Gufungura by’agateganyo abakurikiranyweho ibyaha bya ruswa bishobora gukurwaho

Yanditswe na Evariste Nsengimana
Kuya 14 Gashyantare 2020 saa 08:24
Yasuwe :
0 0

Minisitiri w’Ubutabera akaba n’Intumwa Nkuru ya Leta, Busingye Johnston, yagaragaje impungenge zikomeye ziri mu gufungura by’agateganyo abakurikiranyweho ibyaha bya ruswa n’ibifitanye isano na yo bishobora gusabirwa gukurwaho, ni nyuma y’uko hari abarekurwa by’agateganyo bagatoroka.

Impungenge kandi ni uko hari abashyira igitutu ku rwego rw’ubutabera bashaka ko bababogamiraho.

Ni impungenge yagaragarije mu nama Urwego rw’Umuvunyi rwagiranye n’Inzego z’Ubutabera kuri uyu wa 13 Gashyantare 2020, igamije gusesengura ibyuho bya ruswa bikigaragara muri izo nzego n’ingamba zafatirwa.

Umuyobozi mukuru mu Rwego rw’igihugu rw’Ubugenzacyaha, ushinzwe kugenza ibyaha, Twagirayezu Jean Marie Vianney, yagaragaje ko gukurikirana abakekwaho ibyaha bya ruswa n’ibindi bifitanye isano na yo hakirimo imbogamizi zituma bidatanga umusaruro ukwiye.

Zimwe muri zakomeje kugarukwaho muri iyi nama harimo kuba itangirwa mu bwiru, kuba bamwe batamenya amakuru, kuba hari abayishinjwa ariko ikaburirwa ibimenyetso, abashaka ko inkiko zifata ibyemezo bibabogamiyeho, abafungurwa by’agateganyo ntibongere gukurikira imanza n’ibindi.

Minisitiri Busingye yavuze ko ifungurwa ry’agateganyo ku byaha byose amategeko afite uko abiteganya, kandi ubucamanza bufite uburenganzira bwo kubitanga kandi bigakorwa.

Gusa ngo nubwo ku bindi byaha byazaganirwaho igihe cyabyo, igihe haganirwa kuri ruswa, Busingye avuga ko ari ngombwa kuvuga ku mbogamizi zigaragaramo aho usanga bamwe bafungurwa bagahita baburirwa irengero cyangwa bikabangamira ubutabera.

Ati “Ntekereza ko akamaro ko gufungurwa by’agateganyo ari ukuvuga ngo taha uzakomeze ukurikirane urubanza rwawe uri hanze, twizere ko utazagira icyo uruhungabanyaho, twizeye ko uzagaruka ukaburana urubanza rwawe.”

Minisitiri Busingye yavuze ko imibare y’Ubushinjacyaha igaragaza ko nibura 80% by’abafungurwa by’agateganyo batajya bagaruka gukurikirana imanza kugeza zirangiye kandi bikaba bimaze igihe byisubiramo.

Ati “None niba ari uko imibare ivuga, ntacyo byakwiye kugira icyo bibwira wa muntu uyitanga? Mbese nta kuntu yahitamo kwihutisha urwo rubanza aho kuvuga ngo umuntu atahe azabe agaruka. Ese nta kindi kintu twakora?”

Minisitiri Busingye yatanze igitekerezo cy’uko Minisiteri y’Ubutabera ishobora gusaba Inteko Ishinga Amategeko ikayemerera wenda ko inkiko zakora no mu mpera z’icyumweru cyangwa gukora amasaha y’inyongera urubanza rukihuta aho kugira ngo hakomeze kugaragara icyo cyuho.

Perezida w’urukiko rw’Ikirenga, Dr Nteziryayo Faustin yasobanuye ko impamvu ziha icyuho ruswa harimo kudahabwa serivisi abantu bakwiye mu nzego zibishinzwe bigatuma bashakisha ubundi buryo bazibonamo kandi kuzihabwa ri uburenganzira bwabo.

Ati “Nta serivisi n’imwe twavuga ko idashobora kubonekamo ruswa cyangwa ibindi byaha bisa nayo. Ni ngombwa rero ko buri rwego rwiyemeza kuziba ibyuho ruswa yakwinjiriramo, tugafata ingamba zihamye zo kiuyirwanya.”

Dr Nteziryayo yavuze ko inzego zose ziramutse zifatanyije mu gushyira mu bikorwa ingamba guverinoma yashyizeho zo kurwanya no gukumira ruswa mu nzego z’Ubutabera no mu zindi nzego byatuma ruswa icika cyangwa ikagera ku rwego ruto cyane.

Umuvunyi Mukuru Murekezi Anastase yavuze ko ruswa igaragaye mu zindi nzego, ingaruka zayo zigera no mu nzego z’ubutabera ari nazo ziyifataho imyanzuro kugeza ubwo hafashwe icyemezo cya nyuma ndakuka.

Ati “Ubutabera ni inkingi ikomeye cyane mu gukumira no kurwanya ruswa n’akarengane kuko iyi ubutabera butanzwe neza bigira uruhare rukomeye mu iterambere ry’igihugu no kubahiriza uburenganzira bwa muntu maze amahoro agahinda mu gihugu, abantu bose bakanezerwa bagakora bagatera imbere.”

Raporo yasohowe n’Umuryango urwanya ruswa n’Akarengane ku Isi, Transparency International, yashyize u Rwanda ku mwanya wa gatatu mu kurwanya ruswa mu 2018 n’amanota 56%. Ugereranyije n’umwaka wa 2017, u Rwanda rwitwaye neza kuko ho rwari rwagize amanota 55%.

Nubwo ruri kuri uyu mwanya muri Afurika, ku rwego rw’Isi ho rwaje ku mwanya wa 48. Umwanya wa mbere uriho igihugu cya Denmark n’amanota 88%. Igihugu cya nyuma ku Isi ni Somalia n’amanota 10%, naho mu bihugu 10 bya nyuma harimo bitandatu byo ku mugabane wa Afurika.

Dr Nteziryayo Faustin yasobanuye ko impamvu ziha icyuho ruswa harimo kudahabwa serivisi abantu bakwiye mu nzego zibishinzwe bigatuma bashakisha ubundi buryo bazibonamo
Iyi nama yitabiriwe na bamwe mu bashinzwe umutekano
Minisitiri Busingye na Perezida w'Urukiko rw'Ikirenga Dr Nteziryayo bari muri iyi nama
Minisitiri Busingye yaciye amarenga ko gufungura by'agateganyo abakurikiranyweho ruswa bishobora gusabirwa gukurwaho
Perezida w'urugaga rw'abavoka, Kavaruganda Julien (iburyo) yari yitabiriye iyi nama
Ubwo inzego zitandukanye zagaragazaga ahakiri icyuho mu kurwanya ruswa
Umuvunyi Mukuru Murekezi Anastase yavuze ko ruswa uko ingana kose idakwiye kwihanganirwa
Nyuma abayobozi bafashe ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza