Hamuritswe ubushakashatsi ku byabangamiye uburenganzira bwa muntu mu Rwanda muri #GumaMuRugo

Yanditswe na Iradukunda Serge
Kuya 10 Ukuboza 2020 saa 04:25
Yasuwe :
0 0

Komisiyo y’Uburenganzira bwa Muntu yagaragagaje ko hari ibikorwa byagiye biba bikabangamira uburenganzira bwa muntu biturutse mu ngamba zitandukanye leta yashyizeho hagamijwe kwirinda ikwirakwira ry’icyorezo cya COVID-19.

Ibi Komisiyo y’Uburenganzira bwa Muntu yabitangaje kuri uyu wa 10 Ukwakira 2020 ubwo yashyiraga hanze ubushakashatsi yakoze ku ngaruka ingamba zashyizweho mu kwirinda icyorezo cya COVID-19 zagize ku iyubahirizwa ry’uburenganzira bwa muntu.

Ni umuhango wahuriranye n’uko Isi iri kwizihiza imyaka 72 y’Itangazo Mpuzamahanga ry’Uburenganzira bwa Muntu.

Ubu bushakashatsi bwakorewe mu turere dutatu muri buri ntara hakiyongeraho utwo mu Mujyi wa Kigali. Bwatangiye gukorwa muri Werurwe kugera mu Ukwakira 2020.

Mu ikorwa ry’ubu bushakashatsi hibanzwe ku ngingo zitandukanye zigize uburenganzira bwa muntu zirimo uburenganzira bwo kubaho, ubwo kwishyira ukizana n’umutekano, ubwo gutanga ibitekerezo, ubwo kubona amakuru, ubwo kujya aho ushaka, ubwo kubona serivisi z’ubuzima, ubwo gukora n’ubwo kwiga.

Komisiyo y’Uburenganzira bwa Muntu yagaragaje ko igihugu cyakoze ibishoboka byose kugira ngo cyubahirize uburenganzira bwa muntu ariko hanakurikizwa ingamba zo kwirinda COVID-19, gusa igaragaza ko hari aho inzego zitandukanye zagiye zitandukira uburenganzira bwa muntu ntibwubahirizwe.

Perezida wa Komisiyo y’Igihugu y’Uburenganzira bwa Muntu, Mukasine Marie Claire, yavuze ko ubu bushakashatsi bakoze bwaberetse ko hari ibintu bimwe na bimwe bitagenze neza mu iyubahirizwa ry’uburenganzira bwa muntu.

Yagize ati ’’Hari bimwe twagiye tubona bike bitagenze neza ariko icyo twavuga ni uko hari abantu bagiye bakoresha imbaraga zirengeje, icyiza twabonye ni uko ababikoze bakurikiranywe, hari abafatiwe ibyemezo binyuranye hari imanza zagiye mu nkiko ziraburanishwa, abantu bakatirwa ibyaha bakoze muri icyo gihe.’’

Bimwe mu bikorwa iyi komisiyo yagaragaje nk’ibyahonyoye uburenganzira bwa muntu mu gihe cya COVID-19.

Gufunga amashuri

Ubwo icyorezo cya COVID-19 cyageraga mu Rwanda amashuri ari mu bikorwa bya mbere byafunzwe, maze abanyeshuri boherezwa mu rugo.

Komisiyo y’Uburenganzira bwa Muntu yagaragaje iki gikorwa nk’icyabangamiye uburenganzira bwo kwiga.

By’umwihariko yerekanye ko abakozweho cyane ari abana bo mu giturage ndetse n’abaturuka mu miryango itifashije, kuko batabashije kugerwaho n’uburyo bwiganjemo ubw’ikoranabuhanga leta ifatanyije n’abikorera yashyizeho kugira ngo abana bakomeze amasomo.

Gusa yashimye Leta no kuba yaragize umuhate wo gutekereza ku buryo bw’ikoranabuhanga bwafasha abana gukomeza kwiga.

Kwirukana no gusubika amasezerano kw’abakoresha

Komisiyo y’Uburenganzira bwa Muntu yagaragaje ko ubwo igihugu cyashyiragaho ibihe bya Guma mu rugo abakoresha benshi cyane cyane abigenga bihutiye gusubika no kwirukana bamwe mu bakozi babo ndetse abenshi babikora mu buryo bunyuranyije n’amategeko.

Iki gikorwa ngo cyabangamiye uburenganzira bwa muntu, mu gihe igihugu cyari gihanganye na COVID-19. Gusa iyi komisiyo yashimye Leta kuko nta mukozi wayo yigeze yirukana no muri icyo gihe.

Gusubika imirimo y’inkiko

Uburenganzira bwo guhabwa ubutabera kandi mu gihe gikwiye ni bumwe mu bwo ikiremwa muntu kigombwa, gusa igihe igihugu cyari mu bihe bya Guma mu rugo byabaye ngombwa ko n’imirimo y’inkiko isubikwa abateganyaga kuburanishwa, ntibaburanishwa bituma n’ibyo bagenerwa n’amategeko bitubahirizwa.

Nubwo bwari bumwe mu buryo bwo kwirinda, Komisiyo y’Uburenganzira bwa muntu yagaragaje ko byahonyoye uburenganzira abantu bemererwa n’amategeko ariko ishima ko ubwo ibihe bya Guma mu rugo byarangiraga Leta yihutiye gushyiraho uburyo bwo kuburanisha imanza hifashishijwe ikoranabuhanga.

Guhagarika ibikorwa byo gusura abagororwa

Kugeza n’uyu munsi ibikorwa byo gusura abagororwa ni bimwe mu bitarakomorerwa, iki cyemezo cyo kuba imiryango yarabujijwe gusura abayo bafunzwe cyatangiye kubahirizwa muri Werurwe, nyuma y’igihe gito icyorezo cya COVID-19 kigeze mu Rwanda.

Komisiyo y’Uburenganzira bwa Muntu yagaragaje iki cyemezo nk’icyahonyoye uburenganzira bw’imfungwa n’abagororwa bubemerera gusurwa n’imiryango yabo.

Nubwo bimeze gutya ariko iyi komisiyo yashimye zimwe mu ngamba zashyizweho na Leta zirimo nko gushyiraho nimero imiryango y’imfungwa n’abagororwa ishobora gukoresha iboherereza amafaranga baguramo ibintu bitandukanye bakenera.

Leta kandi yanashimye kuba Leta yarashyizeho uburyo bwo kugenera abagororwa bafite ibibazo by’uburwayi amafunguro yihariye, cyane ko imiryango yabo itari icyemerewe kubasura ngo ibazanire ibyo kurya bashoboye.

Mu bindi byagaragajwe muri ubu bushakashatsi harimo abantu bane barashwe na Polisi y’u Rwanda mu gihe yari irimo igenzura uko amabwiriza yo kwirinda COVID-19 yubahirizwa ndetse n’abasirikare batawe yombi bakurikiranyweho ibyaha byo guhohotera abaturage bo muri Kangondo ahazwi nka Bannyahe ho mu Murenge wa Remera mu Karere ka Gasabo.

Komisiyo y’Uburenganzira bwa Muntu yashimye izi nzego kuko ababikoze bagejejwe imbere y’ubutabera ndetse inzego abakoze amakosa babarizwamo zikagerageza gufasha imiryango ya ba nyakwigendera n’abahohotewe.

Minisitiri w’Ubutabera akaba n’Intumwa nkuru ya Leta, Johnston Busingye, yavuze ko u Rwanda rwakoze ibishoboka byose kugira ngo rurwanye COVID-19 ariko n’ingaruka ingamba zafashwe zishobora kugira ku burenganzira bwa muntu zibe nke cyane.

Yakomeje avuga ko abantu bakwiye kwirinda COVID-19 kuko nayo ubwayo ibabuza uburenganzira bwinshi burimo n’ubwo kubaho.

Ati “Isano iri hagati ya COVID-19 n’uburenganzira bwa muntu iragaragara kandi irumvikana, iyi virusi ni ikibazo ku buzima. Ishobora gutwara ubuzima, kandi yarabikoze mu bihugu byinshi yo hirya no hino ku Isi no mu Rwanda yishe 53.”

Komisiyo y’Uburenganzira bwa Muntu yasabye Leta ko gukomeza igenzura kugira ngo ahagiye hagaragara ibibazo ntibizongere kubaho cyane ko n’ubundi igihugu kikiri mu bihe byo guhangana n’icyorezo cya COVID-19.

Minisitiri w'Ubutabera akaba n'Intumwa Nkuru ya Leta, Busingye Johnston, yavuze ko igihugu cyakoze ibishoboka byose ngo kirwanye COVID-19 n'uburenganzira bwa muntu bwubahirizwa
Iki gikorwa cyahuriranye n’uko Isi iri kwizihiza imyaka 72 y’Itangazo Mpuzamahanga ry’Uburenganzira bwa Muntu
Umuyobozi wa Transparency International Rwanda, Ingabire Marie Immaculée, ni umwe mu bitabiriye iki gikorwa
Abitabiriye iki gikorwa basusurukijwe n'itsinda ribyina Kinyarwanda
Perezida wa Komisiyo y’Igihugu y’Uburenganzira bwa Muntu, Mukasine Marie Claire, yavuze ko hari aho uburenganzira bwa muntu bwagiye buhonyorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .