Goma: Bane mu barindaga Gen Mudacumura bafashwe na FARDC

Yanditswe na Mukwaya Olivier
Kuya 21 Nzeri 2019 saa 09:07
Yasuwe :
0 0

Ingabo za Repubulika iharanira demokarasi ya Congo (FARDC), binyuze mu bikorwa byiswe ‘Sokola 2’ kuri uyu wa Gatanu beretse itangazamakuru bane mu barwanyi ba FDLR, bahoze ari abarinzi ba Gen Mudacumura uherutse kwicwa n’ingabo za Congo.

Aba barwanyi bakaba barafatiwe muri Rutshuru hamwe n’imbunda nyinshi n’amasasu ndetse na za radio z’itumanaho rya gisirikare.

Nk’uko bitangazwa na FARDC, aba barwanyi bafashwe mu bikorwa byo kubuza uyu mutwe kongera kwiyubaka nyuma y’urupfu rwa Gen Mudacumura.

Umuvugizi wa FARDC mu ntara ya Kivu y’Amajyaruguru, Major Guillaume Ndjike Kaiko, avuga ko gahunda bafite ari ugukuraho imitwe yitwaje intwaro agasaba abarwanyi kwishyikiriza ingabo za Congo mu maguru mashya.

Ati “Ubu gahunda yacu ni ugukuraho imitwe yitwaje intwaro yose kandi vuba bishoboka twahereye kuri Mudacumura no ku bari kumwe nawe kandi twabigezeho kuko twamwishe hamwe n’uwari ushinzwe ibikorwa bya politiki Col Soso Sixbert, tunafata abarinzi bane n’ibikoresho byabo. N’abandi bashyire intwaro hasi bizane nibatabikora bizabagendekera nka Mudacumura’’.

Mbarushimana Faustin Zakayo warindaga Col Sixbert Soso wari ushinzwe ibikorwa bya politike, ysobanuye ukuntu bafashwe.

Ati “Twaje mu nama yo gutora umuyobozi mukuru wo gusimbura Ignace Murwanashyaka hari mu gitondo saa kumi n’imwe n’igice twumva amasasu atugezeho njyewe nari nkiryamye hafi yanjye hari Soso Sixbert narindaga we yaregutse baba bamurashe isasu mu mutwe nanjye mfata imbunda yanjye ndasohoka mpita mpura n’abasirikare ba FARDC baramfata.”

Avuga ko uretse umurambo wa Soso Sixbert, yabonye hanze n’inkoni Mudacumura yagendanaga bamubwira ko bamwishe.

Amakuru ava muri Congo avuga ko Mudacumura yishwe hamwe n’abo bari kumwe barimo Col Soso Sixbert, Col Serge na Major Gaspard wari ushinzwe kumurinda. Abandi 15 bari kumwe nawe ngo bafashwe.

Bane mu barindaga Mudacumura batawe muri yombi na FARDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza