Guhenda kw’ibyo gupfunyikamo n’ibyangombwa by’ubuziranenge, ku isonga y’ibibangamiye abikorera baciriritse

Yanditswe na Muhonzire Sylvine
Kuya 26 Ukuboza 2020 saa 01:16
Yasuwe :
0 0

Ibiciro bihanitse by’ibyo gupfunyikamo ibicuruzwa ndetse n’inzira iruhije yo kubona icyemezo cy’ubuziranenge, ni bimwe mu bihangayikishije abafite imishinga mito n’iciriritse itunganya ibiribwa, ibyo kunywa ndetse n’ibikoresho by’isuku.

Ibi bibazo byagaragajwe n’aba nyir’iyi mishinga mu imurikagurisha (expo) riri kubera i Gikondo ahazwi nka Expo Ground, ryatangiye tariki 11 Ukuboza rizageza tariki 31 Ukuboza 2020, ryashyize hamwe abacuruzi b’ingeri zose ngo bamurike ibikorwa by’abo.

Ibi bibazo bahura nabyo bavuga ko bituma batabasha kwagura ibikorwa byabo bityo ngo bagere ku rwego rwo gucuruza ku masoko mpuzamahanga.

Umuyobozi mukuru wa BRAIMPIRE itunganya ikawa, Nadege Uwamahoro, yabwiye NewTimes ko kubona icyemezo cy’ubuziranenge bihenze ndetse ko bahura n’ingorane kugira ngo babashe kugera ku masoko mpuzamahanga.

Ati “Duhura n’ingorane kugira ngo tubashe kugera ku masoko mpuzamahanga mu Burayi, Aziya, na Amerika nk’imishinga igitangira. Inzira isabwa kugira ngo tubone icyemezo cy’ubuziranenge irahenze cyane. Bisaba amafaranga menshi. Turasaba Minisiteri y’Ubucuruzi n’Ikigo cy’Igihugu gishinzwe Ubuzirange (RSB) kudutera inkunga kugira ngo duhangane n’ibi bibazo.”

Furaha Utamuriza, Umuyobozi ushinzwe gukwirakwiza ibicuruzwa muri Green Treasure Ltd ikora urusenda mu Karere ka Nyarugenge, yavuze ko igiciro cy’ibikoresho byo gupfunyikamo, ari indi ngorane abafite imishinga mito n’iciriritse bahura nayo cyane cyane abatunganya ibiribwa.

Ati “ntibyoroshye kubona amacupa meza yo gushyiramo ibicuruzwa byacu.”
Uyu mushinga utunganya amacupa 8400 apima garama 60 y’Urusenda buri mwaka.

Yakomeje agira ati “twatangiye gutunganya urusenda mu myaka itatu ishize, twakuraga amacupa meza muri Kenya ariko kuko ibintu byabaye bibi kubera Covid-19 ntibyoroshye kuyahakura. Gusa twizeye ko azageraho agakorerwa mu Rwanda.”

Iyi mishinga irasaba Leta ko yashyiraho inganda zikora ibikoresho byo gushyiramo ibicuruzwa byakorewe mu Rwanda, kuko byatuma hagabanuka ibitumizwa mu mahanga.

Alphonse Nshimiyimana, umuyobozi wa BINA Group itunganya amafu atandukanye ava mu binyampeke bihingwa mu Rwanda, na we yavuze ko kugeza ubu batarabona akamenyetso karanga ubuziranenge ku bicuruzwa byabo(S-Mark).

Yagize ati “Turacyahura n’ingorane zo kubona ibikoresho byiza byo gushyiramo ibicuruzwa byac, bitewe n’ikibazo cy’ubushobozi buke, cyanatumye tutarabona ibisabwa ngo tubone icyemezo cy’ubuziranenge.”

Abatunganya ibikoresho by’isuku, nabo bavuga ko bahura n’ibibazo by’ibiciro bihanitse ku bikoresho by’ibanze byo gukoresha n’ibyo gushyiramo ibicuruzwa byabo ndetse n’urugendo rurerure rwo kubona icyemezo cy’ubuziranenge.

Umukozi muri NOLIVER Hygienic Company, iherereye mu Karere ka Kicukiro, Marie Laurence Umuremyi, yagize ati “Tumaze igihe dukora amasabune asukika, ayo mu bwiherero, ayo mu mutwe, ayo gukaraba intoki n’ayandi atandukanye. Bamwe banga ibicuruzwa byacu kuko bidafite akamenyetso karanga ubuziranenge (S-Mark).”

Umuyobozi Mukuru wa RSB, Raymond Murenzi yavuze ko bagiye gukomeza gukora ubukangurambaga kigira ngo abikorera baciriritse bagane gahunda ya Zamukana Ubuziranenge.

Ati “Biciye muri gahunda ya ‘Zamukana Ubuziranenge’ tuzakomeza kwigisha abikorera bakiri bato cyane abagore n’abafite ubumuga bafite imishinga iciriritse kubona icyemezo cy’ubuziranenge. Tugiye gutegura amahugurwa ku bantu bazabafasha kubona icyemezo cy’ubuziranenge. Twabonye ko benshi bafite ikibazo cy’amikoro kugira ngo babashe guhabwa izo serivisi, tuzabafasha kwishyura amafaranga amwe bityo babashe kubona ibisabwa.”

Louis Antoine Muhire, Umuyobozi ushinzwe imishinga mu gice cyahariwe Made in Rwanda muri Minisiteri y’Ubucuruzi n’Inganda (MINICOM) yavuze ko bari gushyiramo imbaraga kugira ngo bafashe aba abikorera kubona ibyemezo by’ubuziranenge ndetse banabahuze n’amasoko ndetse babone amahugurwa.

Abikorera baciriritse bavuga ko ibyangombwa by'ubuziranenge n'ibikoresho byo gupfunyikamo kubibona bihenze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .