Hagiye gutangizwa uruganda rukora impapuro z’isuku n’ibindi bikoresho mu migano

Yanditswe na Habimana James
Kuya 6 Kamena 2020 saa 02:20
Yasuwe :
0 0

Ikigo cy’igihugu gishinzwe guteza imbere amashyamba mu Rwanda, cyatangaje ko bari mu biganiro n’umushoramari bigamije gushinga uruganda ruzatanga impapuro z’isuku n’ibindi bikoresho bitandukanye byose bikorewe mu Rwanda kandi bikozwe mu migano.

Iki kigo kivuga ko hari umushoramari uzakorana na guverinoma ndetse n’abafatanyabikorwa batandukanye, mu gutera imigano kuri hegitari 2 119 zo mu Ntara y’Iburasirazuba kugira ngo babone ibikoresho fatizo by’uruganda.

Iki kigo kivuga ko uru ruganda ruzubakwa mu Murenge wa Masaka mu Karere ka Kicukiro.

Umuyobozi Mukuru w’iki kigo, Jean-Pierre Mugabo, yasobanuye ko uru ruganda ruzakora impapuro z’isuku n’ibindi bikoresho by’isuku, uburoso bw’amenyo, ubw’inkweto n’ibindi bikoresho by’ubwubatsi.

Yagize ati “Kugeza ubu turi mu cyiciro cya nyuma cy’imishyikirano n’umuntu ushobora gushora imari kugira ngo adufashe mu gushinga uru ruganda i Masaka, ruzatanga ibikoresho bikorerwa mu karere kandi bikozwe mu migano. Tugomba gutera amoko arindwi y’imigano abereye uru ruganda.”

Mugabo yavuze ko ubushakashatsi ku ruganda bwarangiye, gusa ntagaragaza igiciro uruganda ruzatwara n’ubushobozi bwarwo.

Yagize ati “Inyigo ishoboka yararangiye, gahunda n’ibiciro bisabwa nabyo birahari ariko tuzatanga ibisobanuro birambuye kuri uyu mushinga igihe tuzaba dusoza imishyikirano n’umushoramari no mu gihe bizaba byemejwe na guverinoma.”

Yavuze ko uru ruganda rushobora gutangira umwaka utaha, naho gutera imigano bizarangira mu myaka itanu iri imbere.

Yagize ati “Kugeza ubu hari hegitari zigera kuri 200 ziteguye, ndetse n’imigano imaze gukura kugira ngo ifashe gutangiza uruganda.”

Uyu muyobozi agaragaza ko guverinoma ifite intego yo kongera ubuso bw’imigano bukava kuri hegitari 530 bwariho mu 2018, bukagera kuri hegitari 3 645 mu 2020/21 kugira ngo bufashe uruganda.

Avuga ko hakenewe hegitari ibihumbi bitanu kugira ngo uruganda ruhazwe neza.

Yasobanuye kandi ko imigano nk’iyi irimo guterwa ku migezi hagamijwe kurengera ibidukikije no gutanga ibikoresho bifasha mu bikorerwa mu Rwanda.

Hamwe muri aha ni ku mugezi wa Sebeya mu turere twa Rubavu, Rutsiro, Nyabihu na Ngororeo, hakaba hafite kilometero kare 336.

Amakuru agaragaza ko ubu bwoko bw’imigano bukenewe, kubutera kuri hegitari imwe bisaba miliyoni ebyiri z’amafaranga y’u Rwanda.

Mugabo yagize ati "Iki gihembwe cyo gutera ibiti kiri imbere, tugomba gutera ahangana na hegitari 600 z’imigano mu tundi turere tw’igihugu, uretse mu Ntara y’Iburasirazuba".

Mugabo avuga ko guverinoma yatangiye no kwegurira abikorera amashyamba yayo harimo n’amashyamba y’imigano.

Agaragaza ko kugeza ubu 30% byamaze gushyirwa mu maboko y’abikorera, 10% bazayahabwa vuba, ariko intego ni uko bizagera mu 2024 amashyamba angana na 80% yaramaze guhabwa abikorera.

Uru ruganda ruzajya rukora impapuro z'isuku n'ibindi bikoresho mu migano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .