00:00:00 IGIHE NETWORK KN KINYARWANDA EN ENGLISH FR FRANCAIS

Hari uwabonye kaburimbo afite imyaka 50! Impinduka mu mibereho y’Abanya-Gisagara

Yanditswe na Ntabareshya Jean de Dieu
Kuya 25 Ukuboza 2022 saa 09:00
Yasuwe :

Waravukiye hafi y’umuhanda wa kaburimbo byagorana kwiyumvisha ko hari umuntu warinze agira imyaka 50 atazi uko isa uretse kuyireba mu mafoto cyangwa kuyibona ari uko yavuye mu Karere atuyemo ageze mu kandi.

Ibi si amagambo ni impamo kuko abaturage bo mu Karere ka Gisagara mu Majyepfo y’u Rwanda, nubwo gafite amateka yo kuba harubatswe kiliziya ya mbere mu Rwanda ariko babonye umuhanda wa kaburimbo mu 2019.

Muri uwo mwaka nibwo umuhanda bemerewe na Perezida wa Repubulika y’u Rwanda wubatswe bituma abanyantege nke bitorohaga kugera Huye ngo babone kaburimbo na bo ibageraho.

Ni umuhanda wa kilometero 13.8 uturuka i Huye ukagera ku biro by’Akarere ka Gisagara watwaye agera kuri miliyari 6.5Frw.

Bamwe mu baturage bo mu Karere ka Gisagara bwiye IGIHE ko bafite ibyishimo kuba kaburimbo bemerewe n’umukuru w’igihugu yarabagezeho.

Mukaburasa Pascasie ati “Ni ibitangaza kuba iwacu hageze kaburimbo; dufite ishimwe rikomeye kuri Perezida wacu Paul Kagame uhora udutekerezaho yifuza kutuzanira amajyambere. Turizera ko izagezwa no mu yindi mirenge.”

Gasana Gerard asanga uwo muhanda uje guhindura amateka ya Gisagara yahoze itagira kaburimbo mu mateka yayo

Ati “Gisagara ni ko Karere kari gasigaye mu Rwanda nta kaburimbo kagira, bivuze ko ubu amateka yahindutse tugiye kwinjira mu ruhando rw’iterambere.”

Nubwo bimeze bityo ariko na none hari umuturage wo mu Murenge wa Mamba uri mu birometero 35 uvuye mu Mujyi wa Gisagara, utazi kaburimbo bityo bakifuzaga ko yakomeza ikazagezwayo.

Ibikorwa remezo birivugira

Nyuma yo kubakirwa umuhanda, abegereye hafi yawo batangiye kubaka ku buryo bugezweho, abandi bazamura inzu z’ubucuruzi ku buryo umuntu uvuye Huye yerekeza Gisagara abona ko hari iterambere ridasanzwe.

Ibi bikorwa remezo byagezweho biturutse mu misoro itangwa n’abanyarwanda byahinduye ishusho yako cyane ko ibikorwa by’iterambere bitangiye gushyirwamo imbaraga.

Uyu muhanda wabaye umusemburo w’ibikorwa byiza birimo kuzamura inyubako zigezweho nka Gisagara Urugero rw’ibishoboka Arena, Guest House Hotel yubatswe n’Akarere n’inyubako y’isoko rya Gisagara.

Mu bindi bikorwa bihari ni uko buri Kagari gafite Poste de Santé mu gihe ingo zifite amashanyarazi ziri ku kigero cya 52%.

Hari kandi Gymnasium yubatswe kuri ubu yifashishwa mu mikino itandukanye y’Intoki nka Volleyball cyane ko habarizwa ikipe ya Gisagara Volleyball Club iri mu akomeye mu gihugu.

Mu cyanya cyahariwe inganda hari uruganda rutunganya ifu ya kawunga mu bigori hamwe n’urwenga umutobe mu bitoki, hari kandi uruganda ruzatunganya inyama mu buryo bugezweho.

Abikorera nabo bakomeje gutinyuka bafatanyije n’abaturage aho biyubakiye uruganda rutunganya umuceri rwa Gikonko kandi rwahinduye byinshi ku bahinzi no ku iterambere ry’Akarere.

Benshi bemeza ko iterambere bageraho rifite imvano kuri uyu muhanda wa kaburimbo bagejejweho nk’uko Umuyobozi w’Akarere Rutaburingoga Jerome aherutse kubitangariza IGIHE.

Ati “Iyi kaburimbo irahindura amateka ya Gisagara n’imibereho myiza y’abaturage iganisha ku iterambere. Ibyo bikorwa byose bizatanga akazi bitume haba ubuhahirane. Abanya-Gisagara bahishiwe byinshi byiza bituruka kuri uyu muhanda.”

Hitawe kandi ku mpinduka z’imibereho myiza y’abaturage hubakwa imidugudu y’icyitegererezo irimo n’uwa uwa Mamba n’uwa Mukindo yakuye ubuzima bw’abaturage mu kaga.

Abatujwe muri iyi midugudu bahawe n’amatungo arimo amatungo magufi nk’ingurube, ihene abandi bahabwa inka. Bishimira ko Leta yabatekerejeho bakavanwa mu manegeka nkuko Nibagwire Thérèse abivuga.

Ati “Inzu nabagamo nari naragowe! Narebaga uko imvura igwa cyangwa izuba riva. Iyo yagwaga nugamaga muri wese kuko ariho hatavaga yahita nk’injira mu nzu nkayora ikiziba cyaretse mu nzu.”

Yakomeje ati “Nasaga n’ingurube rwose. Ubu ndashimira Nyakubahwa Perezida wacu, data na mama barambyaye ariko we yambyaye ubwa kabiri. Yampaye inka kandi imaze kubyara iya kabiri. Ubu ndakaraba kumwanywa namara kuryoha nkaryama ku gitanda cya chef.”

Muri aka Karere kandi hubatswe uruganda runini mu zitunganya Nyiramugengeri ikabyazwamo amashanyarazi mu Rwanda, rwa Gisagara Peat Power Plant ruzatunganya nibura megawati 80.

Uru ruganda ruzahindura byinshi kuko rwatanze akazi ku baturage ba Gisagara ndetse rukazanongera ingano y’umuriro w’amashanyarazi akoreshwa mu gihigu.

Imibare y’Ikigo cy’imisoro n’amahoro igaragaza ko Gisagara yinjiza mu isanduku ya Leta asaga miliyari 9,8 Frw avuye kuri miliyari 2 Frw gusa mu 2015.

Iterambere ry’aka Karere kandi rigera no mu buhinzi aho kuri ubu muri aka Karere habarizwa inganda zitandukanye zitunganya umusaruro w’ibikomoka ku buhinzi kandi bifasha abaturage mu iterambere.

Mu nzego zinyuranye ugeze muri Gisigara utahaherukaga wabona ko hari urugendo rukomeye u Rwanda rwakoze kugira ngo ruteze imbere bimwe mu bice byirengagizwaga.

Abatujwe muri iyi midugudu bagaragaza ko bakuwe ahabi
Imidugudu igezweho yatujwemo abatishoboye muri Gisagara
Buri muryango watujwe wahawe n'inka
Uru ruganda rwa nyiramugengeri rwitezweho impinduka zidasanzwe
Uruganda rwa Nyiramugengeri ruherereye mu Karere ka Gisagara
Benshi mu baturage bo muri Gisagara bahawe akazi mu ruganda rwa nyiramugengeri

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .