00:00:00 IGIHE NETWORK KN KINYARWANDA EN ENGLISH FR FRANCAIS

Global Fund ikeneye miliyali 18$ mu rugendo rwo kurandura igituntu, SIDA na Malaria

Yanditswe na Mugisha Christian
Kuya 6 May 2022 saa 10:49
Yasuwe :

Buri myaka itatu umuryango utera inkunga gahunda zigamije gukumira virusi itera SIDA, Igituntu na Malaria ku Isi, Global Fund, utegura ibikorwa byo gukusanya amafaranga azakoreshwa mu gihe cy’imyaka itatu mu kurwanya izo ndwara mu bihugu bitandukanye ku isi.

Kuri ubu Global Fund iri kwitegura gukusanya amafaranga azakoreshwa kuva mu 2024 kugeza mu 2026.

Hamwe n’abafatanyabikorwa bayo harimo Leta y’u Rwanda, imiryango itegamiye kuri leta, abikorera ndetse n’ibigo biyishamikiyeho bari kuzenguruka ibihugu bitandukanye cyane ibya Afurika mu bikorwa by’ubukangurambaga bwo gushishikariza abantu kugira uruhare muri iki gikorwa.

Kuri uyu wa 5 Gicurasi 2022, bahuriyehamwe mu Rwanda mu muhango wo gutegurira hamwe no gukomeza gushishikariza buri wese kuba impamvu yo kubaho neza kwa mugenzi we.

Amafaranga akenewe kuri iyi nshuro mu gukumira virusi itera SIDA, Igituntu na Malaria mu bihugu bitandukanye ku Isi cyane ibihugu bifite ubushobozi buke ni miliyali 18 z’amadorali, ateganyijwe kuzarengera ubuzima bw’abatuye Isi bagera kuri miliyoni 20.

Ibi bivuze ko azafasha mu kugabanya byibuze 64% by’impfu, gushyigikira ibihugu bitandukanye kuzahura no kubaka inzego z’ubuzima ngo zigire ubushobozi bwo guhangana n’ibyorezo bishobora kwaduka.

Azafasha kandi kugabanya ubwandu bw’izi ndwara ku gipimo cya 58% no kugabanya impfu ziterwa n’izi ndwara kuva kuri miliyoni zisaga enye mu 2020 kugeza ku bihumbi 950 mu 2026 no kugera ku ntego ya gatatu mu z’iterambere rirambye yo guteza imbere ubuzima n’imibereho myiza mu ngeri zose.

Umunyamabanga Nshingabikorwa w’Ibiro bishinzwe abafatanyabikorwa hagati y’u Rwanda na Global Fund, Cyiza Innocent, yavuze ko iki gikorwa gifite agaciro gakomeye cyane ku Banyarwanda kuko uyu muryango wateye inkunga ibikorwa by’ubuvuzi bw’izi ndwara angana na miliyali zisaga 191 Frw mu Rwanda.

Yavuze ko buri wese akwiye kugira uruhare mu buvuzi no kurandura indwara nk’igituntu, malaria na virusi itera SIDA binyuze mu gutanga inkunga y’amafaranga.

Iki gikorwa kigiye kuba ku nshuro ya 7 kije mu gihe ibihugu bitandukanye biri guhura n’ingaruka z’ihungabana ry’ubukungu bitewe n’icyorezo cya Coronavirus n’intambara iri kubera muri Ukraine bityo hakaba hakenewe imbaraga nyinshi mu gushyira mu bikorwa iyi gahunda nk’uko bitangazwa n’Umuyobozi w’Inama y’Ubutegetsi bw’Ihuriro ry’Imiryango ikora mu bijyanye n’Ubuzima, Muramira Bernard.

Yagize ati “Aya mafaranga ni yo afasha kugura iyo miti, ibikoresho binyuranye harimo inzitiramibu. Niyo kandi agura izo mbangukiragutabara zigeza abarwayi kwa muganga ndetse n’imashini nyinshi zifashishwa muri za laboratwari.”

Yakomeje avuga ati “Ntibisanzwe kuko ubu dufite ibibazo bitwugarije byinshi bitandukanye na mbere kuko mu byo duhangana na byo hiyongereyemo Covid-19 ndetse n’ibibazo by’umutekano muke, niyo mpamvu buri wese akwiye kugira icyo akora kugira ngo ashyigikire bimwe muri bya bihugu bifite amikoro make.”

Cyiza yavuze ko hari uburyo buri gushyirwa mu bikorwa kugira ngo aya mafaranga aboneke binyuze mu bahagarariye ibihugu byabo aho bishikarizwa gukangurira ibihugu gutanga umusanzu ndetse no gukomeza ibikorwa by’ubukangurambaga ku Isi.

Umujyanama mu bijyanye n’imishinga muri Minisiteri y’Ubuzima, Dr Theophile Dushime, yasabye buri Munyarwanda wese gutanga umusanzu binyuze gukurikiza inama zose bahabwa n’abaganga zo kwivuza no kudakerensa ubu bufasha bahabwa.

Dr Dushime yavuze ko nk’uko bisanzwe u Rwanda ruzagena inkunga yo gushyikiriza uyu muryango mu gikorwa giteganijwe kuzatangizwa na Perezida wa Leta Zunze Ubumwe za Amerika, Joe Biden.

Mu gikorwa giheruka, Leta y’u Rwanda yatanze inkunga muri iki kigega ingana na miliyali 2,5 Frw mu muhango wabereye mu Bufaransa uyobowe na Perezida w’icyo gihugu, Emmanuel Macron.

Umuryango Global Fund watangiye mu 2002 ukaba umaze kurengera ubuzima bw’abarenga miliyoni 44 mu mpande zitandukanye z’Isi binyuze mu kurwanya indwara z’igituntu, virusi itera SIDA na Malaria.

Abafatanyabikorwa ba Global Fund muri iki gikorwa biyemeje gutanga umusanzu wabo
Bamwe mu bayobozi n'abafatanyabikorwa ba Global Fund bari bitabiriye iki gikorwa
Umuyobozi w’Inama y’Ubutegetsi y’Ihuriro ry’Imiryango ikora mu bijyanye n’Ubuzima , Muramira Bernard, yavuze ko iki gikorwa ari ingenzi bityo buri wese akwiye kubigira ibye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .