Habumukiza warangije muri Kaminuza y’u Rwanda yasobanuye uko we na bagenzi be bagabye igitero mu Kinigi

Yanditswe na Philbert Girinema
Kuya 17 Nyakanga 2020 saa 04:58
Yasuwe :
0 0

Mu ijoro ryo ku wa 4 Ukwakira rishyira ku wa 5 Ukwakira 2019, abarwanyi bo mu mutwe wa RUD-Urunana biganjemo abitwaje intwaro gakondo, bateye mu Murenge wa Kinigi mu Karere ka Musanze bica abaturage 14 abandi barakomereka.

Umwe mu bari muri icyo gitero yitwa Habumukiza Théoneste wiyitaga “Entre parenthèse” aho yabarizwaga mu mashyamba ya RDC mu gisirikare cya RUD-Urunana. Akomoka mu Ntara y’Amajyaruguru mu Karere ka Burera mu Murenge wa Rugendabari.

RUD-Urunana yari iyobowe na Gen Jean Michel Afrika wishwe n’ingabo za FARDC mu bitero byo mu mpera z’umwaka ushize.

Habumukiza ni umwe mu barwanyi b’imitwe itandukanye ibarizwa mu mashyamba ya Congo batawe muri yombi ndetse beretswe itangazamakuru kuri uyu wa Gatanu. Avuga ko umutwe yabarizwagamo, wari ufitanye imikoranire na FDU-Inkingi ndetse n’ingabo za P5, ihuriro ry’imitwe ribarizwamo na RNC ya Kayumba Nyamwasa, rifite abarwanyi mu gace ka Minembwe muri Kivu y’Amajyepfo.

Mbere y’uko yinjira muri iyi mitwe, yari amaze gusoza amasomo muri Kaminuza y’u Rwanda mu Ishuri ry’Ubukungu n’Imari, ryitwaga SFB, arangiza mu 2016. Asoza amashuri ngo yahise abona akazi muri Radiant Insurance Company, nyuma aza kujya kwiga Masters muri Makerere University.

Agezeyo yahuye n’umugabo witwa Jonas w’umunyarwanda, amubwira ko afite ikirombe cy’amabuye y’agaciro, ko ashaka kumugira umuyobozi akazajya amuhemba ibihumbi bibiri by’amadolari, hafi miliyoni ebyiri z’amafaranga y’u Rwanda.

Muri uko kwemera akazi, yaje kwisanga ageze i Walikale mu mutwe wa RUD-Urunana. Avuga ko ari umwe mu bagabye igitero mu Kinigi.

Ngo bijya gutangira ingabo za P5 zari i Minembwe zahagurutseyo muri Mata 2019 zerekeza muri Kivu y’Amajyaruguru kugira ngo zihure n’iza RUD-Urunana.

Izo ngabo ngo muri Kamena zaje gukomwa mu nkokora n’ibitero bya FARDC, zagabweho zigeze i Masisi zimwe zirapfa, izindi zirakomereka, ziratatana ndetse zimwe zirafatwa. Muri uko gutatana, zimwe zagiye muri FDLR-FOCA ari naho ubuyobozi bwa RUD-Urunana bwohereje ingabo kugira ngo zijye kuzambutsa umugezi wa Bicumbi n’uwa Rutshuru.

Ati “Ubwo twaje guhaguruka tariki 29 Nzeri 2019 tuyobowe na Maj Nshimiyimana Cassien Alias Governor. Twagendaga ijoro, ku manywa tukirirwa twihishe. Ku itariki ya 2 Ukwakira 2019 twinjiriye ahitwa i Bunagana twinjira muri Pariki y’Ibirunga.”

Habumukiza avuga ko kubera ko umuntu wari ubayoboye yari yaribagiwe inzira zo muri Pariki, baje gutinda mu nzira. Muri gahunda ngo icyo gitero cyagombaga gutangirira ahitwa Cyanika mu Ntara y’Amajyaruguru. Baje kwisanga bahingukiye muri Nyirabisate i Musanze ari naho batangiriye igitero cyabo ku itariki 4 Ukwakira 2019 saa moya na 50 z’umugoroba.

Ati “Intego twari dufite yari iyo gutera u Rwanda tugahirika ubutegetsi buriho tukabusimbura. Twaje turi 47 hiyongereyeho n’ingabo za P5 ntibuka umubare.”

Uwari ubayoboye uzwi nka Governor ngo yari yababwiye ko nibagera mu Cyanika, bazahahurira n’ingabo zizaturuka muri Uganda.

Yafashwe tariki 05 Ukwakira 2019 ahagana saa kumi n’ebyiri ari ahitwa i Nyange ubwo yarwanywaga n’ingabo z’u Rwanda.

Kuba muri kiriya gitero hari abaturage bishwe, avuga ko ari amabwiriza bari bahawe na Governor, wabitegetse Sgt Gataraka wari uyoboye abarwanyi ngo bari imbere.

Ati “Yamubwiye ko bagomba kwica umuturage wese uri kugenda n’ijoro yitwaje isitimu, uri kugenda avuza amajerekani ndetse n’abari ku irondo. Yari yatubwiye ko tuzafata u Rwanda turwanyije Ingabo za RDF tutirengagije n’umuturage wese uzakorana bya hafi n’Ingabo za RDF.”

Aricuza...

Habumukiza avuga ko ubwo yabonaga ko ibyari byamujyanye muri RDC byo gukora mu kirombe cy’amabuye y’agaciro bitagezweho, yatekereje gutoroka ariko Governor aramwihanangiriza amubwira ko uzatekereza ibyo kuva muri uwo mutwe akajya mu bucukuzi bw’amabuye y’agaciro, “azakubitwa agafuni cyangwa se akaraswa”.

Ngo yababwiye ko bagomba kwinjira mu bikorwa bya gisirikare ndetse ko hari n’izindi ngabo za P5 ziba i Minembwe bazahurira hamwe bagatera u Rwanda. Ntabwo azi amakuru y’aho Governor aherereye ubu nubwo bivugwa ko nyuma y’icyo gitero yahise yinjira muri Uganda.

Abajijwe niba hari bagenzi be bakubiswe agafuni bagerageza gutoroka, yagize ati “ibyo bintu byabayeho inshuro nyinshi. Hari abantu ntibuka amazina bapfuye bagerageza gutoroka, na nyuma turi mu gisirikare hari benshi batekereje gutoroka bakubiswe agafuni, bishwe ndetse n’abandi bajyaga bahura n’indi mitwe ikorera hafi aho nka Mai Mai, Nyatura, cyangwa se bakagwa muri FARDC, cyangwa se FOCA ku mpamvu z’uko bakekwaho ko ari abatasi, abajura n’ibindi.”

Uyu musore asaba imbabazi ku bwo guhemukira abanyarwanda na leta yamufashije akiga, akabona akazi. Ati “Ndasaba imbabazi leta y’u Rwanda n’abanyarwanda muri rusange.”

Ubwo aba barwanyi bagabaga iki gitero, Inzego z’umutekano z’u Rwanda zahise zica abantu 19 mu bari bakigabye mu gihe batanu bo bafashwe mpiri.

Habumukiza Théoneste ni umwe mu bagabye igitero mu Kinigi cyaguyemo abaturage 14

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .