00:00:00 IGIHE NETWORK KN KINYARWANDA EN ENGLISH FR FRANCAIS

Gisagara: Uko bagaruye icyizere nyuma yo guhungabanywa no gutwita imburagihe

Yanditswe na Prudence Kwizera
Kuya 21 July 2022 saa 09:42
Yasuwe :

Abangavu basaga 100 bo mu Turere twa Huye na Gisagara batewe inda imburagihe, bamaze igihe biga imyuga mu kigo bashingiwe na Musenyeri wa Diyoseze Gatolika ya Butare, Rukamba Philippe, bavuga ko bamaze kugarura icyizere cy’ubuzima bari baratakaje.

Abo bangavu mu buhamya bwabo bavuga ko bakimara gutwita byabagizeho ingaruka mbi zirimo kuva mu ishuri, kwangwa n’imiryango yabo no gutakaza icyizere cyo kubaho ku buryo bamwe bashatse no kwiyahura.

Izo ngaruka bahuye na zo mu gihe mu Rwanda no ku Isi hose bari bugarijwe n’Icyorezo cya Covid-19 ku buryo bari bagowe n’ubuzima.

Bamwe muri bo bagannye Diyoseze ya Butare bajya kureba Musenyeri Rukamba baramutakambira ngo abahe ubufasha bituma aha inshingano Caritas ya Diyoseze zo gukora umushinga ubafasha.

Caritas ya Diyoseze ya Butare yahise ishinga Ikigo cyitwa Centre des Jeunes Saint Vincent de Paul, mu Kagari ka Gatoki mu Murenge wa Save mu Karere ka Gisagara cyigisha kudoda imyenda, gutunganya umusatsi n’inzara.

Abagera kuri 63 bamaze umwaka biga iyo myuga basoje amasomo yabo ku wa Gatatu bavuze ko icyizere cy’ubuzima cyagarutse. Abandi basaga 30 bo baracyari ku ntebe y’ishuri.

Zawadi Immaculée yatewe inda imburagihe afite imyaka 16 y’amavuko mu mwaka wa Gatatu w’amashuri yisumbuye bituma ava mu ishuri noneho ababyeyi be batangira kumutoteza agera ku rwego rwo kumva yakwiyahura.

Nyuma yaje kubyara atangira kubaho nabi kubera ko atari afite uburyo bwo kwita ku mwana we no kwiyitaho kuko n’umuhungu wamuteye inda atamufashaga.

Amaze kugira amahirwe yo kujyanwa kwiga mu Kigo cy’imyuga i Save yahisemo uwo gutunganya imisatsi n’inzara. Avuga ko kuri ubu yatangiye gukorera amafaranga kandi icyo ashyize imbere ari ukunoza umurimo.

Ati “Uyu mwuga nawuhisemo nywukunze kandi narawize neza ndawumenya. Ubu natangiye gukorera amafaranga kuko aho dutuye bampa ibiraka nkabikora. Ubwo ndangije kwiga ngiye kurushaho kunoza ibyo nkora kuko baduhaye n’aho gukorera turi itsinda baduha n’ibikoresho. Ubu numva ejo hazaza hanjye n’umwana wanjye ari heza kuko nagaruye icyizere.”

Uwase Gloria yatewe inda afite imyaka 15 y’amavuko yiga mu mwaka wa Mbere w’amashuri yisumbuye ahita ava mu ishuri. Yabyariye ku Bitaro bya CHUB amaze iminsi ine ku bise bimubabaza cyane.

Uyu mukobwa w’imfubyi yabaga kwa nyirakuru ariko amaze gutwita yatotejwe na nyirarume bigera aho amwirukana mu rugo, atekereza kujya kwiyahura ariko aza gutabarwa n’ubuyobozi bwamuhumurije asubizwa mu rugo ndetse ashakirwa n’umuterankunga.

Kuri ubu amaze umwaka yiga kudoda imyenda, umwuga avuga ko watumye agarura icyizere cy’ubuzima.

Ati “Umwuga maze kwumenya kandi nzi kudoda imyenda y’ubwoko butandukanye. Umusaruro watangiye kuboneka kuko amafaranga ndayakorera.”

Usibye kwigishwa imyuga, abo bakobwa bagiya bahabwa n’ibiganiro bagakorerwa n’umwiherero hagamijwe kubafasha kwiyakira no gutuza kuko banyuze mu buzima bukomeye.

Umuyobozi wa Caritas ya Diyoseze ya Butare, Padiri Gilbert Kwitonda, yavuze ko abamaze gusoza amasomo bagiye no gufashwa gushyira mu bikorwa ibyo bize bahabwa ibikoresho n’aho gukorera.

Ati “Twashinze salon ebyiri imwe y’ubudozi n’indi ya salon de coiffure hanyuma dushyiramo ibikoresho byose kandi tukabashakira abo badodera kuko hari abantu dusanzwe dukorana bo ku mugabane w’u Burayi dushyira ibikapu bidoze mu bitenge.”

Yavuze ko muri izo salons zombi hazajyamo 20 ariko abandi na bo bamaze gushyirwa mu matsinda kandi bazahabwa ibikoresho kuko hari umuterankunga wabibemereye ndetse bagiye no kwigishwa kuzigama.

Hari na gahunda isanzweho yo kwita ku bana babo bahabwa ibyo kurya byujuje intungamubiri izakomeza mu rwego rwo kubarinda kugwingira.

Umunyamabanga Nshingwabikorwa w’Umurenge wa Save, Ntiyamira David, yavuze ko icyo kigo cyabafashije gukemura ibibazo abakobwa batewe inda imburagihe bahuraga nabyo.

Yabasabye gukomeza umurongo mwiza wo gukunda umurimo kandi bakirinda ibishuko bishobora kongera kubashora mu busambanyi.

Nyuma y’uko icyiciro cya mbere gisoje amasomo hari gahunda yo kwakira abandi nabo bagafashwa.

Uwitwaye neza mu gutunganya imisatsi kurusha abandi yahembwe ibikoresho byo muri salon de coiffure
Uwitwaye neza kurusha abandi mu budozi yahembwe imashini idoda
Umuyobozi wa Caritas ya Diyoseze ya Butare, Padiri Gilbert Kwitonda, yavuze ko gahunda yo kwita ku bana babo bahabwa amafunguro izakomeza
Nyuma yo kwiga imyuga icyizere cyo kubaho cyaragarutse
Nyuma yo kugarura icyizere cy'ubuzima barambara bakaberwa bafite n'akanyamuneza
Bishimiye intambwe bamaze gutera bacinya akadiho
Imwe mu myenda badoze ubwo bari bakiri ku ntebe y'ishuri
Bishimira ko bafashijwe kwiga imyuga ibafasha kubaho
Bashimiye Musenyeri Rukamba wabashingiye ikigo bagarura icyizere cy'ubuzima
Abagera kuri 63 basoje amasomo bahawe impamyabushobozi
Abana babo bahabwa indyo yuzuye mu kubarinda imirire mibi itera kugwingira

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .