00:00:00 IGIHE NETWORK KN KINYARWANDA EN ENGLISH FR FRANCAIS

Haracyari urugendo: Imbamutima z’abakobwa 71 barangije amasomo yo gukora amashanyarazi

Yanditswe na Sonia Umuhoza
Kuya 2 Kanama 2022 saa 10:27
Yasuwe :

Abakobwa 38 basoje amahugurwa bahawe ku bijyanye n’urwego rw’ingufu n’amashanyarazi, bashimye umusanzu bakomeje guhabwa kugira ngo babashe kwisanga muri aka kazi.

Aya mahugurwa yahawe abanyeshuri 71 barangije amasomo yabo mu mashuri makuru y’Imyuga n’Ubumenyingiro, IPRC mu Rwanda nabo muri Kaminuza y’u Rwanda Ishami ry’Ubumenyi n’Ikoranabuhanga, akaba yaratanzwe muri gahunda ya WIRE y’umushinga wa USAID.

Aba bakobwa bahawe amasomo atandukanye mu bijyanye no kumenya gukora amashanyarazi no kuyashyira mu nzu ndetse bahabwa n’impamyabushobozi y’abemerewe gukora uyu mwuga mu Rwanda.

Muri icyo gikorwa byagaragaye ko abakobwa bakiri bake mu bijyanye n’ubumenyi ngiro birimo n’amasomo ajyanye no gukora amashanyarazi bitewe n’umuco wo kuvuga ko abakobwa ari abo kuguma mu rugo bakora imirimo, bigatuma bitinya.

Imibare yerekana ko abagabo bakora mu bijyanye n’ubumenyi ngiro ari 80% mu gihe abagore ari 20%.

Umuyobozi w’Ihuriro ry’abikorera mu mashanyarazi, Sunday Kabarebe yavuze ko mu ihuriro ryabo, abagore ari 40% abagabo 60%.

Yavuze ko abikorera ku giti cyabo mu by’ingufu z’amashanyarazi naho bigenda biguru ntege kuko buri sosiyete usanga abakozi b’abagore n’abakobwa ikoresha batageze kuri 2%.

Bamwe mu bakobwa bitabiriye aya mahugurwa bagaragaje ko bafite imbogamizi z’uko batagirirwa icyizere ko bashoboye bigatuma babura akazi nabo bikabaca intege.

Umutekinisiye w’amashanyarazi muri REG, Melise Dusabimana yabwiye Igihe ko uko guheza abakobwa bituma batitinyuka.

Yavuze kandi ko hari bagenzi be bahura n’ihohoterwa rishingiye ku gitsina

Bahati Nicole ni umwe mu bahawe aya masomo yavuze yarangije amasomo ye ariko adafite akazi ko gukora, agahitamo kujya gufata aya mahugurwa kugira ngo azamure imyumvire kubyo yize.

Ati “Ndangije muri KIST nitabiriye aya mahugurwa mbona nta kindi ndi gukora nibwo natangiye kwitabira izi gahunda. Kuyitabira byazamuye icyizere muri njye nabonye ubumenyi buhagije bwatumye mbona ko hari umusanzu ukomeye nkwiye gutanga ku gihugu na sosiyete.”

Yakomeje avuga ko abakobwa bakora muri iki gice bahura n’imbogamizi nyinshi zituma akazi kabo katagenda neza nk’uko bikwiye gusa bashimira buri wese utanga umusanzu kugira ngo bitinyuke.

Ati “Usanga abanyeshuri biga muri ibi bintu bijyanye n’ingufu barangiza amasomo bakajya mu rugo cyangwa mu kandi kazi bitewe no kuba batabona ko abakobwa bashobora aka kazi.”

“Turashimira PowerHer ikomeje gutanga amahugurwa nk’aya kuko iyo babaye icyitegererezo ku bakobwa bato nabo bigirira icyizere, ntibajye kwiga imyaka ine ngo bajye kwicara ahubwo baze bakore biteze imbere.”

PowerHer ni umuryango washinzwe n’abagore mu 2020, ufite intego yo gushishikariza abakobwa kwitabira amasomo y’imyuga n’ubumenyingiro cyane abiga iby’ingufu n’amashanyarazi, unabafasha mu mahungurwa abasaga 300 banyuze muri gahunda zabo.

Aba bakobwa bahuguwe bagaragaje ibyo bamaze kugeraho
Abakobwa bahawe amahugurwa bemeza ko azabafasha kwisanga ku isoko ry'umurimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .