Guverinoma yasabwe ibisobanuro mu nyandiko ku ngamba ifitiye ibibazo biri mu buhinzi

Yanditswe na Akayezu Jean de Dieu
Kuya 9 Gashyantare 2019 saa 09:58
Yasuwe :
0 0

Abadepite basabye Minisiteri y’Ubuhinzi n’Ubworozi n’iy’Ubucuruzi n’Inganda gutanga ibisobanuro byanditse, ku ngamba bafite ku bibazo bikomeje kugaragara mu rwego rw’ubuhinzi n’ubworozi mu Rwanda.

Uyu mwanzuro wafashwe nyuma y’iminsi ibiri abayobora izi Minisiteri batanga ibisobanuro ku bibazo byagaragajwe na raporo ya Komisiyo y’Inteko Ishing Amategeko Ubuhinzi, Ubworozi n’Ibidukikije, bigaragara mu rwego rw’ubuhinzi, ubworozi, ubucuruzi n’inganda

Ku wa Kane no ku wa Gatanu , Minisitiri w’Ubuhinzi n’ubworozi, Dr. Mukeshimana Gérardine na Minisitiri w’Ubucuruzi n’Inganda, Hakuziyaremye Soraya bitabye Inteko Ishinga Amategeko, umutwe w’abadepite.

Mu bibazo byagaragajwe harimo kuba hari abahinzi bagaragaza ko bahabwa imbuto cyangwa inyongeramusaruro bitajyanye n’ubutaka bahingaho, abatinda kubihabwa bikabakereza guhinga ndetse bikagira ingaruka ku musaruro.

Havuzwemo kandi abashishikarizwa guhinga, byakwera bakabura aho bagurisha umusaruro, kuba abahinzi bamwe badafite uburyo buhamye bwo gucunga umusaruro kugera ubwo wangiritse, ibibazo biri mu makusanyirizo n’ibindi.

Havuzwemo kandi ibishanga usanga bidatunganyijwe, imisozi itarwanyijweho isuri n’ibindi, byose bigira ingaruka ku musaruro w’ubuhinzi n’ubworozi.

Dr. Mukeshimana yasobanuriye abadepite ko ingamba zihari nyinshi zo guhangana n’ibyo bibazo zirimo izafashwe kera n’iziteganywa ariko ko ibibazo atavuga ko byashira mu gihe cya vuba.

Ati “Mu buhinzi harimo ibibazo byinshi, ubwo mu Rwanda harimo ibijyanye n’imihindagurikire y’ibihe ihoraho, hari ibijyanye n’ubutaka buto, imikorere n’imikoranire y’abantu ndetse n’ubumenyi bw’ababikora. Ntabwo twavuga ko ari ibibazo byakemuka, ngo tuvuge ko ejo bizaba byakemutse. Icyo dukora ni uguhozaho.”

Ibibazo byagaragajwe muri Minicom harimo ko hari inganda cyane cyane iziciritse zashyizweho kugira ngo zifashe abahinzi gutunganya no kongerera agaciro umusaruro w’ibibukomokaho ariko zitagikora n’izikora ugasanga biri hasi cyane.

Abadepite bavuze ko Minisiteri y’Ubucuruzi n’Inganda ikwiye gusesengura ikamenya impamvu zituma inganda zifunga imiryango izindi zigakora ku kigero kiri hasi, ikanabishakira igisubuzo kirambye.

Minisitiri Hakuziyaremye yababwiye ko impamvu inganda zimwe zafunze izindi zikaba zikora ku kigero kiri hasi zirimo kutabona umusaruro uhagije kandi mwiza, imiyoborere idahwitse cyane cyane inganda zifitwe mu nshingano n’amakoperative nk’izitunganya imyumbati.

Yababwiye kandi ko hari izo usanga zarafunze kubera ko zidashoboye guhangana n’izindi zisanze ku isoko kubera ikiguzi cy’ubwikorezi cy’ibikoresho by’ibanze zikura hanze gihanitse n’icy’amashanyarazi.

Abadepite bakomeje kugaragaza ko batanyuzwe n’ibisobanuro bahawe n’aba bayobozi ndetse basaba guhabwa ibisubizo mu nyandiko.

Ikigo cy’Igihugu cy’Ibarurishamibare (NISR) kigaragaza ko abanyarwanda basaga 70% batunzwe n’ubuhinzi, bubumbatiye nibura 30% by’ubukungu bw’igihugu.

Ibisobanuro bya Minisitiri w'Ubuhinzi n'Ubworozi Dr Mukeshimana Gerardine ntabwo byanyuze abadepite
Minisitiri Hakuziyaremye Soraya yabwiye abadepite ko impamvu inganda zimwe zitunganya umusaruro w'ubuhinzi zafunze izindi zikaba zikora ku kigero kiri hasi zirimo kutabona umusaruro uhagije kandi mwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza