Hahishuwe ibyago abari muri gereza baterwa n’abo bashakanye cyangwa abo basigiye imitungo

Yanditswe na Evariste Nsengimana
Kuya 10 Gashyantare 2020 saa 12:23
Yasuwe :
0 0

Umuryango utari uwa leta urengera uburenganzira bwa muntu (ARDHO), watangaje ko hari abantu bakomeza gufungwa kandi bararangije igihano, hakaba abatinda gukorerwa dosiye bikitwa ko bafunze iminsi 30 y’agateganyo ndetse n’abicwa barozwe byose bikorwa n’ababa badashaka ko basubira mu miryango yabo.

Uwo muryango utangaza ko bikorwa n’abo mu miryango yabo cyangwa abandi basigiye imitungo bakaba barayigurishije cyangwa babona ko bagarutse babangamira inyungu zabo. Gusa ngo hari n’igihe bikorwa n’abafasha babo igihe bamaze kwinjirwa n’abandi bagabo baranabyaranye.

Mu bushakashatsi uwo muryango wakoze mu 2016 utangaza ko wasanze hari abantu bagera ku 8% b’abari bafunze muri icyo gihe bararangije igihano, ku buryo ngo hari abari bafunze imyaka itandatu barakatiwe itatu. Abagera kuri 11% bari bafunze bataraburana barimo n’abari bamaze igihe kirengeje imyaka itatu nta dosiye.

Umunyamabanga Nshingwabikorwa wa (ARDHO), Jonas Munyagasiza, avuga ko bifitanye isano n’abo mu miryango yabo cyangwa abandi bafite inyungu mu kuba bafunze.

Ati “Bariya bantu bafunze ibibazo bafite bari kubiterwa na bene wabo. Kubera ko yamugurishirije umurima, wenda yamugurishirije inzu amaze gufungwa ugasanga ntiyifuza ko afungurwa.”

Bamwe mu bagore bafite abagabo bafunze nabo ngo iyo bamaze kwinjirwa n’abandi bagabo biba intandaro yo kwifuza ko abagabo babo batazava muri gereza.

ARDHO itangaza ko muri Gereza ya Musanze, hari umugabo wari usigaje iminsi irindwi ngo afungurwe, umugore we amugemurira igitoki kirimo uburozi arapfa.

Ibyo ngo byatewe n’umugabo wamwinjiye akamubyaraho abana batatu umugabo we yarafunzwe bafitanye umwe. Bikekwako byaturutse ku kimwaro yagize cy’uburyo azabisobanurira umugabo we cyangwa akagambane n’uwari waramwinjiye.

Ati “Hari ikibazo twabonye Musanze gikomeye cyane kubera ko umugore hari undi mugabo wari wamaze kumwinjira, uwo mugore yamugemuriye [umugabo we] igitoki kirimo uburozi kubera ko yumvaga agiye gufungurwa asigaje iminsi irindwi. Yari yamusigiye umwana umwe, yari amaze kubyara batatu bari hejuru ya wa wundi umwe. Aravuga ati uyu mugabo ugiye gufungurwa noneho ndamuca hehe.”

Aho ngo niho havuye itegeko ryo kugemura ibivuye muri restaurant ya gereza aho kuzana ibyo wakuye mu miryango yabo. Umuryango ARDHO washinzwe mu 1990 umaze igihe kirekire wibanda ku bikorwa byo gutanga ubufasha mu by’amategeko mu magereza.

Muri Gereza ya Musanze, umugore yigeze kuroga umugabo we adashaka ko afungurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .