Minisiteri y’Uburezi(MINEDUC) ibinyujije mu ishami rishinzwe Imicungire Myiza
y’Abarimu (TDM) ryo mu Kigo Gishinzwe Guteza Imbere Uburezi ( REB), kuwa Kane tariki 17 Nyakanga 2014, yatangije ku mugaragaro porogaramu izajya ikoreshwa mu gucunga abarimu “Teacher Management Information System” (TMIS).
Nk’uko MINEDUC yabitangaje, iyi TMIS izafasha TDM gukurikirana imikorerere
n’imicungire myiza y’abarimu ku buryo abarimu bavuye mu kazi bagiye mu zabukuru cyangwa bagiye mu yindi mirimo hamwe n’abinjiyemo bose bazajya bahita bamenyekana.
Minisitiri w’Uburezi, Dr Biruta Vincent, yavuze ko iki gikorwa : “dossiers z’abarimu bose bo mu gihugu bagera kuri 55.000 zimaze kwinjizwa muri iriya software (TMIS), guhera ubu imirimo yose ikazajya ikoreshwa ikoranabuhanga.”
Ubusnzwe inyandiko zifashishwa mu kumenya abarimu bose bari mu mirimo hamwe n’imyirondoro yabo bikorwa buri mwaka. Ariko hajyaga habamo guhindagurika cyane kandi ishami rya TDM ntibimenye. Birazwi neza ko hari abarimu bava mu kazi biboneye akandi, abandi bakajya mu kiruhuko cy’izabukuru cyangwa se hakaba n’abitaba Imana. Abo bose rero bamenyekanaga bitinze, ibyo bikaba byagira ingaruka nyinshi mu micungire myiza y’abarimu n’imishahara yabo muri rusange.
Iyi TMIS izajya ikoreshwa n’abakozi begereye abarimu ku buryo impinduka zose zizajya zihita zimenyekana. Iyi mirimo izajya ikorerwa ku Turere n’umuyobozi ushinzwe Uburezi hamwe n’ushinzwe abakozi; abo, babihuguwemo hanyuma igenzurwa rikazajya rikorerwa kuri TDM.
Ntaganzwa Damien, Umuyobozi wa REB wungirije ushinzwe imicungire myiza y’abarimu yatangaje ko abarimu bazashyirwa mu byiciro bitatu (junior, senior na master), bityo umwarimu azajye azamuka mu ntera hamaze gukorwa isuzuma. Kuzamuka uva mu cyiciro ujya mu cyisumbuye bizajya bijyana n’umushahara.
Usibye kumenya impinduka zose zizajya ziba mu barimu, TMIS izihutisha imihembere yabo. Amahugurwa y’abazakoresha iyi porogaramu hamwe n’imirimo yose ijyanye n’iki gikorwa yatewe inkunga n’Ishami ry’Umuryango w’Abibubye rishinzwe abana (UNICEF).
TANGA IGITEKEREZO