Gisagara: Ntibumva impamvu bamwe mu basambanya abana bafungwa bakarekurwa

Yanditswe na Prudence Kwizera
Kuya 25 Kamena 2020 saa 02:18
Yasuwe :
0 0

Ubuyobozi bw’Akarere ka Gisagara bwatangaje ko kugeza ubu dosiye 89 z’abagabo bakekwaho gusambanya abangavu bakabatera inda z’imburagihe ziri gukurikiranwa n’ubutabera hakaba hategerejwe ibizazivamo.

Byatanganjwe n’Umuyobozi wungirije ushinzwe imibereho myiza y’abaturage mu Karere ka Gisagara, Gasengayire Clémance, kuri uyu wa Gatatu ubwo bafatanyaga n’umuryango Mpuzamahanga Action Rwanda gukora ubukangurambaga bugamije gukumira ihohoterwa rishingiye ku gitsina, by’umwihariko icyaha cyo gusambanya abangavu.

Ibi yabitangaje nyuma y’uko bamwe mu bangavu bagaragaje ko hari abagabo n’abasore babasambanyije bakabatera inda, ariko nyuma yo gufungwa n’ubugenzacyaha bagahita barekurwa.

Gasengayire yavuze ko abakekwaho icyo cyaha bose bazakurikiranwa kandi hari abo dosiye zabo zamaze kugezwa mu butabera.

Ati “Mu karere ka Gisagara tumaze gusabira ubutabera abana b’abakobwa 89. Ejobundi mbere y’uko icyorezo cya COVID-19 kigera mu Rwanda twajyanye abakobwa 11 n’abagabo bikekwa ko babateye inda kubapimisha ADN.”

Hagaragajwe ko hari abakekwaho gutera inda abangavu ariko bagishakishwa kuko bahise batoroka bakaba batari mu Karere ka Gisagara

Yasabye abangavu kujya bavugisha ukuri ku babateye inda kuko mu bagabo 11 baheruka gupimwa ADN hari uwo basanze abeshyerwa.

Umukozi wa Action Aid uhagarariye umushinga wo kurwanya ihohoterwa witwa Speak Out, Najjingo Robinah, yavuze ko mu Karere ka Gisagara hakomeje kugaragara abana bafatwa ku ngufu, bityo bakaba bahagurukiye kubirwanya.

Ati “Wenda natanga nk’urugero, muri ibi bihe bya Coronavirus mu Murenge wa Gishubi gusa tumaze kubona abana batanu barimo babiri b’imyaka 10 basambanyije mu rugo rumwe, hari undi w’imyaka umunani n’abandi babiri bari munsi y’imyaka 18.”

Najjingo yavuze ko n’ubwo hakorwa ubukangurambaga hakenewe cyane uruhare rw’ababyeyi mu kwigisha abana no kubarinda ibishuko.

Bamwe mu bangavu bo mu Karere ka Gisagara batewe inda imburagihe bavuze ko bagaragaje abazibateye ndetse banatabwa muri yombi n’Urwego rw’Igihugu rw’Ubugenzacyaha,RIB, ariko nyuma batungurwa no kubona barekuwe.

Umwe yagize ati “Mu kwezi kwa 10 mu mwaka wa 2019 umwarimu watwigishaga yamfashe ku ngufu antera inda; baramufashe baramufunga amaze icyumweru baramurekura ngo bategereje kuzapima umwana yavutse. Bakimurekura yahise atoroka kuko nabyaye yaragiye, numva ngo asigaye aba i Kigali.”

Abandi bangavu baganiriye na IGIHE bavuze ko babangamirwa no kuba ababateye inda bamara gufatwa bagahita barekurwa, bavuga ko bibatera impungenge ko babagirira nabi.

Kuri iki kibazo, Umuyobozi wungirije ushinzwe imibereho myiza y’abaturage mu Karere ka Gisagara, Gasengayire Clémance, yavuze ko bidakwiye gutera impungenge kuko ubutabera buba bukibakurikirana.

Yasabye abangavu kwirinda ibishuko by’abashaka kubasambanya, abasaba kujya bihutira gutanga amakuru igihe cyose hari ubafashe ku ngufu.

Imibare yerekana ko mu Karere ka Gisagara abangavu bari munsi y’imyaka 20 y’amavuko batewe inda imburagihe mu 2019 barenga 400.

Akarere ka Gisagara ku bufatanye na Action Aid bakoze ubukangurambaga bugamije gukumira no kurwanywa isambanywa ry'abangavu
Bamwe mu bangavu bo mu Karere ka Gisagara batewe inda imburagihe basabwe kwirinda ababashuka
Visi Meya Gasengayire yavuze ko abakekwaho icyo cyaha bose bazakurikiranwa kandi hari abo dosiye zabo zamaze kugezwa mu butabera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .