Gisagara: Umugabo akekwaho kwica umugore we amukubise umutwe ku nzu

Yanditswe na Prudence Kwizera
Kuya 13 Ukwakira 2019 saa 03:30
Yasuwe :
0 0

Umugabo witwa Mpakaniye Emmanuel wo mu Murenge wa Mugombwa mu Karere ka Gisagara yatawe muri yombi n’Urwego rw’Igihugu rw’Ubugenzacyaha, RIB, akurikiranyweho icyaha cyo kwica umugore amukubise umutwe ku nzu.

Byabaye ahagana saa yine mu ijoro ryakeye ryo ku wa 12 Ukwakira 2019 ubwo abaturanyi bumvaga umugore we witwa Nabanjye Angelique atabaza bahageze basanga bari kurwana.

Umwe mu baturanyi avuga ko nta makimbirane bari bazi muri urwo rugo ariko nijoro bumvise bari kurwana.

Ati “Twumvise bari kurwana tugezeyo dusanga umugore agihumeka aratubwira ngo umugabo yamukubise umutwe ku nzu. Mu gihe twari tugishakisha aho twakura moto ngo tumujyane kwa muganga yakomeje gutaka ahita ashiramo umwuka.”

Umunyamabanga Nshingwabikorwa w’Umurenge wa Mugombwa, Sibomana Damien, yabwiye IGIHE ko uwo mugabo yafashwe na RIB kugira ngo hakorwe iperereza hamenyekane inkomoko y’urupfu rw’umugore we.

Ati “Uwo mugabo yafashwe hari gukorwa iperereza ngo hamenyekane mu by’ukuri icyishe umugore we. Amakuru y’ibanze ahari ni uko ngo yamukubise umutwe ku nzu.”

Kugeza ubu Mpakaniye ari mu maboko ya RIB kuri Sitasiyo ya Muganza naho umurambo w’umugore we wajyanywe ku Bitaro bya Kibirizi.

Bombi bari bavutse mu mwaka wa 1993; bari barashakanye mu buryo bwemewe n’amategeko. Uwo mubyeyi asize umwana umwe muto ufite umwaka n’amezi atanu.

Hirya no hino mu gihugu hakomeje kugaragara ikibazo cy’abashakanye bicana ahanini bikavugwa ko bituruka ku makimbirane baba bafitanye amaze igihe kirekire.

Hari abapfa imitungo, gucana inyuma, ubusinzi n’ibindi bitandukanye.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza