Mu rwego rwo guteza imbere ireme ry’uburezi budaheza mu Rwanda, umuryango Handicap International ushyira mu bikorwa umushinga ugamije gushyiraho ibipimo n’amahame fatizo y’uburezi budaheza, wahaye Ikigo cy’Igihugu gishinzwe Uburezi (REB) imashini, DVD n’ibitabo bifasha mu myigire abafite ubumuga bwo kutabona.

Murenzi Vincent, Umuyobozi w’umushinga ugamije gushyiraho ibipimo n’amahamefatizo y’uburezi budaheza mu Rwanda (Inclusive Futures in Rwanda: Establishing and applying a set of national norms and standards in inclusive education), atangaza ko icyakozwe ari ukubanza gushyiraho amahame n’ibipimo fatizo, bizagenga ireme ry’uburezi budaheza mu Rwanda (Paper of norms and standards). Ikindi ni ukugaragaza inshingano za buri rwego no gutegura imfashanyagisho zifashishwa mu kubishyira mu bikorwa.

Murenzi agira ati “Ibi bimaze gukorwa, hakurikiyeho kubigerageza mu turere twa Rubavu na Kamonyi, tuzaba icyitegererezo (Pilot districts). Ibimaze kugerwaho ni uko u Rwanda ubu ruri mu bihugu bifite amahame n’ibipimo by’uru rwego kandi rwatangiye guteza imbere ireme ry’uburezi budaheza ku bana bafite ibibazo by’imyigire n’abafite ubumuga mu mashuri.”

Murenzi akomeza atangaza ko muri utwo turere tubiri twatangiyemo iyo gahunda, abana 1,017 bageze mu ishuri, 67% baratsinda neza kandi nta n’umwe wataye ishuri. Agira ati “Kugira ngo birusheho kugira ireme, abana batumva bafashijwe kubona ururimi rw’amarenga rwabafasha. Abatabona na bo bahawe ibikoresho ndetse n’Ikigo cy’Igihugu gishinzwe Uburezi, gifashwa mu buryo bwo kubategurira ibizamini. Ikigaragara ni uko umushinga wagaragaje ko ubu burezi bukenewe kandi bwagezwa hose mu gihugu.”

Gasinzigwa Peter, Umuyobozi mu ishami rishinzwe ibizamini muri REB atangaza ko ibyo bokoresho bahawe, bizafasha mu kuzamura ireme ry’uburezi, cyane cyane ku bafite ubumuga bwo kutabona.

Agira ati “Izi mashini zizadufasha mu gutegura ibizamini by’abafite ubumuga bwo kutabona. Na ho izi DVD zizadufasha mu kwigisha neza, kuko abanyeshuri bazamenya ururimi.”

Umushinga ugamije gushyiraho ibipimo n’amahame fatizo y’uburezi budaheza mu Rwanda, uterwa inkunga na Handicap International, mu rwego rw’udushya mu burezi (Innovation for Education) binyujijwe ku bufatanye bwa Leta y’u Rwanda n’iy’Ubwongereza.

[email protected]