00:00:00 IGIHE NETWORK KN KINYARWANDA EN ENGLISH FR FRANCAIS

Hari abishyura asaga miliyoni 7 Frw: Ibyo wamenya kuri École Belge de Kigali ifite amateka yihariye mu Rwanda

Yanditswe na Ntabareshya Jean de Dieu
Kuya 23 Ugushyingo 2022 saa 04:19
Yasuwe :

Imyaka 57 irashize u Bubiligi bushinze ishuri ryigishirizwagamo abana b’abakozi baturuka muri iki gihugu. Ryaje gufungurira amarembo n’abandi babafite ubushobozi, ubu École Belge de Kigali ni rimwe mu mashuri y’icyitegererezo u Rwanda rufite.

Ni ishuri ubu rikorera i Kigali mu Karere ka Gasabo mu Murenge wa Gisozi, nubwo benshi barimenye rikorera mu Mujyi wa Kigali rwagati.

Ni benshi barinyuzemo bahashye ubumenyi bubaba umusingi uhamye, cyane ko ritanga ubumenyi mpuzamahanga ku rwego rw’amashuri y’inshuke, abanza n’ayisumbuye.

Umuyobozi wa École Belge de Kigali, Pierre Dulieu, ahamya ko rimaze kugira uruhare rukomeye mu guteza imbere uburezi mu Rwanda. Yari mu kiganiro na IGIHE.

Ati "Ni ishuri rimaze igihe muri Kigali, ryashinzwe n’abaturage b’ababiligi bakoreraga mu Rwanda ngo bigishirizemo abana babo ariko ubu twakira buri wese. Dufite intego yo kuba ikigo mpuzamahanga cyihariye tukagira imyigishirize iri imbere, kandi umwihariko wacu ni uko twigisha mu gifaransa."

Ni ishuri rigendera ku nteganyanyigisho zo mu Bubiligi, ikanatanga impamyabumenyi zo muri icyo Bubiligi.

Ibyo bituma abanyeshuri barangije muri iri shuri boroherwa no kujya kwiga muri kaminuza zo mu bihugu bifite uburezi buteye imbere.

Dulieu yakomeje ati "Intego yacu nyamukuru ni uko abanyeshuri barangirije iwacu baba bashobora kujya kwiga muri kaminuza aho ari ho hose ku Isi."

Iri shuri rifite abanyeshuri barenga 550 bo mu mashuri abanza n’ayisumbuye, biganjemo Abanyarwanda n’abanyamahanga baturuka mu bihugu bitandukanye.

Nubwo bigisha mu Gifaransa, uyu muyobozi yavuze hari gahunda yo gufasha abana batavuga Igifaransa cyangwa bafite imbogamizi zitandukanye mu kuvuga urwo rurimi, ku buryo bagera ku rwego rwiza mu kuruvuga.

Harimo n’abiga Icyongereza, kandi hifuzwa ko nabo baba intangarugero muri urwo rurimi.

Ugeze muri iri shuri, udashishoje neza ushobora kugira ngo abo usanze ni abanyamahanga kubera uburyo Igifaransa kiba kididibuzwa buhanga, uhereye ku mwana muto wiga mu mashuri y’inshuke kugera ku wiga mu mashuri yisumbuye.

Imigishirize irihariye

Buri mwana yitabwaho mu masomo, ku buryo agira ubumenyi bukenewe mu ishuri no hanze haryo.

Dulieu ashimangira ko biherwa mu guhitamo abarimu, kuko harebwa abafite ubuhanga n’ubushobozi mu kwigisha. Biganjemo abaturutse mu Bubiligi, n’abanyarwanda bake b’intoranywa.

Bigendanye no kuba abanyeshuri bakora ibizamini bya Leta biturutse mu Bubiligi, abana bigisha bifashishije porogamu zikoreshwa muri icyo gihugu.

Yakomeje ati "Tugerageza gufasha abanyeshuli bacu kubaka intangiriro y’ubumenyi bwabo n’ibyo biga. Ibi bivuze ko abana tubafasha kuvumbura amakuru akenewe mu buzima bwabo n’imyigire igezweho."

Bitandukanye na ya myigishiriza yo guha umwana ibintu akabifata mu mutwe cyangwa ukavuga agasubiramo.

Ahubwo umwana afashwa kuvumbura ubumenyi bwihariye, aho kumuha buri kimwe cyose akeneye.

Christelle Olame Cizungu wiga muri Ecole Belge de Kigali, yavuze ko kwiga muri iki kigo byamufunguye amaso, ku buryo bimufasha gutegura neza ejo hazaza he.

Ati "Muri iri shuri hari ibintu utapfa gusanga ahandi. Nakunze uburyo bw’imyigishirize n’uburyo bagufasha. Abarezi bagufasha kumva neza ibyo wigishwa."

Bisaba iki ngo umwana yige muri ishuri?

Pierre Dulieu avuga ko nibura 75% by’amafaranga y’ishuri yishyurwa n’abanyeshuri ajya mu mishahara y’abarimu n’abakozi b’iki kigo.

Muri rusange ariko ntabwo ari amafaranga apfa kwigoderwa na buri wese.

Ati “Urebye igice kinini cy’amafaranga yishyurwa n’abanyeshuri kigenda ku barimu. Ayo dusigarana ni make cyane. Dukoresha nibura ¾ byayo ku barimu gusa, asigaye akagendera mu tundi dukenerwa. Twebwe nta nyungu yindi dukenera kuko tudaharanira inyungu.”

Kugira ngo umwana yige muri École Belge de Kigali, ku mwaka bisaba hagati ya miliyoni 4,5 Frw mu mashuri y’inshuke na miliyoni 7 Frw mu mashuri yisumbuye.
Inama y’ababyeyi ni yo igena amafaranga azishyurwa ku mwaka.

Amategeko ya École Belge de Kigali ateganya ko amafaranga y’ishuri yishyurwa mu ntangiriro za buri gihembwe.

Bitewe no kuba umwaka w’amashuri ugira ibihembwe bitatu, aya mafaranga y’ishuri yishyurwa mu ntangiriro za buri gihembwe, aho umwana wiga mu mashuri y’inshuke yishyura miliyoni 1,2 Frw, uwiga mu abanza akishyura miliyoni 1,3 Frw.

Mu mashuri yisumbuye naho bigiye bitandukanye bigendanye n’ibyiciro.

Uwiga mu mwaka wa mbere no mu wa kabiri yishyura miliyoni 1,8 Frw, uwiga mu wa gatatu no mu wa kane akishyura arenga miliyoni 2 Frw, mu gihe uwiga mu wa gatanu no mu wa gatandatu akishyura miliyoni 2,2 Frw.

Nubwo bimeze bito ariko, iyo umwana ugiye kwiga muri iri shuri ari uw’umukozi wa ambasade cyangwa imiryango mpuzamahanga, amafaranga ariyongera kuko umukoresha we ari we wishyura ikiguzi cy’uburezi bw’umwana.

Ashobora kandi kugabanyuka mu gihe umunyeshuri ari umwana w’umukozi wa
Ecole Belge de Kigali, mu kumworohereza no kumushimira umusanzu we.

Uburezi buherekezwa n’uburere

Uretse amasomo abana bahabwa, banafashwa kugira indangagaciro zizabafasha mu buzima bwa buri munsi nko gufasha, gusabana, urukundo, kwishakamo ibisubizo no kuzamura impano mu mikino itandukanye.

Pierre Dulieu umaze imyaka itatu ku buyobozi bwa École Belge de Kigali, yavukiye mu Rwanda ndetse yanahabaye imyaka 10 mbere y’uko umuryango we wimukira mu Bubiligi.

Yashimye uburyo u Rwanda ruri gushyira imbaraga mu guteza imbere uburezi kuri bose, yemeza ko ari kimwe mu bihugu bya Afurika bifite uburezi buhamye kandi butanga icyizere ku hazaza.

École Belge de Kigali yagaragaje ko yifuza kuba igicumbi cy’uburezi bufite ireme, ku buryo ishobora kuzajya ikorana n’inzego za Leta zishinzwe uburezi mu Rwanda ku buryo basaranganya ubumenyi no gutanga amahugurwa ku bakora muri izi nzego.

U Bubiligi bwifuza kuzamura ireme ry’uburezi muri Afurika binyuze mu mashuri yigisha muri porogaramu ikoreshwa muri iki gihugu.

Aya mashuli azwi nka École Belge aboneka mu Rwanda, mu Burundi, muri Repubulika Iharanira Demokarasi ya Congo no muri Maroc.

Ecole Belge de Kigali ikorera ku mu Karere ka Gasabo ku Gisozi
Iri shuri ritanga impamyabumenyi yo ku rwego mpuzamahanga
Buri wese aba afite intego yo gutsinda no gukora cyane
Abana barangije muri iri shuri bahabwa impamyabumenyi mpuzamahanga
École Belge de Kigali imaze kurera benshi
Muri Ecole Belge de Kigali biga mu buryo mpuzamahanga
Abana biga muri Ecole Belge de Kigali bagira n'umwanya wo kwidagadura mu mikino itandukanye
Abanyeshuri muri Ecole Belge de Kigali baba bahuje urugwiro iyo bari mu mikino itandukanye
Ibyishimo biba ari byose kuri aba banyeshuri
Abanyeshuri bafashwa kuzamura impano zabo no mu mikino itandukanye
Ecole Belge de Kigali ikorera ku mu Karere ka Gasabo ku Gisozi
Ni ishuri ryagiye ryegukana ibikombe bitandukanye
Christelle Olame Cizungu wiga muri Ecole Belge de Kigali yavuze ko yishimira ubumenyi iri shuri ritanga
Abana bato baba basobanukiwe no kuvugira mu ruhame
Umuyobozi Mukuru wa École Belge de Kigali, Pierre Dilieu yagaragaje ko iri shuri rifasha abana kugira ubumenyi bubafasha guhangana ku ruhando mpuzamahanga

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .