00:00:00 IGIHE NETWORK KN KINYARWANDA EN ENGLISH FR FRANCAIS

Hamuritswe umushinga mushya ugamijwe guhindura Nyanza izingiro ry’ubukerarugendo.

Yanditswe na Akimana Jean de Dieu
Kuya 2 April 2022 saa 10:05
Yasuwe :

Umunyamabanga Uhoraho muri Minisiteri y’Ubutegetsi bw’Igihugu, Dusengiyumva Samuel, yijeje Ubuyobozi bw’Akarere ka Nyanza ubufatanye mu bikorwa bitandukanye bamuritse bizibanda ku bukerarugendo bushingiye ku muco n’amateka bwiswe "Royal Nyanza, Rwanda’s Cultural Hub", ishyirwa aka gace ku rwego rw’Igicumbi cy’Umuco.

Ni ubutumwa yatanze ku wa 31 Werurwe 2022 mu muhango wo kumurika ibiteganyijwe mu gishushanyo kizagenga ubukerarugendo buzajyana n’amateka ndetse n’umuco.

Igikorwa cyo gutangiza uyu mushinga cyitabiriwe n’abantu batandukanye barimo abayobozi mu nzego za Leta n’abakinnyi ba Rayon Sports, ikipe iri mu bafatanyabikorwa b’imena b’Akarere ka Nyanza, aho yavukiye.

Dusengiyumva yavuze ko iki gikorwa ari ingenzi ku Karere ka Nyanza n’igihugu, kizanafasha abaturage kwiteza imbere.

Yagize ati “Tuzakomeza kureshya abandi bashoramari kugira ngo bashore imari kuko ibikorwa ni byinshi bikubiye muri uyu mushinga uri muri gahunda yo guteza imbere akarere n’igihugu muri rusange.’’

Umushinga ushingiye ku bukerarugendo watangijwe i Nyanza witezweho gufasha abaturage bahaturiye kubona akazi no kwiteza imbere.

Umuyobozi w’Akarere ka Nyanza, Ntazinda Erasme, yavuze ko igishushanyo bamuritse kizibanda ku muco n’amateka, kizatuma aka gace kaba igicumbi cy’ubukerarugendo bubishingiyeho.

Yakomeje avuga ko cyitezweho kuzamura ubukungu bw’abatuye i Nyanza kuko abazabagana bazajya bakirwa neza bakishimira kuhasubira.

Yagize ati “Ni byo tumuritse igishushanyo kizibanda ku bukerarugendo bushingiye ku muco n’amateka, tucyitezeho kuzafasha abaturage bacu kwiteza imbere maze ubukungu bukazamuka ndetse abatugana bakakirwa neza, bagasura ibintu byinshi bitandukanye bakishimira kugaruka kuko babonye ibinyu byiza byatuma bishimira kuhasura. Hari bimwe mu bikorwa byatangiye gukorwa kandi turacyanakomeza kubyagura.’’

Muri uyu mushinga hazibandwa ku bikorwa birimo kubungabunga inzu yahoze ari Urukiko rw’Umwami izagirwa aho wasanga amakuru yose ajyanye n’ubukerarugendo bwa Nyanza; hari Umudugudu ndangamuco uzubakwa ukajya wigishirizwamo abakiri bato no kwagura ibikorwaremezo mu Rukari rw’Umwami hakaba hagari hakubakwamo inzu nshya kuko ubutaka bwabonetse.

Yagize ati “Muri uyu mushinga kandi twateganyije inzu izajya itanga amakuru ajyanye n’ubukerarugendo bw’akarere kacu ndetse turateganya kubaka umudugudu ndangamuco uzajya wigishirizwamo abakiri bato ibijyanye n’amateka n’umuco. Twamaze gutanga ingurane ku baturage bari baturiye urukari kugira ngo tuhagurire ibikorwa ku buryo uzahasura azabona byinshi bitandukanye.’’

Akarere ka Nyanza gafite amateka ahambaye mu Rwanda rwo hambere cyane ko habaye abami, bihagira igicumbi cy’ubukerarugendo.

Umuyobozi w’Inteko y’Umuco, Ambasaderi Masozera Robert, yavuze ko bifuje ko abahasura bakomeza kugira ibintu byinshi berekwa kandi bigaragazwa n’ibimenyetso bifatika.

Yagize ati “Ibi bikorwa bizaba bihuriweho n’inzego zitandukanye zirimo abikorera bo mu gihugu no hanze ndetse na leta. Tugamije kuhagira igicumbi cy’ubukerarugendo bushingiye ku muco, umurage n’amateka kuko hari ibimenyetso bigaragarira amaso kuko henshi usanga hari ibyagiye bizimira. Twifuza ko uzaza kuhasura yabona byinshi kurushaho kuko kugeza ubu abahaje usanga batabasha kubona ibintu baje gusura kubera ubuke bw’ibimenyetso n’ibikorwa. Nitumara kuhakora neza bazajya baza bifuze kuhahora ndetse n’inzira zizakoreshwa zajyaga zikoreshwa n’umwami n’abagaragu be.’’

Yakomeje avuga ko iki gitekerezo kigamije gufasha umuturage kwiteza imbere biturutse ku bikorwa bizashyirwa muri aka gace.

Kugeza ubu aka gace katangiye gusabirwa gushyirwa mu byanya ndangamurage by’Isi.

Ibikorwa byo kubaka no guhindura aka gace ntabwo biratangazwa ingengo y’imari bizatwara ariko ibikubiyemo byinshi bigenda byuzuzanya kandi bifitiye inyungu abaturage.

Mu Karere ka Nyanza hamuritswe umushinga w'ubukerarugendo uzafasha aka gace kuba ’Igicumbi cy’Umuco’
Ni intambwe yishimiwe cyane kandi yitezweho guteza imbere abaturage n'igihugu muri rusange
Umuco Nyarwanda wahawe umwanya muri iki gikorwa
Muri ibi bikorwa hanerekanywe ibikoresho bitandukanye byifashishwaga mu Rwanda rwo hambere
Abakinnyi ba Rayon Sports mu bitabiriye iki gikorwa
Perezida wa Rayon Sports FC, Uwayezu Jean Fidèle, mu bitabiriye iki gikorwa
Umuyobozi w’Inteko y’Umuco, Ambasaderi Masozera Robert, yavuze ko umushinga mushya watekerejwe gushyirwa i Nyanza hagamijwe gufasha abahasura kuhabonera ibimenyetso byinshi by'amateka
Umunyamabanga Uhoraho muri Minisiteri y’Ubutegetsi bw’Igihugu, Dusengiyumva Samuel, yijeje Ubuyobozi bw’Akarere ka Nyanza ubufatanye mu bikorwa bitandukanye bamuritse bizibanda ku bukerarugendo bushingiye ku muco n’amateka
Nyuma yo kumurika uyu mushinga hafashwe ifoto y'urwibutso
Hamuritswe umushinga mushya w’ubukerarugendo witezweho guhindura Nyanza ’Igicumbi cy’Umuco’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .