubo ni umwe mu bantu bakomeye muri ADF haba mu icengezamatwara ndetse no mu buyobozi bw’uyu mutwe, muri Ituri.

Ubuyobozi bw’u Rwanda bwaje kumenyesha iri tsinda ko batatu mu bantu bari bafashwe barekuwe, kubera ibura ry’ibimenyetso bihagije ku ruhare rwabo mu mugambi wo gutera ibisasu.

Ismael Niyonshuti, umunyarwanda winjijwe muri uyu mugambi na Nkalubo binyuze kuri mugenzi we Abdulaziz wasanze Nkalubo muri RDC muri Werurwe 2021, afatwa nk’uwari ku ruhembe rw’ibi bikorwa.

Nkalubo kandi ngo yaje kohereza mu Rwanda uwitwa Omar Farouk alias Adamu Nyange, wagombaga gutegura ibyo bitero afatanyije na Niyonshuti.

Raporo ivuga ko "Ku mabwiriza ya Farouk na Nkalubo, wari wasobanuye ko umugambi wabo ari uguhora ku bikorwa by’ingabo z’u Rwanda kuri ASWJ muri Cabo Delgado in Mozambique, Niyonshuti yinjijemo inshuti ze nyinshi."

Ibikoresho bagombaga kwifashisha bakora ibisasu ngo byaturutse muri RDC, ndetse ngo uwabibazaniye aracyashakishwa.

Justin Bitakwira

Justin Bitakwira wavutse ku wa 5 Ukuboza 1960, ni umunyepolitiki w’Umunye-Congo wabaye Minisitiri ushinzwe iterambere ry’icyaro ndetse ubu ni umudepite ku rwego rw’igihugu, ubarizwa mu ishyaka Union pour la nation congolaise (UNC).

Ashijwa ko mu mvugo ze, Bitwakwira "yakomeje gukoresha imvugo zibiba urwango n’ivangura byibasira Abanyamulenge, bakomeje kwibasirwa ndetse bakagabwaho ibitero n’imitwe yitwaje intwaro."

EU yakomeje iti "Aya magambo rutwitsi n’imvugo byagize uruhare mu guhembera amacakubiri n’ubugizi bwa nabi muri RDC, by’umwihariko mu gace k’imisozi miremire yibasiwe n’amakimbirane ashigiye ku moko."

Bityo, ngo Justin Bitakwira yagize uruhare mu guhembera amakimbirane akoreshwamo itwaro n’umutekano muke muri RDC.

Bitakwira yafatiwe ibihano kubera imvugo zihembera urwago

Joseph Nganzo Olikwa TIPI

Joseph Nganzo Olikwa Tipi yabaye umuyobozi wa batayo ya 312 mu Ngabo za Congo, FARDC, kugeza muri Mutarama 2022.

Ingabo yari ayoboye ngo zagabye ibitero ku basivili zinakora ibindi byaha byibasiye uburengazoira bwa muntu birimo gufata abagore ku ngufu hagati ya Kamena n’Ukuboza 2021.

Joseph Nganzo Olikwa Tipi kandi nka Colonel, yabaye umuyobozi wugirije wa Brigade ya 12 ishinzwe ubutabazi bwihuse (Rapid Reaction Brigade) muri Minembwe, mu Ntara ya Kivu y’Epfo.

Ashinjwa uruhare mu byaha abasirikare yari ayoboye bagizemo uruhare.

Abandi bafatiwe ibihano ni Désiré Londroma Ndjukpa a.k.a. Désiré Lokana Lokanza, umwe mu bayobozi b’umutwe wa Coopérative pour le développement du Congo-Union des révolutionnaires pour la défense du peuple congolais (groupe Codeco-URDPC), ashinzwe ibikorwa bya gisirikare, na William Yakutumba usanzwe ari Umunyamabanga mukuru akaba n’umuyobozi wa Coalition Nationale du Peuple pour la Souverainité du Congo (CNPSC), ihuriro rizwi nka Mai-Mai Yakutumba.

Alain Francois Viviane Goetz

Alain Goetz ni umucuruzi ufite ikigo kizwi nka African Gold Refinery Ltd, cyanditswe muri Uganda.

EU ivuga ko "guhera mu 2016, African Gold Refinery Ltd yakiriye, igura, itunganya ndetse icuruza zahabu itemewe n’amategeko yaturutse mu birombe byo muri RDC, bigenzurwa n’imitwe yitwaje intwaro irimo Mai-Mai Yakutumba na Raia Mutomboki, igira uruhare mu gutea umutekano muke mu Ntara ya Kivu y’Amajyepfo."

Bityo, ngo Alain Goetz yungukiye mu makimbirane yitwaje intwaro n’umutekano muke muri RDC, binyuze mu bucuruzi butemewe bw’amabuye y’agaciro.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .