Hari abarimu n’abakozi ba Kaminuza Gatolika baberewemo imishahara y’amezi umunani

Yanditswe na Prudence Kwizera
Kuya 18 Mata 2020 saa 09:57
Yasuwe :
0 0

Abarimu n’abandi bakozi ba Kaminuza Gatolika y’u Rwanda, Catholic University of Rwanda (CUR), bavuga ko amezi agiye kuba umunani badahembwa kandi bamwe muri bo bagowe n’imibereho muri ibi bihe.

Ni ikibazo bavuga ko cyatangiye mu mwaka wa 2015 bahembwa nabi bakabasigaramo ibirarane ndetse bakigaragariza ubuyobozi bw’iyo Kaminuza bukabizeza ko gikemuka ariko ntibikorwe.

Abafite iki kibazo cyo kudahembwa barimo abakorera ku cyicaro cy’iyi Kaminuza giherereye i Save mu Karere ka Gisagara ndetse n’abakorera ku ishami ryayo riri mu Mujyi wa Huye, ku i Taba.

Umwe muri bo yavuze ko muri iki gihe bagowe n’imibereho kandi bagerageje kubaza ubuyobozi bwa CUR ariko ntibwabaha igisubizo kibanyuze.

Yagize ati “Ni ukuvuga ngo kuva muri 2015 twatangiye guhembwa nabi bakadusigaramo nk’ibirarane by’amezi atatu gutyo gutyo. Ubu ukwezi baheruka kuduhembera ni ukwezi kwa Munani ku mwaka wa 2019; urumva ko baturimo n’ibirarane by’umwaka ushize.”

Abarimu n’abakozi ba CUR baganiriye na IGIHE bavuga ko imibereho yabo itifashe neza muri iki gihe cyo kuguma mu rugo birinda icyorezo cya COVID-19 bakifuza ko ubuyobozi bwa CUR bwakwita ku kibazo cyabo bukabashakira nibura umushahara w’amezi make.

Hari uwagize ati “Ubuzima ntabwo bwifashe neza kandi twarihanganye ntako tutagize; twifuza ko wenda baturebera ibituma tubaho muri iyi minsi, n’ubwo baduhemba ukwezi kumwe tukabasha kuba tubonye ibyo kurya.”

Kuri ubu bavuga ko iyo bagerageje guhamagara abayobozi ba CUR batabitaba ndetse n’iyo babandikiye batabasubiza.

Ubuyobozi bwa CUR bubivugaho iki?

Umuyobozi Mukuru wa CUR, Musenyeri Gahizi Jean Marie Vianney, yavuze ko icyo kibazo gihari ariko cyatewe n’ibibazo bitandukanye Kaminuza yabo ifite birimo kutabona amafaranga atangwa n’abanyeshuri ndetse n’arihirwa bamwe mu banyeshuri aturuka mu kigega gishinzwe gushyigikira no gutera inkunga abatishoboye barokotse Jenoside yakorewe Abatutsi (FARG).

Ikindi yagaragaje ni itinda ry’amafaranga atangwa n’abafatanyabikorwa bigatuma batabasha guhemba abakozi n’abarimu iki gihe.

Ati “Iyi nzara yateye itewe na Virus igiye kudukoraho byo! Bagiye batandukanye hari abo dufitiye amezi ane, atanu, hari n’ashobora kugeza muri ayo [umunani]; ibyo ni ibibazo bimaze igihe kinini ariko twari twarabifatiye ingamba.”

“Hari inama twigeze gukorana n’abahagarariye abakozi (…) kuko nabo barabyumva barabona ibibazo bihari muri za Kaminuza n’uko abanyeshuri bagabanyuka n’iki; twavuganye ko tubahemba noneho nyuma tukareba uburyo ibirarane bigenda bishiramo ariko tukabahemba buri kwezi.”

Musenyeri Gahizi avuga ko gahunda yo gukemura ibibazo by’imishahara y’abarimu n’abakozi ba CUR bari babitangiye ariko baza gukomwa mu nkokora n’ubushobozi buke.

Yijeje ko muri ibi bihe byo guhangana n’icyorezo cya COVID-19 bari gushakisha amafaranga make kugira ngo babe bayasaranganyije abakozi n’abarimu babashe kubona ibyo kurya.

Ati “Turi kubikoraho nk’uko twari twabivuganye mu nama n’abakuriye za serivise ko buri kwezi tuzajya tubahemba noneho tukazagira abo dukuramo ibirarane byagiye biza birimo amezi ane, atandatu, ndumva birimo n’ageze ku munani.”

“Ikibazo cy’ibanze ni ugutinda kw’amafaranga; ubungubu n’umuyobozi wungirije wa CUR twahoze tubivugana tureba amafaranga tugiye dufite hirya no hino […] turabizirikana kugira ngo turebe uburyo twakwegeranya byibuze tubone atuma abantu babaho.”

Musenyeri Gahizi yavuze ko hari n’uburyo bakora bwo kuguriza umwarimu cyangwa umukozi ukeneye amafaranga make akajya gukemura utubazo afite.

Yavuze ko kugeza ubu abakozi bose n’abarimu ba CUR bagera kuri 80 ariko adafite hafi ye umubare w’amafaranga y’ibirarane babafitiye. Gusa yijeje ko bari gukora ibishoboka byose ngo hatagira uwicwa n’inzara.

Aho ishami rya Kaminuza Gatolika y'u Rwanda rikorera ku i Taba mu Karere ka Huye
Umuyobozi Mukuru wa Kaminuza Gatolika mu Rwanda, Musenyeri Gahizi Jean Marie Vianney avuga ko bakomeje gushaka igisubizo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .