Hagaragajwe ibibazo by’ingutu byabangamiye uburenganzira bw’umwana kuva Mutarama kugera Kamena

Yanditswe na Ishimwe Deborah
Kuya 31 Ukwakira 2020 saa 02:24
Yasuwe :
0 0

Abakorerabushake b’Urwego rushinzwe igenzura ry’Iyubahirizwa ry’Uburenganzira bw’Umwana, ODE (Observatoire des Droits de l’Enfant), bagaragaje ibibazo 852 byagaragaye mu gihe cy’amezi atandatu byahungabanyije uburenganzira bw’umwana.

Aba bakorerabushake bakorera mu Turere no mu Mirenge igize igihugu cyose, bafite inshingano yo kugenzura aho uburenganzira bw’umwana butubahirijwe, bakabimenyesha inzego zishinzwe kwita ku burenganzira bw’umwana.

Muri raporo batangaje kuwa 30 Ukwakira ku isonga hagaragaye ikibazo cyo gukoresha abana imirimo ivunanye no gusambanya abana ku kigero cyo hejuru aho babonye ibibazo 224 byerekeye gukoresha abana imirimo badashoboye na 215 byo gusambanya abana.

Ibibazo byagaragaye bishingiye ku bana babujijwe uburenganzira ku burezi ni 208 ndetse na 45 bishingiye ku bana bambuwe uburenganzira bwo kwandikishwa mu bitabo by’irangamimerere.

Iyi raporo yagaragaje kandi bibazo 14 bijyanye n guhanisha abana ibihano bibabaza umubiri, 12 byo kubahoza ku nkeke, 12 bijyanye no kutabaha imibereho myiza.

Ibindi byagaragaye birimo ibibazo bitanu bishingiye ku kubuzwa uburenganzira k’umutungo, bitatu by’aho abana batawe bonyine, bibiri bishingiye ku buzima na kimwe gishingiye ku guhabwa uburenganzira bwo kubaho n’icyo gutanga indezo.

Umuyobozi muri CRADHO, Murwanashyaka Evariste, yagaragaje bimwe mu bibazo bikwiye kwitabwaho cyane anibutsa ababyeyi ko hari amategeko abahana mu gihe batitaye ku bana.

Ati “Hari ikibazo cyo gusambanya abana gikomeje kuzamuka umunsi ku munsi, hari ikibazo cy’imirimo ivunanye nacyo cyazamutse cyane kuko ubukungu bw’imiryango bwaramanutse, ababyeyi bahitamo gushora abana mu mirimo ivunanye nyamara batumva ko babangamira abana.”

Yakomeje agira ati “Ababyeyi bagomba kumenya ko hari amategeko abahana mu gihe batitaye ku bana, nko mu itegeko ry’umwana rigena ibihano ku babyeyi birengagiza inshingano zo kwita ku bana n’iry’umurimo ryo mu 2018 mu ngingo yaryo ya 117 harimo ibihano ku bakoresha abana imirimo ivunanye.”

Umuyobozi wa Komisiyo y’Uburenganzira bwa Muntu, Mukasine Marie Claire, yagaragaje uruhare rwa Komisiyo y’Uburenganzira bwa Muntu mu gushakira umuti ibibazo bihungabanya uburenganzira bw’umwana, anavuga ko ababyeyi bagomba gufata iya mbere mu kububungabunga.

Ati “Uburenganzira bw’umwana bwarahungabanyijwe cyane mu gihe cya COVID-19, aho bakoreshejwe imirimo ivunanye ndetse isambanywa ry’abana bato rikiyongera cyane. Twe nka Komisiyo y’Uburenganzira bwa Muntu dufatanya n’inzego za Leta tukarebera hamwe icyakorwa kugira ngo tubungabunge uburenganzira bw’umwana.”

Yongeyeho ati “Ababyeyi nibo bagomba gufata iya mbere mu kubungabunga uburenganzira bw’umwana cyane ko aribo baba bahorana nabo.”

Urwego rwa ODE rwashyizweho mu 2006, hashingiwe ku itegeko ryerekeye uburenganzira bw’umwana n’uburyo bwo ku murinda ihohoterwa, yahaga komisiyo inshingano yo guteganya uburyo bwihariye bwo gukurikirana uko uburenganzira bw’umwana bwubahirizwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .